IPL 2021: കഴിഞ്ഞ തവണ കപ്പിനരികെ കാലിടറി, ഇത്തവണ കപ്പുംകൊണ്ടേ ഡിസി പോവൂ! കാരണങ്ങളറിയാം

മുന്‍നിരയുടെ ഫോം

കഴിഞ്ഞ സീസണില്‍ ഓപ്പണര്‍ പൃഥ്വി ഷാ ഡിസിക്കു വേണ്ടി മോശം പ്രകടനമായിരുന്നു നടത്തിയത്. ഈ കുറവ് ഡിസി മറികടക്കാന്‍ കാരണം മറ്റൊരു ഓപ്പണറായ ശിഖര്‍ ധവാന്റെ ഉജ്ജ്വല പ്രകടനമായിരുന്നു. എന്നാല്‍ പൃഥ്വി ഇപ്പോള്‍ കരിയറിലെ ഏറ്റവും മികച്ച ഫോമില്‍ തിരികെയെത്തിക്കഴിഞ്ഞു. കഴിഞ്ഞ ഓസ്‌ട്രേലിയന്‍ പര്യടനത്തിനിടെ ഇന്ത്യന്‍ ടീമില്‍ നിന്നും ഒഴിവാക്കപ്പെട്ട ശേഷം പൃഥ്വി ആളാകി മാറിയിരിക്കുകയാണ്. വിജയ് ഹസാരെ ട്രോഫിയില്‍ റണ്‍മഴ പെയ്യിച്ച താരം മുംബൈയ്ക്കു കിരീടം നേടിക്കൊടുക്കുകയും ചെയ്തിരുന്നു.
പൃഥ്വിക്കൊപ്പം ധവാന്‍, നായകന്‍ പന്ത് എന്നിവരുടെയും ഉജ്ജ്വല ഫോം ഡിസി മുന്‍നിരയെ ശക്തമാക്കിയിട്ടുണ്ട്. ഇനി അജിങ്ക്യ രഹാനെ കൂടി താളത്തിലെത്തിയാല്‍ ഡിസിയെ പിടിച്ചുനിര്‍ത്തുക ബുദ്ധിമുട്ടാവും.

ബൗളിങ് യൂനിറ്റ് ബാക്കപ്പ്

ബാറ്റിങില്‍ മാത്രമല്ല ബൗളിങിലും മികച്ച താരങ്ങളുടെ സാന്നിധ്യം ഡിസിക്കുണ്ട്. ശക്തമായ ബൗളിങ് ബാക്കപ്പുണ്ടെന്നതാണ് ഡിസിയെ കൂടുതല്‍ അപകടകാരികളാക്കുന്നത്. അതുകൊണ്ടു തന്നെ പരിക്ക് ഡിസിക്കു ഒരു തലവേദനയാവില്ല. അമിത് മിശ്രയുടെ ബാക്കപ്പായി പ്രവീണ്‍ ദുബെയുണ്ട്. ഇഷാന്ത് ശര്‍മയുടെ ബാക്കപ്പായി ഉമേഷ് യാദവ്, ആവേശ് ഖാന്‍ എന്നിവരും ഡിസിയിലുണ്ട്.
വിദേശ ബൗളര്‍മാരുടെ കാര്യമെടുത്താല്‍ കാഗിസോ റബാഡ, ആന്റിച്ച് നോര്‍ക്കിയ എന്നിവരുടെ ബാക്കപ്പുകള്‍ ക്രിസ് വോക്‌സ്, ടോം കറെന്‍ എന്നിവരാണ്. ഇടംകൈയന്‍ പേസര്‍ ലുക്മാന്‍ മെറിവാലയുടെ സാന്നിധ്യം ഡിസി ബൗളിങില്‍ വൈവിധ്യം കൊണ്ടുവരും.

മാച്ച് വിന്നര്‍മാര്‍

ഒരുപിടി മാച്ച് വിന്നര്‍മാരെ ഡിസി ടീമില്‍ കാണാം. ഓസ്‌ട്രേലിയന്‍ ഓള്‍റൗണ്ടര്‍ മാര്‍ക്കസ് സ്‌റ്റോയ്‌നിസ് ബോള്‍ കൊണ്ടും ബാറ്റ് കൊണ്ടും ടീമിനെ ഒറ്റയ്ക്കു വിജയിപ്പിക്കാന്‍ ശേഷിയുള്ള താരങ്ങളില്‍ ഒരാളാണ്. ഐപിഎല്ലിലെ ഏറ്റവും മികച്ച ബൗളിങ് സ്‌ട്രൈക്ക് റേറ്റാണ് സ്റ്റാര്‍ പേസര്‍ റബാഡയ്ക്കുള്ളത്. തന്ത്രശാലിയായ ബൗളറെന്നു വിശേഷിപ്പിക്കപ്പെടുന്നയാളാണ് ഓഫ്‌സ്പിന്നര്‍ ആര്‍ അശ്വിന്‍.
കഴിഞ്ഞ സീസണില്‍ മുന്‍നിരയുടെ മോശം ഫോമും പേസ് ബൗളിങില്‍ മികച്ച ബാക്കപ്പ് ഇല്ലായിരുന്നുവെന്നതും ഡിസിയുടെ വീക്ക്‌നെസുകളായിരുന്നു. എന്നാല്‍ ഇത്തവണ ഈ രണ്ടു വീക്ക്‌നെസുകളും അവര്‍ക്കില്ലെന്നു കാണാം.