ഇന്ത്യയുടെ പുതിയ ടെസ്റ്റ് നായകന്‍ 'പാട് പെടും', മുന്നില്‍ മൂന്ന് വമ്പന്‍ വെല്ലുവിളികള്‍, പരിഹാരം കടുപ്പം

മികച്ചൊരു മധ്യനിരയെ കണ്ടെത്തണം

ഇന്ത്യയുടെ ഇതുവരെയുള്ള ടീമില്‍ നിന്ന് വലിയൊരു അഴിച്ചുപണി തന്നെ അടുത്ത പരമ്പര മുതല്‍ ഉണ്ടാവും. അതുകൊണ്ട് തന്നെ പുതിയ ക്യാപ്റ്റന് പണി കൂടും. ചേതശ്വര്‍ പുജാര, അജിന്‍ക്യ രഹാനെ എന്നിവര്‍ ഇനി ഇന്ത്യന്‍ ടീമിലുണ്ടാവാന്‍ സാധ്യതയില്ല. അതുകൊണ്ട് തന്നെ ഉത്തമ പകരക്കാരെ കണ്ടെത്തി വളര്‍ത്തിക്കൊണ്ട് വരേണ്ടതായുണ്ട്. ടെസ്റ്റില്‍ സ്ഥിരതയോടെ കളിക്കാന്‍ കഴിയുന്ന താരങ്ങളെ കണ്ടെത്തുകയെന്നത് തന്നെ വളരെ കടുപ്പമുള്ള കാര്യമാണ്. നിലവില്‍ ഹനുമ വിഹാരി, ശ്രേയസ് അയ്യര്‍, ശുബ്മാന്‍ ഗില്‍ എന്നിവരൊക്കെ ടീമിന്റെ മധ്യനിരയിലേക്ക് പരിഗണിക്കാവുന്നവരാണ്. എന്നാല്‍ ഇവരെക്കൊണ്ട് മികച്ച പ്രകടനത്തിലേക്കെത്തിക്കുകയെന്നത് വളരെ പ്രയാസം തന്നെയായിരിക്കും. മികച്ച ടീം കണ്ടെത്തുകയെന്നത് തന്നെ മുന്നിലുള്ള പ്രധാന വെല്ലുവിളിയെന്ന് പറയാം.

വലിയ ടൂര്‍ണമെന്റുകളില്‍ വിജയിപ്പിക്കണം

വിരാട് കോലി ഇന്ത്യന്‍ നായകസ്ഥാനത്ത് നിന്നിറങ്ങുമ്പോള്‍ ടീം അത്യുന്നതങ്ങളിലാണ്. കോലി നായകനാവുമ്പോള്‍ ഇന്ത്യ ഏഴാം സ്ഥാനത്തായിരുന്നു. ഇവിടെ നിന്നാണ് ഇന്ത്യന്‍ ടീമിനെ ഒന്നാം സ്ഥാനത്തേക്ക് കോലിയെത്തിച്ചത്. വിദേശ പര്യടനങ്ങളിലടക്കം പരമ്പര നേടുന്നതെങ്ങനെയെന്ന് കോലി കാട്ടിത്തത്തു. ഓസ്‌ട്രേലിയയില്‍ ആദ്യമായി ഇന്ത്യക്ക് ടെസ്റ്റ് പരമ്പര നേടിക്കൊടുത്ത നായകന്‍ കോലിയാണ്. ഇംഗ്ലണ്ടിലും ഗംഭീര പ്രകടനം നടത്തി. പുതിയ നായകനെത്തുമ്പോള്‍ ഇതേ പ്രകടന നിലവാരം നിലനിര്‍ത്തേണ്ടതായുണ്ട്. നിലവില്‍ ഇന്ത്യന്‍ ടീം ഏത് വമ്പന്മാരെയും വിറപ്പിക്കുന്നവരാണ്. എന്നാല്‍ പുതിയ നായകന്റെ കീഴില്‍ ഈ മികവ് ഇന്ത്യക്ക് തുടരാനാവാത്ത പക്ഷം പുതിയ നായകന്‍ നന്നായി പ്രയാസപ്പെടുമെന്നുറപ്പാണ്.

ടീമിന്റെ ഒത്തൊരുമയും ആക്രമണോത്സകതയും

പുതിയ നായകന്‍ എല്ലാ താരങ്ങളെയും ഒന്നിച്ച് കൊണ്ടുപോകാന്‍ കെല്‍പ്പുള്ളവനായിരിക്കണം. അല്ലാത്ത പക്ഷം വലിയ തിരിച്ചടി നേരിടേണ്ടി വരും. കൂടാതെ വിരാട് കോലിയുടെ കീഴില്‍ ഇന്ത്യ വളരെ ആക്രമണോത്സകതയുള്ള ടീമായിരുന്നു. ഈ ആക്രമണോത്സകതയാണ് പല വലിയ മത്സരങ്ങളിലും ഇന്ത്യയെ വിജയത്തിലേക്ക് നയിച്ചത്. കോലിക്ക് ശേഷമെത്തുന്നയാള്‍ ഇതേ ആക്രമണോത്സകത നിലനിര്‍ത്തേണ്ടതായുണ്ട്. അല്ലാത്ത പക്ഷം ഇതേ വീര്യത്തോടെ ഇന്ത്യയെ മുന്നോട്ട് കൊണ്ടുപോകാനാവില്ല. വിരാട് കോലിയും ബിസിസി ഐ മാനേജ്‌മെന്റും തമ്മിലുള്ള ഉടക്ക് ടീമിനെ ബാധിക്കാതെ നോക്കുകയെന്നതും പുതിയ നായകന് മുന്നിലെ വെല്ലുവിളിയാണ്.