T20 World Cup 2026: അഭിഷേകിന് ഭക്ഷ്യവിഷബാധ, ഗംഭീറിന്റെ അത്താഴവിരുന്നിലും പങ്കെടുത്തില്ല; വെളിപ്പെടുത്തല്‍

ടി20 ലോകകപ്പില്‍ അഭിഷേക് ശര്‍മ്മയുടെ മോശം ഫോമിന് കാരണം വയറ്റിലെ അണുബാധയാണെന്ന് മുന്‍ ഇന്ത്യന്‍ ക്രിക്കറ്റ് താരം മനോജ് തിവാരി. കൊളംബോയില്‍ പാകിസ്ഥാനെതിരായ മത്സരത്തിന് മുമ്പ് അസുഖം കാരണം നമീബിയയ്ക്കെതിരായ ഗ്രൂപ്പ് ഘട്ട മത്സരം അദ്ദേഹത്തിന് നഷ്ടമായിരുന്നു. യുഎസ്എക്കെതിരായ ആദ്യ മത്സരത്തിലും അഭിഷേക് ശര്‍മ്മയ്ക്ക് അസുഖം ബാധിച്ചതായി റിപ്പോര്‍ട്ടുണ്ട്.

ഇന്ത്യ ഫീല്‍ഡ് ചെയ്യുമ്പോള്‍ രണ്ടാം ഇന്നിംഗ്സില്‍ അദ്ദേഹം കളിച്ചിരുന്നില്ല. പനി ബാധിച്ചതിനെ തുടര്‍ന്ന് മുഖ്യ പരിശീലകന്‍ ഗൗതം ഗംഭീറിന്റെ വസതിയില്‍ ടീം അത്താഴവിരുന്നില്‍ നിന്ന് സഹതാരങ്ങള്‍ക്ക് മുമ്പായി അദ്ദേഹം ഇറങ്ങിപ്പോയതും ദൃശ്യമായിരുന്നു. ടൂര്‍ണമെന്റിന്റെ തയ്യാറെടുപ്പിനിടെ മികച്ച ഫോമിലായിരുന്നതിനാല്‍ അസുഖം കാരണം അഭിഷേക് ശര്‍മ്മയുടെ മികച്ച പ്രകടനത്തിന് തടസമായെന്ന് മനോജ് തിവാരി സമ്മതിച്ചു.

ദക്ഷിണാഫ്രിക്കയ്ക്കെതിരായ നിര്‍ണായക സൂപ്പര്‍ 8 ഘട്ട മത്സരത്തിന് മുന്‍ുപാണ് മനോജ് തിവാരിയുടെ പ്രതികരണം. 'ശരിയാണ്, ശരാശരി നിയമങ്ങള്‍ ബാധകമാണ്. പക്ഷേ അവന്‍ തന്റെ വയറിന്റെ കാര്യവും ശ്രദ്ധിക്കേണ്ടതുണ്ട്. ഈ പ്രശ്നത്തിന് കാരണമായത് അവന്റെ വയറാണ്. ആ ഫുഡ്പോയ്സണിംഗ് ഇടവേളയില്‍ നിന്ന് തിരിച്ചെത്തിയതിനുശേഷം, രണ്ട് ഇന്നിംഗ്സുകളില്‍ അവന്‍ സ്‌കോര്‍ ചെയ്തിട്ടില്ല,' അദ്ദേഹം പറഞ്ഞു.

എന്നാല്‍ അദ്ദേഹത്തിന് വൈകാതെ തന്നെ പന്ത് ശരിയായി കണക്ട് ചെയ്യാനാകും എന്നും തിവാരി കൂട്ടിച്ചേര്‍ത്തു. ഈ ലോകകപ്പില്‍ ഒരു റണ്‍സ് പോലും അഭിഷേക് സ്‌കോര്‍ ചെയ്തിട്ടില്ല. തുടര്‍ച്ചയായി മൂന്ന് തവണ പൂജ്യത്തിന് പുറത്തായി, കഴിഞ്ഞ രണ്ട് മത്സരങ്ങളില്‍ ഓഫ് സ്പിന്നര്‍മാരാല്‍ പുറത്താക്കപ്പെട്ടു. ടി20 റാങ്കിംഗില്‍ ഒന്നാം സ്ഥാനത്തുള്ള അഭിഷേക് ശര്‍മ്മ ദക്ഷിണാഫ്രിക്കയ്ക്െതിരെ വരാനിരിക്കുന്ന നിര്‍ണായക പോരാട്ടത്തില്‍ തന്റെ കഴിവ് തെളിയിക്കാന്‍ വലിയ സമ്മര്‍ദ്ദത്തിലാണ്.

അതേസമയം സഞ്ജുവിനെ തിരികെ വിളിക്കണം എന്ന് മലയാളി ആരാധകരെല്ലാം മുറവിളി കൂട്ടുമ്പോഴും ടീമും മുന്‍താരങ്ങളുമെല്ലാം അഭിഷേക് ശര്‍മ്മയ്ക്ക് അടിയുറച്ച പിന്തുണയാണ് നല്‍കുന്നത്. തന്റെ ഫോമും ആത്മവിശ്വാസവും വീണ്ടെടുക്കുന്നതിനായി അഭിഷേക് ശര്‍മ്മയ്ക്ക് തന്റെ സമീപനത്തില്‍ അല്‍പ്പം കുറവ് വരുത്താനുള്ള ഓപ്ഷന്‍ ഉണ്ടെന്ന് മുന്‍ ഇന്ത്യന്‍ പേസര്‍ മോഹിത് ശര്‍മ്മ പറഞ്ഞു.

'ഞാനും ഇത് മുമ്പ് പറഞ്ഞിട്ടുണ്ട്, ഈ സമീപനം ഇരുതല മൂര്‍ച്ചയുള്ള വാളാണ്. അവന്‍ റണ്‍സ് നേടുമ്പോള്‍, അത് മനോഹരമായി കാണപ്പെടുന്നു. പക്ഷേ അവന്‍ നേരത്തെ പുറത്താകുമ്പോള്‍, എന്തിനാണ് ആ ഷോട്ട് കളിക്കുന്നത്? അത് അടിക്കാന്‍ വേണ്ടിയല്ലായിരുന്നു, അവന് കുറച്ച് സമയമെടുക്കാമായിരുന്നു എന്നെല്ലാം തോന്നും. നിങ്ങളുടെ കരിയര്‍ മുഴുവന്‍ ഒരു വിധത്തില്‍ കളിക്കാന്‍ കഴിയില്ല.

അതിനാല്‍, അവന്‍ അതിനെക്കുറിച്ച് ചിന്തിക്കേണ്ടതുണ്ട്. തന്റെ ഫോം കണ്ടെത്താന്‍ പരമാവധി ശ്രമിക്കുന്നതിനുപകരം കുറച്ച് സമയമെടുക്കാന്‍ അവന്‍ ആഗ്രഹിക്കുന്നുവെങ്കില്‍, എനിക്ക് അതില്‍ ഒരു പ്രശ്‌നവുമില്ല.' മോഹിത് ശര്‍മ്മ വിശദീകരിച്ചു. അതേസമയം സൂപ്പര്‍ 8 ല്‍ അഭിഷേക് ശര്‍മ്മ കളിക്കും എന്ന സൂചനയാണ് ക്യാപ്റ്റന്‍ സൂര്യകുമാര്‍ യാദവ് നല്‍കുന്നത്.