T20 World Cup 2024: വീണ്ടും ഡെക്ക്, കോലിക്കു എന്തുമാവാം! സഞ്ജുവെങ്കില്‍ ടീമിന് പുറത്ത്, വിമര്‍ശനം

സെന്‍ ലൂസിയ: ഇന്ത്യന്‍ സ്റ്റാര്‍ ബാറ്ററും മുന്‍ ക്യാപ്റ്റനുമായ വിരാട് കോലി മറക്കാനാഗ്രഹിക്കുന്ന ടൂര്‍ണമെന്റായി മാറിയിരിക്കുകയാണ് ഇത്തണത്തെ ടി20 ലോകകപ്പ്. നായകന്‍ രോഹിത് ശര്‍മയ്‌ക്കൊപ്പം ടൂര്‍ണമെന്റില്‍ ഓപ്പണിങ് റോളിലേക്കു വന്നതിനു ശേഷം അദ്ദേഹം ബാറ്റിങ് മറന്ന മട്ടാണ്. ഓസ്‌ട്രേലിയക്കെതിരേയുള്ള സൂപ്പര്‍ എട്ട് പോരാട്ടത്തിലും കോലി ബാറ്റിങില്‍ ദുരന്തമായി മാറി. പൂജ്യത്തിനാണ് അദ്ദേഹത്തിനു ഈ മല്‍സരത്തില്‍ ക്രീസ് വിടേണ്ടി വന്നത്.

നാലു ബോളുകള്‍ നേരിട്ടിട്ടും അക്കൗണ്ട് തുറക്കാന്‍ പാടുപെട്ട കോലി അഞ്ചാമത്തെ ബോളില്‍ പുറത്താവുകയും ചെയ്യുകയായിരുന്നു. ഇന്നിങ്‌സിലെ രണ്ടാം ഓവറില്‍ തന്നെ അദ്ദേഹത്തിനു മടങ്ങേണ്ടി വരികയായിരുന്നു. പേസര്‍ ജോഷ് ഹേസല്‍വുഡാണ് കോലിയുടെ വിലപ്പെട്ട വിക്കറ്റ് സ്വന്തമാക്കിയത്. രണ്ടാം ഓവറിലെ നാലാമത്തെ ബോളിലായിരുന്നു ഇത്.

വേഗത കൂടിയ ഒരു ഷോര്‍ട്ട് ബോളാണ് ഹേസല്‍വുഡ് പരീക്ഷിച്ചത്. കോലി മുന്നിലേക്കു കയറി പുള്‍ ഷോട്ടിലൂടെ സിക്‌സറിനു തുനിയുകയായിരുന്നു. പക്ഷെ ഈ നീക്കം പാടെ പാളി. ടോപ് എഡ്ജായ ബോള്‍ മുകളിലേക്കുയരുകയും സര്‍ക്കിളിനകത്തു നിന്നും പിറകിലേക്കു ഓടിയ ടിം ഡേവിഡ് മിഡ് ഓണ്‍ ഏരിയയില്‍ മികച്ചൊരു റണ്ണിങ് ക്യാച്ചെടുക്കുകയും ചെയ്തു.

ടൂര്‍ണമെന്റില്‍ രണ്ടാം തവണയാണ് കോലിക്കു പൂജ്യത്തിനു ക്രീസ് വിടേണ്ടി വന്നത്. നേരത്തേ ഗ്രൂപ്പുഘട്ടത്തില്‍ അമേരിയ്‌ക്കെതിരായ മല്‍സരത്തില്‍ അദ്ദേഹം ഗോള്‍ഡന്‍ ഡെക്കായിരുന്നു. ഇതിനകം കളിച്ചിട്ടുള്ള ആറിന്നിങ്‌സുകളില്‍ നിന്നും 11 എന്ന ദയനീയ ശരാശരിയില്‍ 100 സ്‌ട്രൈക്ക് റേറ്റില്‍ വെറും 66 റണ്‍സ് മാത്രമേ കോലിക്കു സ്‌കോര്‍ ചെയ്യാനായിട്ടുള്ളൂ. നേരിട്ടതും 66 ബോളുകള്‍ തന്നെയാണ്. വെറും രണ്ടു ഫോറും നാലു സിക്‌സറും മാത്രമേ ടൂര്‍ണമെന്റില്‍ കോലി നേടിയിട്ടുള്ളൂ. ഉയര്‍ന്ന സ്‌കോര്‍ ബംഗ്ലാദേശിനെതിരായ അവസാന മല്‍സരത്തില്‍ നേടിയ 37 റണ്‍സാണ്.

ഇന്ത്യന്‍ ബാറ്റിങ് നിരയില്‍ ഇത്തവണ ഏറ്റവും വലിയ ദുരന്തമായി മാറിയ കോലിക്കു രൂക്ഷ വിമര്‍ശനങ്ങളാണ് സോഷ്യല്‍ മീഡിയയില്‍ ആരാധകരില്‍ നിന്നും നേരിടുന്നത്. ഓസ്‌ട്രേലിയക്കെതിരേ ഡെക്കായതിനു പിന്നാലെ ആരാധകര്‍ അദ്ദേഹത്തെ പഞ്ഞിക്കിടുകയും ചെയ്തിരിക്കുകയാണ്. ഓപ്പണിങില്‍ നിന്നും ഇനിയെങ്കിലും കോലിയെ മാറ്റി പകരം യശസ്വി ജയ്‌സ്വാളിനെ തിരികെ വിളിക്കണമെന്നാണ് പലരും ആവശ്യപ്പെടുന്നത്.

ഇന്ത്യന്‍ ടീം മാനേജ്‌മെന്റിന് എപ്പോഴാണ് ബുദ്ധിയുദിക്കുക? ആറിന്നിങ്‌സുകള്‍ ഈ ലോകകപ്പില്‍ കളിച്ചു കഴിഞ്ഞിട്ടും വിരാട് കോലിക്കു ഓപ്പണിങ് റോള്‍ പറ്റില്ലെന്നു അവര്‍ക്കു മനസ്സിലായിട്ടില്ലേ? തുടരെ ഫ്‌ളോപ്പായി കൊണ്ടിരുന്നിട്ടും കോലിയെ എന്തിനാണ് ഈ റോളിലേക്കു തള്ളിവിടുന്നതെന്നും ആരാധകര്‍ ചോദിക്കുന്നു.

വിരാട് കോലി വീണ്ടും ബാറ്റിങില്‍ ഫ്‌ളോപ്പായിരിക്കുകയാണ്. ടൂര്‍ണമെന്റില്‍ അദ്ദേഹം രണ്ടാമതും പൂജ്യത്തിനു പുറത്തായി. ആറു മല്‍സരങ്ങളില്‍ കളിച്ചിട്ടും ഒരു ഫിഫ്റ്റി പോലും കോലിക്കു നേടാനായിട്ടില്ല. എങ്കിലും തുടര്‍ന്നുള്ള മല്‍സരങ്ങളിലും അദ്ദേഹത്തിനു അവസരം ലഭിച്ചു കൊണ്ടേയിരിക്കും.

കോലിയുടെ സ്ഥാനത്തു സഞ്ജു സാംസണ്‍ ആയിരുന്നെങ്കില്‍ ഒരൊറ്റ ഇന്നിങ്‌സില്‍ ചെറിയ സ്‌കോറിനു പുറത്തായാല്‍ അടുത്ത കളിയില്‍ പുറത്തിരിക്കും. ഇതു കടുത്ത അനീതിയാണെന്നും ആരാധകര്‍ ആഞ്ഞടിക്കുന്നു.

വിരാട് കോലി ഈ ലോകകപ്പോടെ ടി20യില്‍ നിന്നും വിരമിക്കണം. ഏകദിനം, ടെസ്റ്റ് എന്നിവയില്‍ ശ്രദ്ധ കേന്ദ്രീകരിക്കുന്നതാണ് അദ്ദേഹത്തിനു നല്ലത്. കഴിവുള്ള ഒരുപാട് യുവതാരങ്ങള്‍ അവസരം കാത്ത് പുറത്തിരിക്കുകയാണ്. ഈ ലോകപ്പില്‍ യശസ്വി ജയ്സ്വാളിന്‍റ വഴി തഞ്ഞത് കോലിയാണ് കോലി ഇനിയെങ്കിലും വഴി മാറിക്കൊടുക്കണമെന്നും ആരാധകര്‍ ആവശ്യപ്പെടുന്നു.