Click it and Unblock the Notifications
പരിചയസമ്പന്നനായ അശ്വിന് സാഹചര്യത്തിനനുസരിച്ച് പന്തെറിഞ്ഞു. നാല് ഓവറില് വെറും 14 റണ്സ് മാത്രം വിട്ടുകൊടുത്ത് രണ്ട് വിക്കറ്റാണ് അശ്വിന് വീഴ്ത്തിയത്. ഇപ്പോഴിതാ അശ്വിന്റെ പ്രകടനത്തെ പ്രശംസിച്ചിരിക്കുകയാണ് ഇന്ത്യന് നായകന് വിരാട് കോലി. 'അശ്വിന്റെ തിരിച്ചുവരവ് ടീമിന് വലിയ പോസിറ്റീവാണ്. കഠിനമായി പരിശ്രമിച്ചതിന്റെ ഫലമാണിത്. ഐപിഎല്ലിലും ഇതേ നിയന്ത്രണവും മികവും കാട്ടാന് അശ്വിനായിരുന്നു. വലിയ താരങ്ങള്ക്കെതിരെയാണ് അവിടെയും അവന് പന്തെറിഞ്ഞത്. വിക്കറ്റ് വീഴ്ത്താന് കെല്പ്പുള്ള താരം മാത്രമല്ല ബുദ്ധിമാനായ ബൗളര്കൂടിയാണവന്'- കോലി പറഞ്ഞു.
ആദ്യ രണ്ട് മത്സരത്തിലും ഇന്ത്യ അശ്വിനെ പരിഗണിച്ചിരുന്നില്ല. യുവ ഓപ്പണറായ വരുണ് ചക്രവര്ത്തിയില് വിശ്വാസം അര്പ്പിച്ചെങ്കിലും പ്രതീക്ഷക്കൊത്ത് ഉയരാന് അദ്ദേഹത്തിനായില്ല. ഇതോടെ അശ്വിനെ കളിപ്പിക്കാത്തതിനെതിരേ വലിയ വിമര്ശനം ഉയര്ന്നിരുന്നു. നിലവിലെ ഏറ്റവും മികച്ച സ്പിന് ബൗളര്മാരിലൊരാളാണ് അശ്വിന്. അത്യാവശം ബാറ്റും ചെയ്യാന് കെല്പ്പുള്ള അശ്വിന്റെ അനുഭവസമ്പത്ത് എങ്ങനെ ടീമിനെ സഹായിക്കുമെന്ന് അഫ്ഗാനിസ്ഥാനെതിരായ പ്രകടനത്തിലൂടെ വ്യക്തം.
പാകിസ്താനോട് 10 വിക്കറ്റിനും ന്യൂസീലന്ഡിനോട് എട്ട് വിക്കറ്റിനും തോറ്റാണ് ഇന്ത്യ അഫ്ഗാനിസ്ഥാനെ നേരിടാനെത്തിയത്. ടൂര്ണമെന്റില് മികച്ച പോരാട്ടവീര്യം കാഴ്ചവെച്ച അഫ്ഗാനിസ്ഥാന്റെ സ്പിന് നിര ഇന്ത്യക്ക് വലിയ ഭീഷണി ഉയര്ത്തുമെന്ന് കരുതിയെങ്കിലും ബാറ്റ്സ്മാന്മാരുടെ മികവ് കൊണ്ട് ഈ വെല്ലുവിളികളെ അതിജീവിച്ചു. ആദ്യ രണ്ട് മത്സരത്തില് നിന്നും വ്യത്യസ്തമായ മനോഭാവത്തോടെയാണ് ഇന്ത്യ ഇറങ്ങിയതെന്ന് കോലി അഭിപ്രായപ്പെട്ടു.
'ടി20 ക്രിക്കറ്റില് തീരുമാനങ്ങള്ക്ക് വലിയ പ്രാധാന്യമുണ്ട്. ഞങ്ങള് കൂടുതല് തീരുമാനങ്ങളുമെടുക്കുന്നത് മത്സരത്തിനിടെയിലാണ്. ഇന്നത്തെ മത്സരം തന്നെ നോക്കുക. ഓപ്പണര്മാര് 13 ഓവര്വരെ ബാറ്റ് ചെയ്തു. ഇതോടെയാണ് ടീമിലെ പവര്ഹിറ്റര്മാരെ ഇറക്കാന് തീരുമാനിച്ചത്. ഞങ്ങള് താരങ്ങളെ പിന്തുണക്കുകയാണ് ചെയ്യുന്നത്. കാരണം അവരുടെ പ്രതിഭ എത്രത്തോളമെന്ന് ഞങ്ങള്ക്ക് നന്നായി അറിയാം. നെറ്റ് റണ്റേറ്റ് ഞങ്ങളുടെ മനസിലുണ്ട്. ഇനിയും സാധ്യതകളുണ്ടെന്നതിനാല് പോസിറ്റീവായി കളിക്കുകയാണ് വേണ്ടതെന്ന് ഞങ്ങള്ക്കറിയാം'- വിരാട് കോലി കൂട്ടിച്ചേര്ത്തു.
നെറ്റ് റണ്റേറ്റ് മെച്ചപ്പെടുത്തിയ ഇന്ത്യയുടെ സാധ്യതകള് പൂര്ണ്ണമായും അവസാനിച്ചിട്ടില്ല. ന്യൂസീലന്ഡ്, അഫ്ഗാനിസ്ഥാന് എന്നിവരുടെ മത്സരഫലമാണ് ഇന്ത്യക്ക് നിര്ണ്ണായകം. ന്യൂസീലന്ഡ് ഒരു മത്സരം തോല്ക്കേണ്ടത് ഇന്ത്യക്ക് വളരെ പ്രധാനപ്പെട്ടതാണ്. കാരണം ഗ്രൂപ്പില് നിന്ന് പാകിസ്താന് ഇതിനോടകം സെമിയില് കടന്നിട്ടുണ്ട്. ഒരു ടീമിന് മാത്രമാണ് ഇനി അവസരമുള്ളത്. നിലവിലെ സാധ്യതകള് പ്രകാരം ഇന്ത്യയെക്കാള് മുന്തൂക്കം ന്യൂസീലന്ഡിനുണ്ട്. എന്നാല് ശേഷിക്കുന്ന രണ്ട് മത്സരത്തില് കൂടി ഗംഭീര ജയം നേടുകയും ഭാഗ്യം തുണയ്ക്കുകയും ചെയ്താല് ഇന്ത്യക്ക് ഇനിയും സാധ്യതകളുണ്ട്.
Continue with Google