T20 World Cup 2021: പാകിസ്താനോടു ഇന്ത്യ തോല്‍ക്കും! ധോണി അന്നു പറഞ്ഞത് സത്യമായി

ധോണി അന്നു പറഞ്ഞത്

2016ലെ ടി20 ലോകകപ്പില്‍ പാകിസ്താനെതിരായ പോരാട്ടത്തിനു മുമ്പ് ധോണിയുടെ വാക്കുകളാണ് ഇപ്പോള്‍ വീണ്ടും വൈറലാവുന്നത്. പാകിസ്താനെതിരേ നമ്മള്‍ 11-0ന് ജയിച്ചുവെന്നത് നിങ്ങള്‍ക്കു തീര്‍ച്ചയായും അഭിമാനം നല്‍കുന്നുണ്ടാവും. എന്നാല്‍ ഒരിക്കല്‍ നമ്മള്‍ തോല്‍ക്കുമെന്നത് മറ്റൊരു യാഥാര്‍ഥ്യമാണ്. ചിലപ്പോള്‍ നമ്മള്‍ ഇന്നു തോറ്റേക്കാം. അല്ലെങ്കില്‍ 20 വര്‍ഷം കഴിഞ്ഞോ, 50 വര്‍ഷം കഴിഞ്ഞോ പരാജയപ്പെട്ടേക്കാം. നിങ്ങള്‍ എല്ലായ്‌പ്പോഴും വിജയിക്കുകയെന്നത് ഒരിക്കലും സംഭവിക്കുകയില്ലെന്നു നിങ്ങള്‍ക്കറിയാമെന്നായിരുന്നു മല്‍സരത്തിനു മുമ്പുള്ള വാര്‍സമ്മേളനത്തില്‍ ധോണി പറഞ്ഞത്.

2016ലെ മല്‍സരം

2016ലെ ടി20 ലോകകപ്പിന്റെ സൂപ്പര്‍ 10 ലായിരുന്നു ഇന്ത്യയും പാകിസ്താനും തമ്മിലുള്ള ഗ്ലാമര്‍ പോരാട്ടം. ഒരേ ഗ്രൂപ്പിലായിരുന്നു രണ്ടു ടീമുകളും ഉള്‍പ്പെട്ടിരുന്നത്. 2016 മാര്‍ച്ച് 19ന് കൊല്‍ക്കത്തയില്‍ വച്ചായിരുന്നു ഇന്ത്യ- പാക് ഐതിഹാസിക പോരാട്ടം. കളിയില്‍ ധോണിക്കായിരുന്നു ടോസ്. അദ്ദേഹം ബൗളിങ് തിരഞ്ഞെടുക്കുകയും ചെയ്തു. തകര്‍പ്പന്‍ ബൗളിങിലൂടെ പാകിസ്താനെ ഇന്ത്യ വരിഞ്ഞുകെട്ടി. നിശ്ചിത ഓവറില്‍ അഞ്ചു വിക്കറ്റ് നഷ്ടത്തില്‍ 118 റണ്‍സാണ് ഷാഹിദ് അഫ്രീഡി നയിച്ച പാകിസ്താനു നേടാനായത്. പാക് നിരയില്‍ ആരും തന്നെ 30 റണ്‍സ് പോലും തികച്ചില്ല. 26 റണ്‍സോടെ ഷുഐബ് മാലിക്കത് ടോപ്‌സ്‌കോററായപ്പോള്‍ അഹമ്മദ് ഷഹ്‌സാദ് 25ഉം ഉമര്‍ അക്മല്‍ 22 റണ്‍സുമെടുത്തു. ഇന്ത്യക്കു വേണ്ടി ആശിഷ് നെഹ്‌റ, ജസപ്രീത് ബുംറ, രവീന്ദ്ര ജഡേജ, സുരേഷ് റെയ്‌ന, ഹാര്‍ദിക് പാണ്ഡ്യ എന്നിവര്‍ ഓരോ വിക്കറ്റ് വീതമെടുത്തു.
മറുപടി ബാറ്റിങില്‍ ഇന്ത്യ 15.5 ഓവറില്‍ നാലു വിക്കറ്റിനു ലക്ഷ്യത്തിലെത്തി. വിരാട് കോലിയുടെ (55) അപരാജിത ഫിഫ്റ്റിയായിരുന്നു ഇന്ത്യന്‍ വിജയത്തിനു അടിത്തറയിട്ടത്. 37 ബോളില്‍ ഏഴു ബൗണ്ടറികളും ഒരു സിക്‌സറുമുള്‍പ്പെടെയായിരുന്നു ഇത്. യുവരാജ് സിങ് 24 റണ്‍സെടുത്ത് പുറത്തായി. കോലിയും 13 റണ്‍സെടുത്ത നായകന്‍ ധോണിയും ചേര്‍ന്നാണ് ഇന്ത്യന്‍ വിജയം പൂര്‍ത്തിയാക്കിയത്.

ദയനീയ പരാജയം

ഉപദേശകനായി ധോണി ഒപ്പമുണ്ടായിട്ടും ഇത്തവണത്തെ ടി20 ലോകകപ്പില്‍ വിജയ റെക്കോര്‍ഡ് കാത്തുസൂക്ഷിക്കാന്‍ ഇന്ത്യക്കായില്ല. ബാബറിനു കീഴില്‍ കന്നി ലോകകപ്പ് മല്‍സരം കളിച്ച പാക് പട ഇന്ത്യയെ എല്ലാ മേഖലയിലും പിന്നിലാക്കിയാണ് കാത്തിരുന്ന വിജയം പിടിച്ചെടുത്തത്. ടോസ് നഷ്ടപ്പെട്ട് ബാറ്റിങിന് അയക്കപ്പെട്ട ഇന്ത്യക്കു നിശ്ചിത ഓവറില്‍ ഏഴു വിക്കറ്റിന് 151 റണ്‍സാണ് നേടാനായത്. പവര്‍പ്ലേയില്‍ തന്നെ മൂന്നിന് 31 റണ്‍സിലേക്കു ഇന്ത്യ വീണിരുന്നു. ഓപ്പണര്‍മാരായ രോഹിത് ശര്‍മ (0), കെഎല്‍ രാഹുല്‍ (3) എന്നിവരെ തുടക്കത്തില്‍ തന്നെ നഷ്ടമായതോടെ ഇന്ത്യ പതറി. നായകന്‍ കോലിയുടെ (57) ഫിഫ്റ്റിയാണ് ഇന്ത്യയെ രക്ഷിച്ചത്. 49 ബോളില്‍ അഞ്ചു ബൗണ്ടറികളും ഒരു സിക്കറും അദ്ദേഹം നേടി. റിഷഭ് പന്താണ് (39) മികച്ച സംഭാവന നല്‍കിയ മറ്റൊരു താരം. പാകിസ്താനു വേണ്ടി ഷഹീന്‍ അഫ്രീഡി മൂന്നു വിക്കറ്റുകളെടുത്തപ്പോള്‍ ഹസന്‍ അലി രണ്ടു വിക്കറ്റുകള്‍ നേടി. ഷഹീന്‍ അഫ്രീഡിയാണ് പ്ലെയര്‍ ഓഫ് ദി മാച്ചായത്.