T20 World Cup 2026: സഞ്ജു ലോകകപ്പ് ടീമില്‍... വഴിമുടക്കിയ ഗില്‍ തെറിച്ചു, ഇഷാനും ടീമിലേക്ക്

മുംബൈ: അടുത്ത വര്‍ഷമാദ്യം നടക്കാനിരിക്കുന്ന ഐസിസി ടി 20 ലോകകപ്പിനുള്ള ഇന്ത്യന്‍ ടീമിനെ പ്രഖ്യാപിച്ചു. മോശം ഫോമിലുള്ള ശുഭ്മാന്‍ ഗില്ലിനെ ഒഴിവാക്കിയാണ് ലോകകപ്പിനുള്ള സ്‌ക്വാഡിനെ പ്രഖ്യാപിച്ചത്. സൂര്യകുമാര്‍ യാദവാണ് ക്യാപ്റ്റന്‍. വിക്കറ്റ് കീപ്പറായി സഞ്ജു സാംസണ്‍ ടീമിലുണ്ട്. ഏറെ നാളായി ടീമിന് പുറത്തുള്ള ഇഷന്‍ കിഷനും 15 അംഗ ടീമില്‍ ഇടം നേടി.

സയ്യിദ് മുഷ്താഖ് അലി ട്രോഫിയിലെ മികച്ച പ്രകടനമാണ് ഇഷാന് ടീമിലേക്കുള്ള വാതില്‍ തുറന്നത്. ദക്ഷിണാഫ്രിക്കയ്‌ക്കെതിരായ ടി 20യിലെ മോശം പ്രകടനമാണ് വൈസ് ക്യാപ്റ്റന്‍ കൂടിയായ ശുഭ്മാന്‍ ഗില്ലിന്റെ വഴിയടച്ചത്. അതേസമയം പ്ലെയിംഗ് ഇലവനില്‍ സഞ്ജു സാംസണിന്റെ സ്ഥാനം ഇതോടെ ഉറപ്പിക്കപ്പെടു. ഓപ്പണിംഗ് പൊസിഷനില്‍ തന്നെയായിരിക്കും സഞ്ജു കളിക്കുക

മൂന്നാം നമ്പറില്‍ തിലക് വര്‍മ്മയും നാലാമത് സൂര്യകുമാര്‍ യാദവും ബാറ്റിംഗിനെത്തും. ഹര്‍ദിക് പാണ്ഡ്യയായിരിക്കും അഞ്ചാമത് ബാറ്റിംഗിനെത്തുക. ഇടത് - വലത് കോംബിനേഷന്‍ ബാറ്റിംഗില്‍ പരീക്ഷിക്കും എന്ന് ടീം പ്രഖ്യാപനത്തിനിടെ ചീഫ് സെലക്ടര്‍ അജിത് അഗാര്‍ക്കര്‍ വ്യക്തമാക്കി. യശ്വസി ജയ്‌സ്വാളിന്റെ കാര്യം ചര്‍ച്ചയില്‍ വന്നിരുന്നില്ലെന്നും അദ്ദേഹം പറഞ്ഞു. ന്യൂസിലാന്റിനെതിരായ ടി20 യിലും ഈ ടീം തന്നെയായിരിക്കും കളിക്കുക,

ഇന്ത്യയുടെ 15 അംഗ ടീം

സൂര്യകുമാര്‍ യാദവ് (ക്യാപ്റ്റന്‍), അഭിഷേക് ശര്‍മ്മ, സഞ്ജു സാംസണ്‍ (വിക്കറ്റ് കീപ്പര്‍), തിലക് വര്‍മ്മ, ഹാര്‍ദിക് പാണ്ഡ്യ, ശിവം ദുബെ, അക്‌സര്‍ പട്ടേല്‍, ജസ്പ്രീത് ബുംറ, റിങ്കു സിംഗ്, ഹര്‍ഷിത് റാണ, അര്‍ഷ്ദീപ് സിംഗ്, കുല്‍ദീപ് യാദവ്, വരുണ്‍ ചക്രവര്‍ത്തി, വാഷിംഗ്ടണ്‍ സുന്ദര്‍, ഇഷാന്‍ കിഷന്‍

2026 ഫെബ്രുവരിയില്‍ നടക്കുന്ന ലോകകപ്പിന് ഇന്ത്യയും ശ്രീലങ്കയും സംയുക്തമായി ആതിഥേയത്വം വഹിക്കും. ഗ്രൂപ്പ് എ യിവലാണ് ഇന്ത്യ ഉള്‍പ്പെട്ടിരിക്കുന്നത്. ഇന്ത്യയെ കൂടാതെ പാകിസ്ഥാന്‍, നെതര്‍ലാന്റ്, യുഎസ്, നമീബിയ എന്നിവരാണ് ഗ്രൂപ്പ് എയിലുള്ളത്. ഫെബ്രുവരി 7 ന് യുഎസുമായാണ് ഇന്ത്യയുടെ ആദ്യ മത്സരം. നമീബിയ (ഫെബ്രുവരി 12), പാകിസ്ഥാന്‍ (ഫെബ്രുവരി 15), നെതര്‍ലാന്റ് (ഫെബ്രുവരി 18) എന്നിവരുമായാണ് ഗ്രൂപ്പ് സ്റ്റേജില്‍ ഇന്ത്യ ഏറ്റുമുട്ടുക.

ടി 20 യിലെ നിലവിലെ ലോകചാമ്പ്യന്‍മാരാണ് ടീം ഇന്ത്യ. മാത്രമല്ല കഴിഞ്ഞ രണ്ട് വര്‍ഷമായി ഈ ഫോര്‍മാറ്റില്‍ ഇന്ത്യയുടെ സമഗ്രാധിപത്യമാണ്. 2023 ഓഗസ്റ്റ് മുതല്‍ ഇന്ത്യ ടി 20യില്‍ ഒരു പരമ്പരയോ ടൂര്‍ണമെന്റോ തോറ്റിട്ടില്ല.