Click it and Unblock the Notifications
ശ്രേയസ് 55 പന്തില് 147
മുംബൈക്കു വേണ്ടി മൂന്നാമനായി ക്രീസിലെത്തിയ ശ്രേയസ് സിക്കിം ബൗളര്മാരെ അക്ഷരാര്ഥത്തില് അമ്മാനമാടുകയായിരുന്നു. വെറും 55 പന്തില് 147 റണ്സാണ് താരം വാരിക്കൂട്ടിയത്. ബൗണ്ടറികള് (ഏഴ്) കുറവായിരുന്നെങ്കിലും സിക്സറിന്റെ കാര്യത്തില് ശ്രേയസ് ഒരു പിശുക്കും കാണിച്ചില്ല. 15 കൂറ്റന് സിക്സറുകളാണ് ശ്രേയസിന്റെ ബാറ്റില് നിന്നും പറന്നത്.
ശ്രേയസിന്റെയും സൂര്യകുമാര് യാദവിന്റെയും (63) ബാറ്റിങ് മികവില് ആദ്യം ബാറ്റ് ചെയ്ത മുംബൈ നിശ്ചിത 20 ഓവറില് നാലു വിക്കറ്റിന് 258 റണ്സാണ് വാരിക്കൂട്ടിയത്. മറുപടിയില് ഏഴു വിക്കറ്റിന് 104 റണ്സെടുക്കാനേ സിക്കിമിനായുള്ളൂ.
പന്തിന്റെ റെക്കോര്ഡ് പഴങ്കഥ
ഇന്ത്യയുടെ യുവ വിക്കറ്റ് കീപ്പറും ഐപിഎല്ലില് തന്റെ ടീമംഗവുമായ റിഷഭ് പന്തിന്റെ റെക്കോര്ഡാണ് ശ്രേയസിന്റെ ബാറ്റിങ് വിരുന്നിനു മുന്നില് വഴി മാറിയത്. ടി20യില് ഒരു ഇന്ത്യന് താരത്തിന്റെ ഏറ്റവുമുയര്ന്ന സ്കോറാണ് ശ്രേയസ് തന്റെ പേരില് കുറിച്ചത്. താരത്തിന്റെ കരിയറിലെ കന്നി ടി20 സെഞ്ച്വറിയും കൂടിയാണിത്.
ഐപിഎല്ലിന്റെ കഴിഞ്ഞ സീസണില് സണ്റൈസേഴ്സ് ഹൈദരാബാദിനെതിരേ ഡല്ഹി ഡെയര്ഡെവിള്സിനായി പന്ത് നേടിയ 128 റണ്സെന്ന റെക്കോര്ഡാണ് ശ്രേയസ് തകര്ത്തത്.
ശ്രേയസ്- യാദവ് കൂട്ടുകെട്ട്
സിക്കിമിനെതിരേ മുംബൈയുടെ തുടക്കം മോശമായിരുന്നു. ടീം സ്കോര് 22 ആയപ്പോഴേക്കും പൃഥ്വി ഷാ (10), രഹാനെ (11) എന്നിവരെ മുംബൈക്കു നഷ്ടമായിരുന്നു. എന്നാല് മൂന്നാം വിക്കറ്റില് ശ്രേയസിനൊപ്പം സൂര്യകുമാര് യാദവ് ചേര്ന്നതോടെ മുംബൈ തിരിച്ചുവരികയായിരുന്നു. 213 റണ്സാണ് മൂന്നാം വിക്കറ്റില് ഈ സഖ്യം വാരിക്കൂട്ടിയത്. ഇവരില് ശ്രേയസായിരുന്നു അപകടകാരി. സിക്കിമിന്റെ ഒരു ബൗളറെയും 24കാരന് താഴെ നിര്ത്തിയില്ല.
മിലിന്ദ് കുമാറൊഴികെ സിക്കിമിനായി പന്തെറിഞ്ഞ മറ്റ് ഏഴു ബൗളര്മാരും നന്നായി തല്ലു വാങ്ങി. താഷി പിന്റ്സോ ഒരോവറില് 35 റണ്സും ലീ യോങ് ലെപ്ച ഒരോവറില് 26 റണ്സുമാണ് വിട്ടുകൊടുത്തത്.
ഇന്ത്യയുട വിളി കാത്ത് ശ്രേയസ്
ഈ പ്രകടനത്തോടെ ദേശീയ ടീമിലേക്ക് തനിക്കു വിളി വരുമെന്ന ശുഭപ്രതീക്ഷയിലാണ് ശ്രേയസ്. ഇന്ത്യക്കു വേണ്ടി ആറ് വീതം ഏകദിനങ്ങളും ടി20 മല്സരങ്ങളും മാത്രമേ താരം കളിച്ചിട്ടുള്ളൂ. രണ്ടിലും കൂടി 300ന് അടുത്ത് റണ്സും ശ്രേയസ് നേടിയിട്ടുണ്ട്.
വരാനിരിക്കുന്ന ഐപിഎല്ലില് ഡല്ഹിക്കായും തകര്പ്പന് ബാറ്റിങ് കാഴ്ചവച്ചാല് ഇന്ത്യന് ടീമിലേക്കു തന്നെ തിരികെ വിളിക്കുമെന്ന പ്രതീക്ഷയിലാണ് ശ്രേയസ്.
Continue with Google