ടി20 ലോകകപ്പ് കളിക്കണോ?, ഇഷാന്‍ ചെയ്യേണ്ടതെന്ത്?, വിശദീകരിച്ച് ആകാശ് ചോപ്ര

ഇന്ത്യന്‍ ടീമില്‍ ഇടം പ്രതീക്ഷിക്കുന്ന താരങ്ങളിലൊരാളാണ് ഇഷാന്‍ കിഷന്‍. ഇന്ത്യയുടെ ഇടം കൈയന്‍ ഓപ്പണര്‍ക്ക് പ്ലേയിങ് 11 ഇടം കണ്ടെത്തുക പ്രയാസമാവും. കാരണം രോഹിത് ശര്‍മ, കെ എല്‍ രാഹുല്‍ എന്നിവരാവും ഇന്ത്യയുടെ മുഖ്യ ഓപ്പണര്‍മാര്‍. ഇവര്‍ക്ക് ബാക്കപ്പായി ഇഷാനെ പരിഗണിക്കുമോയെന്നതാണ് അറിയേണ്ടത്. ദക്ഷിണാഫ്രിക്കയ്‌ക്കെതിരായ ടി20 പരമ്പരയിലെ ആദ്യ മത്സരത്തില്‍ 48 പന്തില്‍ 76 റണ്‍സാണ് ഇഷാന്‍ നേടിയത്. 11 ഫോറും മൂന്ന് സിക്‌സും ഇതില്‍ ഉള്‍പ്പെടും.

ഈ പ്രകടനം ഇഷാനെ ടി20 ലോകകപ്പിനുള്ള ഇന്ത്യന്‍ ടീമിലേക്ക് എത്തിക്കുമെന്ന പ്രതീക്ഷ പലരും പങ്കുവെച്ചെങ്കിലും ഇതൊന്നും പോരെന്ന് അഭിപ്രായപ്പെട്ടിരിക്കുകയാണ് മുന്‍ ഇന്ത്യന്‍ ഓപ്പണറും കമന്റേറ്ററുമായ ആകാശ് ചോപ്ര. മലയോളം സൃഷ്ടിക്കേണ്ടിയിരിക്കുന്നുവെന്നാണ് ആകാശ് ഇഷാനെക്കുറിച്ച് പറഞ്ഞത്. 'ആദ്യ മത്സരത്തിലെ അര്‍ധ സെഞ്ച്വറി പ്രകടനംകൊണ്ട് അവനെ ടി20 ലോകകപ്പിലേക്ക് പരിഗണിക്കുമോ?. എന്റെ അഭിപ്രായത്തില്‍ ഇതൊരു തുടക്കം മാത്രമാണ്.

മികച്ച തുടക്കമാണ് എന്നാല്‍ തുടക്കം മാത്രമാണിത്. അത്രയും ദൂരത്തിലേക്കെത്താന്‍ വലിയൊരു മല തന്നെ അവന്‍ സൃഷ്ടിക്കേണ്ടതായുണ്ട്. മിടുക്കനാണവന്‍. എതിരാളികളെ ആക്രമിച്ച് ഭയപ്പെടുത്തുന്നവന്‍. പ്രതിസന്ധിയുള്ള പിച്ചുകളില്‍ അവന്‍ ബാറ്റ് ചെയ്യുന്നത് കാണാന്‍ ഇഷ്ടപ്പെടുന്നു. എന്നാല്‍ ലോകകപ്പ് ഇനിയും അകലെയാണ്'-ആകാശ് ചോപ്ര പറഞ്ഞു.

ഇഷാന്റെ പ്രതിഭയില്‍ ആര്‍ക്കും സംശയമില്ലെങ്കിലും അവന്റെ സ്ഥിരത പ്രശ്‌നമാണ്. ഏത് ബാറ്റിങ് പൊസിഷനിലും കളിക്കാന്‍ കഴിവുണ്ടെങ്കിലും സ്ഥിരത പലപ്പോഴും അദ്ദേഹത്തിന്റെ ടീമിലെ സ്ഥാനം ചോദ്യം ചെയ്യുന്നു. ഇപ്പോഴിതാ ഇഷാന്‍ എവിടെയാണ് മെച്ചപ്പെടുത്തേണ്ടതെന്നും ആകാശ് ഉപദേശിച്ചിരിക്കുകയാണ്. ' വ്യക്തിപരമായി ഒന്നും അവനോട് പറയാനില്ല. ആദ്യ മത്സരത്തില്‍ നന്നായി അവന്‍ ബാറ്റ് ചെയ്തു. അഞ്ച് മത്സര പരമ്പരയാണ്. വരുന്ന മത്സരങ്ങളിലും ഇതേ മികവ് തുടരുക. വലിയ ഇന്നിങ്‌സ് കളിക്കാനുള്ള പദ്ധതിയിടുക. സ്‌ട്രൈക്കറേറ്റില്‍ വലിയ ശ്രദ്ധ നല്‍കേണ്ട. ചില പരാജയങ്ങളുണ്ടായാലും അവന്‍ സൂപ്പര്‍ താരം തന്നെയാണ്'- ആകാശ് ചോപ്ര കൂട്ടിച്ചേര്‍ത്തു.

എന്തായാലും ഇന്ത്യ ബാക്കപ്പ് ഓപ്പണറായി മുഖ്യ പരിഗണന ഇഷാന് നല്‍കാനാണ് സാധ്യത. ഇടം കൈയന്‍ ബാറ്റ്‌സ്മാനാണെന്നതും വിക്കറ്റ് കീപ്പറാണെന്നതും അദ്ദേഹത്തിന് മുന്‍തൂക്കം നല്‍കുന്നു. സഞ്ജു സാംസണ്‍ നിലവില്‍ ഇഷാന് ഭീഷണിയല്ല. എന്നാല്‍ റുതുരാജ് ഗെയ്ക് വാദ് ഓപ്പണിങ്ങില്‍ തിളങ്ങിയാല്‍ ഇഷാനത് കടുത്ത തിരിച്ചടിയാവുമെന്നുറപ്പ്.