സച്ചിന് 98 റണ്സിന് പുറത്തായി മടങ്ങിയപ്പോള് കടുത്ത ദുഖം തോന്നി. വളരെ സ്പെഷ്യലായ ഇന്നിങ്സായിരുന്നു അന്നു അദ്ദേഹം കളിച്ചത്. സച്ചിന് സെഞ്ച്വറി നേടണമായിരുന്നു. അദ്ദേഹം സെഞ്ച്വറി തികയ്ക്കണമെന്ന് താന് ആഗ്രഹിക്കുകയും ചെയ്തിരുന്നു. താനെറിഞ്ഞ ആ ബൗണ്സറില് സച്ചിന് സിക്സര് പായിച്ച് സെഞ്ച്വറി തികയ്ക്കുമെന്നായിരുന്നു കരുതിയത്. പക്ഷെ സംഭവിച്ചത് അപ്രതീക്ഷിതമായിരുന്നു. നേരത്തേ സമാനമായ ബൗണ്സറുകളില് അദ്ദേഹം സിക്സര് നേടിയിട്ടുമുണ്ടെന്നും ഹെലോ ആപ്പിന്റെ ലൈവ് സെഷനില് അക്തര് വ്യക്തമാക്കി.
ക്രിക്കറ്റിലെ ഏറ്റവും കടുപ്പമേറിയ കാലഘട്ടത്തിലാണ് സച്ചിന് കളിച്ചത്. ഇപ്പോഴായിരുന്നു അദ്ദേഹം ക്രിക്കറ്റിലേക്കേു വന്നിരുന്നതെങ്കില് 1.30 ലക്ഷത്തിലധികം റണ്സ് തന്നെ വാരിക്കൂട്ടുമായിരുന്നു.
അതുകൊണ്ടു തന്നെയാണ് സച്ചിനെയും ആധുനിക ക്രിക്കറ്റിലെ മികച്ച ബാറ്റ്സ്മാന്മാരില് ഒരാളും ഇന്ത്യന് ക്യാപ്റ്റനുമായ വിരാട് കോലിയെയും താരതമ്യം ചെയ്യുന്നത് ശരിയല്ലെന്നു താന് ചൂണ്ടിക്കാട്ടുന്നതെന്നും അക്തര് പറഞ്ഞു. രണ്ടു പേരും തീര്ത്തും വ്യത്യസ്തമായ കാലഘട്ടത്തിലാണ് കളിച്ചതെന്നും അദ്ദേഹം കൂട്ടിച്ചേര്ത്തു.
സച്ചിന് സെഞ്ച്വറി നഷ്ടമായ, 2003ലെ ലോകകപ്പില് ഇന്ത്യക്കെതിരേ നടന്ന മല്സരമാണ് തന്റെ ക്രിക്കറ്റ് കരിയറിലെ തന്നെ ഏറ്റവും മോശം കളിയെന്നു അക്തര് വെളിപ്പെടുത്തി. വളരെ ശക്തമായ ബൗളിങ് ലൈനപ്പുണ്ടായിട്ടും 274 റണ്സ് പ്രതിരോധിച്ച് സെഞ്ചൂറിയനില് നടന്ന അന്നത്തെ കളിയില് പാകിസ്താനു ജയിക്കാനായില്ലെന്നും അദ്ദേഹം പറഞ്ഞു.
നമ്മള് 30-40 റണ്സ് കുറവാണ് നേടിയതെന്നു ഞങ്ങളുടെ ഇന്നിങ്സിനു ശേഷം ടീമംഗങ്ങളോടു താന് പറഞ്ഞിരുന്നു. എന്നാല് എത്രയാണ് ജയിക്കാവുന്ന സ്കോറെന്നു ടീമിലെ താരങ്ങള് തന്നോട് ചോദിക്കുകയും ചെയ്തു. ഇന്ത്യയെ 274 റണ്സിന് മുമ്പ് നമുക്ക് പുറത്താക്കാമെന്നാണ് അവര് പറഞ്ഞത്. പക്ഷെ പിച്ച് ബാറ്റിങിനെ തുണയ്ക്കുന്നതാണെന്ന് തനിക്കുറപ്പായിരുന്നുവെന്നും അക്തര് വിശദമാക്കി.