ഇന്ത്യ vs ദക്ഷിണാഫ്രിക്ക: രോഹിത്തിനെ പെട്ടെന്ന് തട്ടരുത്... ഇത്രയെങ്കിലും അവസരം നല്‍കണം- യുവി

തുടര്‍ച്ചയായി അവസരം നല്‍കണം

വരാനിരിക്കുന്ന പരമ്പരയില്‍ ഓപ്പണറുടെ റോളില്‍ പ്രതീക്ഷിച്ച പ്രകടനം നടത്താന്‍ കഴിയാതിരുന്നാലും രോഹിത്തിനെ മാറ്റരുതെന്ന നിര്‍ദേശമാണ് യുവിക്കുള്ളത്. തുടര്‍ച്ചയായി രോഹിത്തിന് ഓപ്പണറായി തന്നെ കളിക്കാന്‍ അവസരം നല്‍കേണ്ടതുണ്ടെന്നും അദ്ദേഹം പറഞ്ഞു.
തുടര്‍ച്ചയായി ചുരുങ്ങിയത് ആറു ടെസ്റ്റുകളിലെങ്കിലും രോഹിത്തിനെ ഓപ്പണറായി ഇറക്കണം. എന്നിട്ടും ഫോമിലെത്താന്‍ കഴിഞ്ഞില്ലെങ്കില്‍ മാത്രമേ അദ്ദേഹത്തെ മാറ്റാന്‍ പാടുള്ളൂവെന്നും യുവി വ്യക്തമാക്കി.

നേരത്തേ നല്‍കണമായിരുന്നു

കരിയറിന്റെ തുടക്കം മുതല്‍ രോഹിത് ടെസ്റ്റില്‍ ഓപ്പണറായാണ് കളിക്കേണ്ടിയിരുന്നതെന്നു യുവി അഭിപ്രായപ്പെട്ടു. ഒരു ടെസ്റ്റ് മല്‍സരത്തില്‍ രോഹിത്തിനെ കളിപ്പിക്കുന്നു. പിന്നീട് റണ്‍സെടുക്കുന്നില്ലെന്ന് ചൂണ്ടിക്കാട്ടി ടെസ്റ്റ് ടീമില്‍ നിന്നൊഴിവാക്കുന്നു. തുടര്‍ച്ചയായി 10 ടെസ്റ്റുകളിലെങ്കിലും കളിപ്പിക്കാതെ ഒരാള്‍ നന്നായി പെര്‍ഫോം ചെയ്യുന്നില്ലെന്നു എങ്ങനെ ഉറപ്പിക്കാമെന്നും യുവി ചോദിക്കുന്നു.

രാഹുലിന് ഏറെ അവസരങ്ങള്‍

ഇപ്പോള്‍ ടെസ്റ്റ് ടീമില്‍ അംഗമല്ലാത്ത ലോകേഷ് രാഹുലിന് ഇന്ത്യ ഏറെ അവസരങ്ങള്‍ നല്‍കിയതായി യുവി വ്യക്തമാക്കി. ഇനി ടെസ്റ്റില്‍ ഓപ്പണറായി രോഹിത്തിനെയാണ് ഇന്ത്യ കണ്ടു വച്ചിരിക്കുന്നതെങ്കില്‍ ധൃതി പിടിച്ച് തീരുമാനങ്ങളെുക്കരുത്. ചുരുങ്ങിയത് ആറു ടെസ്റ്റുകളിലെങ്കിലും രോഹിത്തിന് ഓപ്പണിങ് റോളില്‍ തന്റെ മികവ് പുറത്തെടുക്കാന്‍ അവസരം നല്‍കണം. ഇത്രയും ടെസ്റ്റുകളില്‍ കളിപ്പിച്ചാല്‍ 10-12 ഇന്നിങ്‌സുകളിലെങ്കിലും രോഹിത്തിന് ഓപ്പണറാവാം. എന്നിട്ടും തിളങ്ങാനായില്ലെങ്കില്‍ ടീമില്‍ നിന്നൊഴിവാക്കപ്പെട്ടാല്‍ ആരും കുറ്റം പറയില്ലെന്നും യുവി വിശദമാക്കി.