ടി20: കോലിയെയല്ല, ഇന്ത്യക്കു വേണ്ടത് ക്യാപ്റ്റന്‍ രോഹിത്തിനെ!! സംഭവിച്ചാല്‍ ടീം കസറും... കാരണങ്ങള്‍

മികച്ച റെക്കോര്‍ഡ്

ടി20യില്‍ ഇന്ത്യയെ നയിച്ച ഇതുവരെയുള്ള മല്‍സരങ്ങള്‍ നോക്കിയാല്‍ ഗംഭീര റെക്കോര്‍ഡാണ് രോഹിത്തിനുള്ളത്. ടി20യില്‍ നയിച്ച 11 മല്‍സരങ്ങളില്‍ 10ലും ടീമിനു ജയം നേടിത്തരാന്‍ ഹിറ്റ്മാന് കഴിഞ്ഞിട്ടുണ്ട്. ഇത്രയും മികച്ച റെക്കോര്‍ഡുള്ള താരം ടീമിലുള്ളപ്പോള്‍ മറ്റൊരാളെ നായകനാക്കുന്നത് ശരിയല്ലെന്ന വാദമാണ് രോഹിത് ആരാധകര്‍ ചൂണ്ടിക്കാട്ടുന്നത്.

കോലിക്ക് ഒരു കിരീടം പോലുമില്ല

രോഹിത്ത് മൂന്ന് ഐപിഎല്‍ ട്രോഫികളുമായി നേട്ടങ്ങളുടെ നെറുകയില്‍ നില്‍ക്കുമ്പോള്‍ കോലിക്ക് റോയല്‍ ചാലഞ്ചേഴ്‌സ് ബാംഗ്ലൂരിനൊപ്പം അവകാശപ്പെടാന്‍ ഒരു കിരീടം പോലുമില്ല. ചില സീസണുകളില്‍ രോഹിത്തിന്റെ മുംബൈയേക്കാള്‍ മികച്ച ടീമാണ് കോലിക്കുണ്ടായിരുന്നത്. പക്ഷെ ഈ മികവ് പലപ്പോഴും മുതലെടുക്കാന്‍ മാത്രം മൂര്‍ച്ചയുള്ള ക്യാപ്റ്റന്‍സി പുറത്തെടുക്കാന്‍ കോലിക്കു കഴിഞ്ഞിട്ടില്ലെന്നു കാണാം.

ഐപിഎല്ലിലെ നേട്ടങ്ങള്‍

ടി20യില്‍ കോലിയേക്കാള്‍ മികച്ച ക്യാപ്ന്‍ രോഹിത് തന്നെയാണെന്ന് ഐപിഎല്ലിലെ അദ്ദേഹത്തിന്റെ നേട്ടങ്ങള്‍ പരിശോധിച്ചാല്‍ ബോധ്യമാവും. മുംബൈ ഇന്ത്യന്‍സിനെ മൂന്നു തവണ ഐപിഎല്‍ കിരീടത്തിലേക്കു നയിച്ച ക്യാപ്റ്റനാണ് രോഹിത്. കൂടുതല്‍ കിരീടങ്ങള്‍ നേടിയ നായകനെന്ന റെക്കോര്‍ഡ് എംഎസ് ധോണിക്കൊപ്പം പങ്കിടുകയാണ് അദ്ദേഹം.
അതുകൊണ്ടു തന്നെ ഐപിഎല്ലില്‍ ധോണിയുമായി താരതമ്യം ചെയ്യാവുന്ന ഏക ക്യാപ്റ്റനും രോഹിത്താണ്.

കൂടുതല്‍ ടി20 മല്‍സരങ്ങള്‍

സമീപകാലത്ത് കോലിയേക്കാള്‍ കൂടുതല്‍ ഇന്ത്യക്കു വേണ്ടി ടി20 മല്‍സരങ്ങളില്‍ കളിക്കുന്നത് രോഹിത്താണ്. വലിയ പര്യടനങ്ങള്‍ക്കു മുന്നോടിയായി കോലിക്കു പലപ്പോഴും വിശ്രമം അനുവദിക്കപ്പെട്ടതിനെ തുടര്‍ന്നായിരുന്നു ഇത്. അതുകൊണ്ടു തന്നെ തുടര്‍ച്ചയായി ടി20യില്‍ ടീമിനെ നയിക്കുന്ന രോഹിത് മികച്ചൊരു ലൈനപ്പും ശൈലിയുമെല്ലാം കണ്ടെത്തിക്കഴിഞ്ഞു.
2020ലെ ടി20 ലോകകപ്പില്‍ രോഹിത്തിന് ടീമിന്റെ നായകസ്ഥാനം നല്‍കിയാല്‍ ധോണിക്കു ശേഷം ഇന്ത്യക്കു ലോകകിരീടം നേടിത്തരാന്‍ അദ്ദേഹത്തിനാവുമെന്ന് പലരും ചൂണ്ടിക്കാട്ടുന്നു.