IPL 2026: ഈ യുവതാരങ്ങളാണ് മുംബൈയുടെ കരുത്തും ഭാവിയും, എക്സ് ഫാക്ടേഴ്സ് ഇവരെന്ന് അടിവരയിട്ട് രോഹിത്

ഗുജറാത്ത് ടൈറ്റൻസിനെതിരായ മത്സരത്തിൽ തകർപ്പൻ വിജയം നേടിയതിന് പിന്നാലെ മുംബൈ ഇന്ത്യൻസ് ക്യാമ്പിൽ ആഘോഷം കൊടുമ്പിരിക്കൊള്ളുന്നു. മത്സരത്തിലെ ഹീറോകളായ തിലക് വർമ്മയെയും അശ്വനി കുമാറിനെയും വാനോളം പുകഴ്ത്തി മുൻ നായകൻ രോഹിത് ശർമ്മ രംഗത്തെത്തി. തിലകിന്റെ തകർപ്പൻ സെഞ്ചുറിയും അശ്വനി കുമാറിന്റെ നാല് വിക്കറ്റ് പ്രകടനവുമാണ് മുംബൈയുടെ വിജയത്തിൽ നിർണ്ണായകമായത്.

"തിലക് ഒരു അപൂർവ്വ പ്രതിഭ!"

തിലക് വർമ്മയുടെ ബാറ്റിംഗിനെ 'അറുതിപ്പൂരമെന്നാണ്' (Absolute Carnage) രോഹിത് വിശേഷിപ്പിച്ചത്. "തിലകിനെക്കുറിച്ച് ഞാൻ മുമ്പും പറഞ്ഞിട്ടുണ്ട്—ഇത്ര ചെറിയ പ്രായത്തിൽ അവൻ കാണിക്കുന്ന ആ പക്വതയും റൺസിനായുള്ള ദാഹവും അപൂർവ്വമാണ്. ആ ഫോം തന്റെ കന്നി ഐപിഎൽ സെഞ്ചുറിയിലേക്ക് അവൻ മാറ്റുന്നത് കാണുന്നത് തന്നെ പ്രത്യേക സന്തോഷമാണ്. തിലക് മുംബൈ ഇന്ത്യൻസിന്റെ ഭാവി നായകനാകാൻ കെൽപ്പുള്ള താരമാണെന്ന് വീണ്ടും തെളിയിച്ചിരിക്കുന്നു," രോഹിത് പറഞ്ഞു.

മുംബൈയുടെ എക്സ്-ഫാക്ടറായി അശ്വനി!

ബാറ്റിംഗിൽ തിലക് തിളങ്ങിയപ്പോൾ ബൗളിംഗിൽ ഗുജറാത്തിന്റെ നട്ടെല്ലൊടിച്ചത് അശ്വനി കുമാറായിരുന്നു. അശ്വനിയുടെ പ്രകടനത്തെക്കുറിച്ച് രോഹിത്തിന്റെ വാക്കുകൾ ഇങ്ങനെ: "അശ്വനി കുമാർ ഞങ്ങളുടെ 'എക്സ്-ഫാക്ടർ' ആണെന്ന് അവൻ വീണ്ടും തെളിയിച്ചിരിക്കുകയാണ്. ഗുജറാത്ത് പോലൊരു കരുത്തുറ്റ ടീമിനെതിരെ നാല് വിക്കറ്റ് വീഴ്ത്തുക എന്നത് അവന്റെ മനക്കരുത്തിനെയാണ് കാണിക്കുന്നത്. ഈ യുവതാരങ്ങളാണ് മുംബൈ ഇന്ത്യൻസിന്റെ കരുത്തും ഭാവിയും."

നരേന്ദ്ര മോദി സ്റ്റേഡിയത്തിൽ വച്ച് നടന്ന മുംബൈ ​ഗുജറാത്ത് പോരിനൊടുക്കം വിജയം ദൈവത്തിന്റെ പോരാളികൾക്കൊപ്പമായിരുന്നു. തിലക് വർമ്മ എന്ന ഇടിവെട്ട് താരത്തിന്റെ അതിമനോഹര പ്രകടനത്തിന്റെ ബലത്തിൽ 20 ഓവറിൽ മുംബൈ 199 എന്ന മികച്ച സ്കോർ പടുത്തുയർത്തി. എന്നാൽ, 200 റൺസ് നേടുക എന്നത് ഇന്നത്തെ കാലത്തെ ടി20 ക്രിക്കറ്റിൽ സാധാരണമായ ഒരു കാര്യം മാത്രമാണ്. അവിടെയാണ് മുംബൈയുടെ ബൗളിങ് കരുത്ത് ശക്തി കാണിച്ചത്.

ആദ്യ പന്തിൽ തന്നെ ബുംറ സായ് സുദർശനെ മടക്കി. അടുത്ത ഓവറിൽ ഹാർദിക് ജോസ് ബട്ട്ലറെയും കൂടാരം കയറ്റി. ഒന്ന് രണ്ട് ഷോട്ടുകൾ നന്നായി കളിച്ച് മുന്നോട്ട് വരാൻ ശ്രമിക്കവെ, ശുഭ്മാൻ ​ഗില്ലിനും അടിതെറ്റി. പിന്നീട് അങ്ങോട്ട് ഓരോ ജിടി ബാറ്റ്സ്മാനും മുംബൈ ബൗളിങ് നിരയ്ക്ക് മുന്നിൽ അടിയറവ് പറയുന്ന കാഴ്ചയാണ് കണ്ടത്. അശ്വനി കൂമാർ നാലും മിച്ചൽ സാന്റ്നർ, അള്ളാ ​ഗസൻഫർ രണ്ടും വിക്കറ്റുകൾ വീഴ്ത്തി. 26 റണ്ണെടുത്ത വാഷിങ്ടൺ സുന്ദറാണ് ​ഗുജറാത്തിന്റെ ടോപ് സ്കോറർ. ഈ വിജയത്തോടെ ചെന്നൈയെയും മറികടന്ന് മുംബൈ ഏഴാം സ്ഥാനത്തേക്ക് കുതിച്ചു.

ഗുജറാത്ത് ഉയർത്തിയ ബൗളിങ് വെല്ലുവിളിയെ തിലകിന്റെ സെഞ്ചുറി കരുത്തിൽ മറികടന്ന മുംബൈ, അശ്വനിയുടെ ബൗളിംഗ് മികവിലൂടെ വിജയം ഉറപ്പിക്കുകയായിരുന്നു. സീസണിന്റെ തുടക്കത്തിൽ പതറിയ മുംബൈയ്ക്ക് ഈ യുവതാരങ്ങളുടെ ഉദയം വലിയ ആത്മവിശ്വാസമാണ് നൽകുന്നത്. ഇനി വരാനിരിക്കുന്ന മത്സരത്തിൽ ചെന്നൈ സൂപ്പർ കിങ്സിനെയാണ് മുംബൈ നേരിടാൻ ഒരുങ്ങുന്നത്. ടൂർണമെന്റിൽ രണ്ട് വിജയങ്ങൾ മാത്രം കൈവശമുള്ള രണ്ട് പയനിയർ ടീമുകൾ ഒന്നിക്കുമ്പോൾ ആർക്കൊപ്പമാകും വിജയമെന്ന് കണ്ടുതന്നെ അറിയണം.