ഋഷഭ് പന്തിന്റെ റെക്കോര്ഡ്
ഓസീസ് പര്യടനത്തിനെത്തി റെക്കോര്ഡുകള് പലതും സ്വന്തമാക്കിയ താരം ഓസ്ട്രേലിയയില് ടെസ്റ്റ് സെഞ്ച്വറി നേടുന്ന ആദ്യ ഇന്ത്യന് വിക്കറ്റ് കീപ്പര് എന്ന ബഹുമതിയും സ്വന്തമാക്കി. 137 പന്തില്നിന്നും സെഞ്ച്വറി നേടിയ പന്ത് മികച്ച സ്ട്രൈക്ക് റേറ്റ് കാത്തുസൂക്ഷിക്കുകയും ചെയ്തു. 1967ല് ഫാറൂക്ക് എഞ്ചിനീര് 89 റണ്സെടുത്തതാണ് ഇതിന് മുന്പ് ഒരു ഇന്ത്യന് വിക്കറ്റ് കീപ്പറുടെ ഉയര്ന്ന സ്കോര്.
ഓസ്ട്രേലിയില് മിന്നുന്ന പ്രകടനം
സെഞ്ച്വറിയോടെ പന്ത് ഓസ്ട്രേലിയയില് കൂടുതല് റണ്സ് നേടിയ താരങ്ങളില് രണ്ടാമതെത്തുകയും ചെയ്തു. 521 റണ്സുമായി പൂജാരയാണ് പരമ്പരയിലെ ടോപ് സ്കോറര്. തൊട്ടുപിന്നിലുണ്ടായിരുന്ന വിരാട് കോലിയെ പന്ത് മറികടന്നു. കോലി ഇതുവരെയായി 282 റണ്സാണ് സ്കോര് ചെയ്തത്. പരമ്പരയില് ആക്രമണാത്മക ബാറ്റിങ് കാഴ്ചവെച്ച പന്ത് സ്ട്രൈക്ക് റേറ്റിലും മുന്നിലാണ്.
പന്തിന് മറ്റൊരു റെക്കോര്ഡും സ്വന്തം
ഇംഗ്ലണ്ടിലും ഓസ്ട്രേലിയയിലും സെഞ്ച്വറി നേടുന്ന രണ്ടാമത്തെ വിക്കറ്റ് കീപ്പര് എന്ന ബഹുമതിയും കളിയില് പന്തിന് സ്വന്തമായി. 1984ല് ജെഫ്രി ഡ്യുജന് ആണ് പന്തിന് മുന്പ് ഈ നേട്ടത്തിലെത്തിയത്. ഒരു ടെസ്റ്റ് പരമ്പരയില് 200 റണ്സെടുക്കുകയും വിക്കറ്റിന് പിന്നില് 20 ഇരകളെ കണ്ടെത്തുകയും ചെയ്ത ആദ്യ ഏഷ്യന് വിക്കറ്റ് കീപ്പര് കൂടിയായി പന്ത്.
ഒരു പരമ്പരയില് കൂടുതല് ക്യാച്ചെടുത്ത റെക്കോര്ഡ്
ഒരു ടെസ്റ്റ് പരമ്പരയില് ഏറ്റവും കൂടുതല് ക്യാച്ചെടുക്കുന്ന ഇന്ത്യന് വിക്കറ്റ് കീപ്പറെന്ന ബഹുമതിയും ഈ പരമ്പരയിലാണ് താരത്തെ തേടിയെത്തിയത്. ആദ്യ മൂന്ന് ടെസ്റ്റിനിടെ തന്നെ ഋഷഭ് 20 ക്യാച്ചുകളാണെടുത്തത്. നേരത്തെ 19 വീതം ക്യാച്ചുകളെടുത്ത സയീദ് കിര്മാനിയും നരേന് തംഹാനയുമാണ് ഈ റെക്കോര്ഡ് സ്വന്തമാക്കിയിരുന്നത്.
ലോക റെക്കോര്ഡ്
നേരത്തെ, അഡ്ലെയ്ഡില് പന്ത് ഒരു ലോക റെക്കോര്ഡിനൊപ്പമെത്തിയിരുന്നു. ഒരു ടെസ്റ്റില് ഏറ്റവും കൂടുതല് ക്യാച്ചെടുത്ത വിക്കറ്റ് കീപ്പറെന്ന റെക്കോര്ഡിനൊപ്പമാണ് പന്ത് ഇടം പിടിച്ചത്. സൗത്ത് ആഫ്രിക്കയുടെ എബി ഡി വില്ലിയേഴ്സ്, ജാക്ക് റസ്സല് എന്നിവര്ക്കൊപ്പം 11 ക്യാച്ചുകളെടുത്താണ് ഋഷഭ് ശ്രദ്ധേയനായത്.