പുതിയ കുപ്പായത്തില്‍ ദാദ കളി തുടങ്ങി... ഇതാ പുതിയ ടീം, കേരളത്തിനും അഭിമാനിക്കാം

ജയ് ഷാ (സെക്രട്ടറി)

ബിസിസിഐയുടെ പുതിയ സെക്രട്ടറിയാണ് 31 വയസ്സ് മാത്രം പ്രായമുള്ള ജയ് ഷാ. കേന്ദ്ര ആഭ്യന്തര മന്ത്രി അമിത് ഷായുടെ മകന്‍ കൂടിയാണ് അദ്ദേഹം. ഇത്തവണത്തെ ബിസിസിഐ സംഘത്തിലെ ഏറ്റവും പ്രായം കുറഞ്ഞ അംഗവും ജയ് ഷാ തന്നെയാണ്.
2009 മുതല്‍ ഗുജറാത്ത് ക്രിക്കറ്റ് അസോസിയേഷനില്‍ അദ്ദേഹമുണ്ട്. 2013 സപ്തംബറില്‍ ഗുജറാത്ത് ക്രിക്കറ്റ് അസോസിയേഷന്റെ ജോയിന്റ് സെക്രട്ടറിയായി ജയ് ഷാ തിരഞ്ഞെടുക്കപ്പെട്ടിരുന്നു.

അരുണ്‍ സിങ് ധ്രുമാല്‍ (ട്രഷറര്‍)

ജയ് ഷായെപ്പോലെ തന്നെ രാഷ്ട്രീയ കുടുംബത്തില്‍ നിന്നാണ് ബിസിസിഐയുടെ പുതിയ ട്രഷററായ അരുണ്‍ സിങ് ധ്രുമാലിന്റെയും വരവ്. മുന്‍ ബിസിസിഐ പ്രസിഡന്റും ഇപ്പോള്‍ കേന്ദ്ര ധനകാര്യ, കോര്‍പറേറ്റ് കാര്യ സഹമന്ത്രിയുമായ അനുരാഗ് താക്കൂറിന്റെ സഹോദരന്‍ കൂടിയാണ് അരുണ്‍ സിങ്. 2017ല്‍ ബിസിസിഐ പ്രസിഡന്റ് സ്ഥാനത്തു നിന്നു താക്കൂര്‍ നീക്കം ചെയ്യപ്പെടുകയായിരുന്നു. 44 കാരമായ അരുണ്‍ സിങ് 2012നും 15നും ഇടയില്‍ ഹിമാചല്‍ ക്രിക്കറ്റ് അസോസിയേഷന്റെ വൈസ് പ്രസിഡന്റായി അരുണ്‍ സിങ് പ്രവര്‍ത്തിച്ചിരുന്നു.

ജയേഷ് ജോര്‍ജ് (ജോയിന്റ് സെക്രട്ടറി)

ബിസിസിഐ ഭരണസമിതിയിലെ ഏക മലയാളി സാന്നിധ്യമാണ് കേരള ക്രിക്കറ്റ് അസോസിയേഷന്റ് പ്രസിഡന്റ് കൂടിയായിരുന്ന ജയേഷ് ജോര്‍ജ്. ജോയിന്‍് സെക്രട്ടറിയായാണ് 50 കാരനായ ജയേഷിന് നറുക്കുവീണത്.
കേരള ക്രിക്കറ്റ് അസോസിയേഷനില്‍ സെക്രട്ടറി, ജോയിന്റ് സെക്രട്ടറി, ട്രഷറര്‍ എന്നീ സ്ഥാനങ്ങളില്‍ അദ്ദേഹം നേരത്തേ പ്രവര്‍ത്തിച്ചിട്ടുണ്ട്. 2005 മുതല്‍ കെസിഎയുടെ ഭാഗമാണ് ജയേഷ്.

മഹിം വര്‍മ (വൈസ് പ്രസിഡന്റ്)

ഉത്തരാഖണ്ഡ് ക്രിക്കറ്റ് അസോസിയേഷന്റെ (സിഎയു) മുന്‍ സെക്രട്ടറിയായിരുന്ന പിസി വര്‍മയുടെ മകനാണ് ബിസിസിഐയുടെ പുതിയ പ്രസിഡന്റായി ചുമതലയേറ്റ മഹിം വര്‍മ.
കഴിഞ്ഞ 10 വര്‍ഷമായി ഉത്തരാഖണ്ഡ് ക്രിക്കറ്റ് അസോസിയേഷന്റെ ജോയിന്റ് സെക്രട്ടറിയായി പ്രവര്‍ത്തിച്ചു വരികയായിരുന്നു അദ്ദേഹം. സപ്തംബറില്‍ ബിസിസിഐയുടെ അംഗീകാരം ലഭിച്ച ശേഷം മഹിം അസോസിയേഷന്റെ സെക്രട്ടറിയുമായിരുന്നു. ഈ പദവിയിലിരിക്കെയാണ് അദ്ദേഹത്തിന് ബിസിസിഐ വൈസ് പ്രസിഡന്റായി പ്രൊമോഷന്‍ ലഭിച്ചത്.