പൃഥ്വിക്കു പിഴയ്ക്കുന്നതെവിടെ? മായങ്കിനെയും വില്ല്യംസണിനെയും കണ്ടു പഠിക്കൂ... ഉപദേശം ലക്ഷ്മണിന്റേത്

പന്ത് മൂവ് ചെയ്തു കൊണ്ടിരിക്കുന്ന പിച്ചില്‍ സ്‌ട്രെയ്റ്റ് ഷോട്ടുകള്‍ക്കായിരിക്കും പൃഥ്വി ശ്രമിക്കേണ്ടതെന്നു ലക്ഷ്മണ്‍ തന്റെ കോളത്തില്‍ കുറിച്ചു. സാഹചര്യങ്ങള്‍ കൂടി പരിഗണിച്ച് ബാറ്റ് ചെയ്യുന്നതിനൊപ്പം, തന്റെ ശൈലി മാറ്റാതിരിക്കാനും താരം ശ്രദ്ധിക്കണമെന്ന് അദ്ദേഹം ആവശ്യപ്പെടുന്നു.

ന്യൂസിലാന്‍ഡ് നായകന്‍ കെയ്ന്‍ വില്ല്യംസണിനെ കണ്ടു പഠിക്കാന്‍ പൃഥ്വി ശ്രമിക്കണമെന്നു ലക്ഷ്മണ്‍ ഉപദേശിക്കുന്നു. വില്ല്യംസണിന്റെ ബുക്കിലെ ഒരു പേജ്‌വേണമെങ്കില്‍ പൃഥ്വിക്കു എടുക്കാം. എന്തൊരു ഇന്നിങ്‌സായിരുന്നു അദ്ദേഹം ആദ്യ ടെസ്റ്റില്‍ കളിച്ചത്. ന്യൂസിലാന്‍ഡില്‍ എങ്ങനെയാണ് ടെസ്റ്റില്‍ ബാറ്റ് ചെയ്യേണ്ടതെന്നു അദ്ദേഹം കാണിച്ചു തന്നു. കണ്ണിനു തൊട്ടുതാഴെ, ശരീരത്തോടു കൂടുതല്‍ ചേര്‍ന്നാണ് വില്ല്യംസണിനു ഷോട്ടുകള്‍ കളിച്ചതെന്നും ലക്ഷ്മണ്‍ ചൂണ്ടിക്കാട്ടി.

വില്ല്യംസണിനെ മാത്രമല്ല ആദ്യ ടെസ്റ്റില്‍ തന്റെ ഓപ്പണിങ് പങ്കാളിയായ മായങ്ക് അഗര്‍വാളിനെയും പൃഥ്വിക്കു മാതൃകയാക്കാമെന്നു ലക്ഷ്മണ്‍ നിര്‍ദേശിച്ചു. മായങ്കിന്റെ പുസ്തകത്തിലെയും ഒരു പേജ് വേണമെങ്കില്‍ പൃഥ്വിക്കു എടുക്കാം. ആദ്യ ടെസ്റ്റില്‍ കളിക്കാനിറങ്ങുമ്പോള്‍ മായങ്ക് അത്ര മികച്ച ഫോമില്‍ അല്ലായിരുന്നു. എന്നാല്‍ വളരെ പക്വതയോടെ, സ്വയം അര്‍പ്പിച്ചാണ് മായങ്ക് രണ്ടിന്നിങ്‌സുകളിലും ബാറ്റ് ചെയ്തതെന്നു ലക്ഷ്മണ്‍ വിലയിരുത്തി. ആദ്യ ഇന്നിങ്‌സില്‍ 34ഉം രണ്ടാമിന്നിങ്‌സില്‍ 58ഉം റണ്‍സ് മായങ്ക് നേടിയിരുന്നു.

പരിക്കിനെ തുടര്‍ന്നു ക്രൈസ്റ്റ്ചര്‍ച്ചില്‍ ശനിയാഴ്ച മുതല്‍ ആരംഭിക്കുന്ന രണ്ടാം ടെസ്റ്റില്‍ പൃഥ്വി കളിക്കുമോയെന്ന കാര്യത്തില്‍ ഉറപ്പില്ല. കാല്‍പാദത്തിലെ പരിക്കു കാരണം താരം പരിശീലനസെഷനില്‍ നിന്നു വിട്ടുനിന്നിരുന്നു. പൃഥ്വി പിന്‍മാറുകയാണെങ്കില്‍ ശുഭ്മാന്‍ ഗില്‍ ഇന്ത്യന്‍ ടീമില്‍ എത്താനാണ് സാധ്യത. ഗില്ലിന്റെ അരങ്ങേറ്റ ടെസ്റ്റ് കൂടിയായിരിക്കും ഇത്.