എംഎസ് ധോണി (209 സിക്സര്, സിഎസ്കെ)
ചെന്നൈ സൂപ്പര് കിങ്സ് നായകനും ഇതിഹാസ താരവുമായ എംഎസ് ധോണിയാണ് ഏറ്റവുമധികം സിക്സറുകള് നേടിയ താരങ്ങളുടെ ലിസ്റ്റില് മൂന്നാമതുള്ളത്. 209 സിക്സറുകളാണ് ധോണി പറത്തിയത്. ആദ്യ മൂന്നിലെ ഏക ഇന്ത്യന് താരവും ഐപിഎല് കിരീടം നേടാന് ഭാഗ്യമുണ്ടായ ടോപ്പ് ത്രീയിലെ ഏക താരവും കൂടിയാണ് ധോണി. സിഎസ്കെയെ മൂന്നു തവണയാണ് അദ്ദേഹം കിരീടത്തിലേക്കു നയിച്ചിട്ടുള്ളത്.
സിഎസ്കെയെ കൂടാതെ റൈസിങ് പൂനെ ജയന്റ്സിനു ടീമിനു വേണ്ടിയും ധോണി ഐപിഎല്ലില് കളിച്ചിട്ടുണ്ട്. 190 മല്സരങ്ങളില് നിന്നാണ് അദ്ദേഹം 209 സിക്സറുകള് അടിച്ചിട്ടുള്ളത്. ടൂര്ണമെന്റില് ഒന്നിലേറേ സീസണുകളില് ധോണി 20ന് മുകളില് സിക്സറുകള് നേടിയിട്ടുണ്ട്. 2018ല് 30 സിക്സറുകളാണ് അദ്ദേഹം വാരിക്കൂട്ടിയത്. ഈ സീസണില് സിഎസ്കെ ചാംപ്യന്മാരാവുകയും ചെയ്തിരുന്നു. 2013 മുതല് ഓരോ സീസണിലും ചുരുങ്ങിയത് 15 സിക്സറുകളെങ്കിലും ധോണി നേടിയിരുന്നു..
എബി ഡിവില്ലിയേഴ്സ് (212 സിക്സര്, ആര്സിബി)
റോയല് ചാലഞ്ചേഴ്സ് ബാംഗ്ലൂരിന്റെ ദക്ഷിണാഫ്രിക്കന് സൂപ്പര് താരം എബി ഡിവില്ലിയേഴ്സിനാണ് സിക്സര് വേട്ടയില് രണ്ടാംസ്ഥാനം. 212 സിക്സറുകളാണ് അദ്ദേഹത്തിന്റെ പേരിലുള്ളത്. 142 ഇന്നിങ്സുകളാണ് എബിഡി 200ന് മുകളില് സിക്സറുകളടിച്ചത്. ധോണിയെപ്പോലെ തന്നെ അദ്ദേഹവും ഐപിഎല്ലില് രണ്ടു ഫ്രാഞ്ചൈസികള്ക്കു മാത്രമേ കളിച്ചിട്ടുള്ളൂ. ആര്സിബിയിലെത്തും മുമ്പ് ഡല്ഹി ക്യാപ്പിറ്റല്സ് (പഴയ ഡല്ഹി ഡെയര്ഡെവിള്സ്) ടീമിന്റെ ഭാഗമായിരുന്നു എബിഡി.
2016 സീസണിലാണ് എബിഡി ഏറ്റവും മികച്ച പ്രകടനം നടത്തിയിട്ടുള്ളത്. ആര്സിബിക്കായി 16 മല്സരങ്ങളില് നിന്നും 37 സിക്സറുകളടക്കം 687 റണ്സ് അദ്ദേഹം നേടിയിരുന്നു. ആദ്യത്തെ മൂന്നു സീസണുകള് മാറ്റി നിര്ത്തിയാല് പിന്നീടുള്ള എല്ലാ സീസണുകളിലും ചുരുങ്ങിയത് 14 സികറുകളെങ്കിലും നേടാന് എബിഡിക്കായിട്ടുണ്ട്.
ക്രിസ് ഗെയ്ല് (326 സിക്സര്, കിങ്സ് ഇലവന് പഞ്ചാബ്)
വെസ്റ്റ് ഇന്ഡീസ് ബാറ്റിങ് ഇതിഹാസം ക്രിസ് ഗെയ്ലാണ് ഐപിഎല്ലിലെ സിക്സര് കിങ്. നിലവില് കിങ്സ് ഇലവന് പഞ്ചാബ് ടീമിന്റെ ഭാഗമായ യൂനിവേഴ്സല് ബോസ് വാരിക്കൂട്ടിയത് 326 സിക്സറുകളാണ്. പഞ്ചാബിനെക്കൂടാതെ കൊല്ക്കത്ത നൈറ്റ്റൈഡേഴ്സ്, റോയല് ചാലഞ്ചേഴ്സ് ബാംഗ്ലൂര് ടീമുകള്ക്കു വേണ്ടിയും ഗെയ്ല് ഐപിഎല്ലില് ബാറ്റേന്തി.
ഐപിഎല്ലില് ഒന്നിലേറെ സീസണുകളില് 50ന് മുകളില് സിക്സറുകള് ഗെയ്ല് നേടിയിട്ടുണ്ട്. 2012ലെ ഐപിഎല്ലില് 59ഉം 13ല് 51ഉം സിക്സറുകളാണ് താരം പറത്തിയത്. കഴിഞ്ഞ സീസണില് പഞ്ചാബിനായി 34 സിക്സറുകള് ഗെയ്ല് നേടി. ഇതോടെ 300 സിക്സറുകളെന്ന നാഴികക്കല്ലും അദ്ദേഹം പിന്നിട്ടിരുന്നു.