പാക് ക്രിക്കറ്റ് ടീമിന് ഇത്രയും ഗതികേടോ? മത്സരം സംപ്രേഷണം ചെയ്യാന്‍ ആരുമില്ല! പ്രതിസന്ധി

കറാച്ചി: പാകിസ്താന്‍ ക്രിക്കറ്റ് ബോര്‍ഡ് വലിയ പ്രതിസന്ധിയിലൂടെയാണ് കടന്ന് പോകുന്നത്. സൂപ്പര്‍ ടീമാണെന്ന് പറയുമ്പോഴും സമീപകാല പ്രകടനങ്ങളെല്ലാം മോശമാണ്. അവസാന ഐസിസി ടൂര്‍ണമെന്റുകളിലെല്ലാം നാണംകെട്ട പ്രകടനമാണ് പാകിസ്താന്‍ കാഴ്ചവെച്ചത്. ടീമിനുള്ളിലെ ആഭ്യന്തര കലഹവും സമീപകാലത്ത് പാകിസ്താന്‍ ടീമിന് വലിയ തലവേദനയായിട്ടുണ്ട്. നിലവില്‍ ബംഗ്ലാദേശിനെതിരേ പരമ്പര കളിക്കുകയാണ് പാകിസ്താന്‍.

ഇനി ഇംഗ്ലണ്ടിനെതിരായ പരമ്പരയാണ് പാകിസ്താനെ കാത്തിരിക്കുന്നത്. ഇപ്പോഴിതാ പാകിസ്താന്‍ ടീമിന് മുന്നില്‍ വലിയൊരു പ്രതിസന്ധി ഉടലെടുത്തിരിക്കുകയാണ്. പാകിസ്താന്‍ ക്രിക്കറ്റ് ടീമിന്റെ മത്സരം സംപ്രേഷണം ചെയ്യാന്‍ വിതരണക്കാര്‍ തയ്യാറാവാത്തതാണ് പ്രതിസന്ധിക്ക് കാരണം. പാകിസ്താന്‍ ക്രിക്കറ്റ് ബോര്‍ഡിന്റെ മത്സരം സംപ്രേഷണം ചെയ്യാന്‍ ആരും തയ്യാറാകുന്നില്ലെന്നും പരമ്പര ഒക്ടോബറില്‍ ആരംഭിക്കാനിരിക്കെ പാക് ടീം പ്രതിസന്ധിയിലാണെന്നുമാണ് റിപ്പോര്‍ട്ട്.

ഇംഗ്ലണ്ടിലാണ് പരമ്പര നടക്കുന്നത്. ഏതെങ്കിലും ബ്രോഡ്കാസ്‌റ്റേഴ്‌സിനെ കണ്ടെത്താമെന്ന പ്രതീക്ഷയിലാണ് പാകിസ്താന്‍ ക്രിക്കറ്റ് ബോര്‍ഡ്. എന്നാല്‍ ഇംഗ്ലണ്ടിലെ ആരാധകര്‍ പാകിസ്താന്റെ മത്സരം കാണാന്‍ വലിയ താല്‍പര്യം കാട്ടിയേക്കില്ല. അതുകൊണ്ടുതന്നെ പ്രമുഖ ചാനലുകളെല്ലാം പാകിസ്താന്‍ ക്രിക്കറ്റ് ടീമിനെ തള്ളിക്കളഞ്ഞിരിക്കുകയാണെന്ന് പറയാം. എന്തായാലും പാകിസ്താന്‍ ക്രിക്കറ്റ് ടീമിന് മുന്നില്‍ വലിയ വെല്ലുവിളിയാണുള്ളത്.

പാകിസ്താന്‍ ടീമിനുള്ളിലെ പ്രശ്‌നങ്ങള്‍ ടീമിന്റെ പ്രകടനത്തെ പിന്നോട്ടടിക്കുകയാണ്. സമീപകാലത്തെ ഐസിസി ടൂര്‍ണമെന്റുകളിലെല്ലാം ടീം നിരാശപ്പെടുത്തി. ബാബര്‍ അസമിന് കീഴില്‍ അവസാന ടി20 ലോകകപ്പ് കളിച്ച പാകിസ്താന്‍ അരങ്ങേറ്റക്കാരായ അമേരിക്കയോട് പോലും തോറ്റു. ടീം തിരഞ്ഞെടുപ്പിലടക്കം പിഴവ് സംഭവിച്ചുവെന്ന വിമര്‍ശനം പല ഭാഗത്ത് നിന്നും ഉയര്‍ന്നു. മികച്ച താരനിരയുണ്ടായിട്ടും മികച്ച പ്രകടനത്തിലേക്കെത്താന്‍ പാകിസ്താന് സാധിക്കാതെ പോകുന്നു.

പാകിസ്താന് മുന്നിലുള്ള വലിയ വെല്ലുവിളി വരാനിരിക്കുന്ന ചാമ്പ്യന്‍സ് ട്രോഫിയാണ്. പാകിസ്താനാണ് ചാമ്പ്യന്‍സ് ട്രോഫിക്ക് ആതിഥേയരാവാന്‍ പോകുന്നത്. കപ്പിലേക്കെത്താന്‍ സാധിച്ചാല്‍ പഴയ പ്രധാപത്തിലേക്ക് പാകിസ്താന് തിരിച്ചെത്താനാവും. അല്ലാത്ത പക്ഷം വലിയ തിരിച്ചടി ടീമിന് നേരിടേണ്ടി വരും. എന്നാല്‍ പാകിസ്താനിലെ സ്റ്റേഡിയങ്ങളുടെ അറ്റകുറ്റ പണികള്‍ വലിയ പ്രതിസന്ധിയിലാണെന്നാണ് വിവരം. പ്രധാനപ്പെട്ട രണ്ട സ്റ്റേഡിയങ്ങളിലും ഇപ്പോഴും പണികള്‍ ബാക്കിയാണ്.

പാകിസ്താനില്‍ മത്സരംവെച്ചാല്‍ ഇന്ത്യ കളിക്കില്ലെന്നാണ് ബിസിസി ഐയുടെ നിലപാട്. എന്നാല്‍ പാകിസ്താനിലേ മത്സരം നടത്തൂവെന്നാണ് പിസിബി പറയുന്നത്. അതുകൊണ്ടുതന്നെ വലിയ പ്രതിസന്ധിയാണ് പിസിബിക്ക് മുന്നിലുള്ളത്. കാരണം ഇന്ത്യ കളിക്കാതിരുന്നാല്‍ പാകിസ്താനെയത് സാമ്പത്തികമായി തളര്‍ത്തും. വലിയ സാമ്പത്തിക നഷ്ടം ഇതുമൂലം പാകിസ്താനുണ്ടാവും. ഇന്ത്യ ചാമ്പ്യന്‍സ് ട്രോഫി കളിക്കാതിരുന്നാല്‍ പ്രധാനപ്പെട്ട ചാനലുകളൊന്നും തത്സമയ സംപ്രേഷണം ഏറ്റെടുക്കില്ല.

കൂടാതെ പരസ്യത്തിലും സ്‌പോണ്‍സര്‍മാരിലും വലിയ കുറവുണ്ടാകും. അതുകൊണ്ടൊക്കെ തന്നെ എന്ത് വിലകൊടുത്തും ഇന്ത്യയെ പങ്കെടുപ്പിക്കേണ്ടത് പാകിസ്താന്റെ ആവശ്യമാണ്. ഇന്ത്യന്‍ ടീം ആവശ്യപ്പെടുന്നത് പ്രകാരം ശ്രീലങ്കയിലോ ദുബായിലോ ചാമ്പ്യന്‍സ് ട്രോഫി നടത്തണം. എന്നാല്‍ ഇതിന് പാകിസ്താന്‍ ക്രിക്കറ്റ് ബോര്‍ഡ് തയ്യാറല്ല. അതുകൊണ്ടുതന്നെ തര്‍ക്കം ഐസിസിയിലേക്ക് വരെ എത്തിയിട്ടുണ്ട്. എന്നാല്‍ അന്തിമ തീരുമാനത്തിലേക്കെത്തിയിട്ടില്ല.

പാകിസ്താന്‍ ടീമിന്റെ പ്രധാന പ്രശ്‌നം ടീമിനുള്ളിലെ ഒത്തൊരുമ ഇല്ലായ്മയാണ്. ബാബര്‍ അസമിന് കീഴില്‍ കളിക്കാന്‍ പാകിസ്താന്‍ താരങ്ങള്‍ക്ക് താല്‍പര്യമില്ല. ഷഹീന്‍ ഷാ അഫ്രീദി പാകിസ്താന്‍ പരിശീലകനായ ഗാരി കേഴ്സ്റ്റനെ ബഹുമാനിക്കാതിരിക്കുകയും ദേഷ്യപ്പെടുകയും ചെയ്തതടക്കമുള്ള കാര്യം കേഴ്സ്റ്റന്‍ തന്നെ വെളിപ്പെടുത്തിയിരുന്നു.

പാകിസ്താന്‍ ടീമിനെ ഒത്തിണക്കത്തിലേക്കെത്തിക്കുകയും മികച്ച ടീം കരുത്തിലേക്കെത്തിക്കുകയും ചെയ്താല്‍ ഏത് വമ്പന്മാരേയും വീഴ്ത്താനുള്ള കഴിവ് പാക് ടീമിനുണ്ടെന്ന് പറയാം. എന്തായാലും നിലവിലെ ടീമിന്റെ അവസ്ഥ ആരാധകര്‍ക്ക് നിരാശയുണ്ടാക്കുന്നതാണ്.