ആറു വിക്കറ്റുമായി തിരിച്ചുവരവ്... ക്രെഡിറ്റ് അവനു തന്നെ, ടീമംഗത്തെ പുകഴ്ത്തി ഉമേഷ്

സാഹയ്ക്കും ക്രെഡിറ്റ്

വിക്കറ്റ് കീപ്പര്‍ വൃധിമാന്‍ സാഹയ്ക്കു കൂടി തന്റെ നേട്ടത്തില്‍ പങ്കുണ്ടെന്ന് ഉമേഷ് പറഞ്ഞു. കളിയില്‍ നേടിയ വിക്കറ്റുകള്‍ക്കു താന്‍ സാഹയ്ക്കു ട്രീറ്റ് നല്‍കേണ്ടി വരും.
ലെഗ് സൈഡിലൂടെ ലഭിച്ച വിക്കറ്റിനും ആദ്യ ക്യാച്ചിനും തന്നേക്കാള്‍ അവകാശി സാഹയാണ്. ആ രണ്ടു വിക്കറ്റുകളും താന്‍ വൃധി ഭായിക്കു നല്‍കുന്നതായും മല്‍സരശേഷം ഉമേഷ് കൂട്ടിച്ചേര്‍ത്തു. ലെഗ് സൈഡിലേക്കാണ് ബൗള്‍ ചെയ്തതെങ്കില്‍ അതു ബൗണ്ടറിയാവുമെന്നാണ് നാം കരുതുക. എന്നാല്‍ ക്യാച്ചിനു നേരിയ ഒരവസരമുണ്ടെങ്കില്‍ അത് സാഹ പിടികൂടിയിരിക്കുമെന്നും ഉമേഷ് വ്യക്തമാക്കി.

മല്‍സരം കടുപ്പം

മികച്ച ഫാസ്റ്റര്‍ ബൗളര്‍മാര്‍ ഇപ്പോള്‍ ഇന്ത്യക്കുള്ളതിനാല്‍ ടീമിന്‍ കയറിപ്പറ്റുക കടുപ്പമാണെന്നു ഉമേഷ് സമ്മതിക്കുന്നു. നിലവില്‍ ടീമിലെ സ്ഥാനത്തിനായി വാശിയേറിയ മല്‍സരമാണ് നടക്കുന്നത്. അതുകൊണ്ടു തന്നെ ആരു തന്നെ ടീമിലെത്തിയാലും നന്നായി പെര്‍ഫോം ചെയ്‌തേ തീരൂ. അവസരം ലഭിക്കുകയാണെങ്കില്‍ മികച്ച പ്രകടനം നടത്തേണ്ടത് തനിക്കു വളരെ പ്രധാനം തന്നെയായിരുന്നു. ഇന്ത്യ മികച്ച ജയങ്ങള്‍ തുടര്‍ക്കഥയാക്കി കൊണ്ടിരിക്കുന്നതിനാല്‍ ലഭിക്കുന്ന അവസരം മുതലെടുത്തേ തീരൂവെന്നും ഉമേഷ് കൂട്ടിച്ചേര്‍ത്തു.

ആത്മവിശ്വാസമുണ്ടായിരുന്നു

പൂനെ ടെസ്റ്റിനുള്ള ടീമില്‍ ഇടം ലഭിച്ചപ്പോള്‍ മികച്ച പ്രകടനം പുറത്തെടുക്കാന്‍ കഴിയുമെന്നു തനിക്കു ആത്മവിശ്വാസം ഉണ്ടായിരുന്നതായി ഉമേഷ് പറഞ്ഞു. തികഞ്ഞ ആത്മവിശ്വാസത്തോടെ തന്നെയാണ് ഈ കളിയില്‍ ഇറങ്ങിയത്. കാരണം, ഇവിടെ അവസാനമായി ഇന്ത്യക്കു വേണ്ടി ടെസ്റ്റ് കളിച്ചപ്പോള്‍ തനിക്കു 10 വിക്കറ്റുകള്‍ ലഭിച്ചിരുന്നു. ആത്മവിശ്വാസം കുറവായിരുന്നെങ്കില്‍ ഇത്തവണ തനിക്കു നന്നായി പെര്‍ഫോം ചെയ്യാന്‍ കഴിയുമായിരുന്നില്ലെന്നും ഉമേഷ് വ്യക്തമാക്കി.