Click it and Unblock the Notifications
ബിസിസി ഐയുടെ മുതിര്ന്ന വൃത്തങ്ങളെ ഉദ്ധരിച്ച് പിടിഐയാണ് ഇത് സംബന്ധിച്ച റിപ്പോര്ട്ട് പുറത്തുവിട്ടത്. വിജയ് ഹസാരെ ട്രോഫിയില് ഇരുവരും മികച്ച പ്രകടനം നടത്തിയെങ്കിലും അവസരത്തിനായി കാത്തിരിക്കണമെന്നും ഇംഗ്ലണ്ട് പരമ്പരയിലേക്ക് പരിഗണിക്കില്ലെന്നും മുതിര്ന്ന വൃത്തം വ്യക്തമാക്കിയെന്നാണ് പിടിഐ റിപ്പോര്ട്ട് ചെയ്തത്.
ഇരുവരും ഓപ്പണര്മാരാണ്. പൃത്ഥ്വി ഷാ സെമി ഫൈനല് വരെ 7 മത്സരത്തില് നിന്ന് 754 റണ്സാണ് നേടിയത്. മുംബൈ ഫൈനലിലേക്ക് യോഗ്യത നേടിയതില് നിര്ണ്ണായക പങ്കാണ് പൃത്ഥ്വിക്കുള്ളത്. ദേവ്ദത്ത് 7 മത്സരത്തില് നിന്ന് നേടിയത് 737 റണ്സാണ്. ഇരുവരും നാല് സെഞ്ച്വറി വീതം നേടിയിട്ടുമുണ്ട്. എന്നാല് നിലവിലെ സാഹചര്യത്തില് അവസരം കാത്ത് നിരവധി താരങ്ങള് പുറത്തുള്ളതിനാലാണ് ഇരുവര്ക്കും അവസരം നിഷേധിക്കപ്പെടുന്നത്.
ഓപ്പണിങ്ങില് കെ എല് രാഹുല്, രോഹിത് ശര്മ, ശിഖര് ധവാന്, മായങ്ക് അഗര്വാള്,ശുഭ്മാന് ഗില് തുടങ്ങിയവരെല്ലാം അവസരം തേടുന്നവരാണ്. അതിനാല് ഓപ്പണര്മാരായ ദേവ്ദത്തും പൃത്ഥ്വിയും ടീമിലേക്കെത്താന് സാധ്യത വളരെ കുറവാണ്. നേരത്തെ ഇന്ത്യയുടെ സീനിയര് താരങ്ങള്ക്ക് ഏകദിന പരമ്പരയില് വിശ്രമം നല്കിയേക്കുമെന്ന തരത്തില് റിപ്പോര്ട്ടുകളുണ്ടായിരുന്നു. എന്നാല് പുതിയ റിപ്പോര്ട്ട് പ്രകാരം കോലിയും രോഹിതും ഏകദിന പരമ്പരയും കളിക്കുമെന്നാണ് വിവരം.
ഈ വര്ഷം ഒക്ടോബറിലും നവംബറിലുമായി ടി20 ലോകകപ്പ് ഇന്ത്യയില് നടക്കാനുണ്ട്. അതിനാല് ഈ വരുന്ന ഐപിഎല്ലില് തിളങ്ങിയാല് ദേവ്ദത്തിനും പൃത്ഥ്വിക്കും ടീമിലേക്ക് വിളിയെത്താന് സാധ്യതയുണ്ട്. എന്നാല് താരസമ്പന്നമായ ഇന്ത്യയുടെ പ്ലേയിങ് ഇലവനില് കയറിപ്പറ്റുക ഇരുവര്ക്കും പ്രയാസമാവും. രോഹിതും രാഹുലും തന്നെയാവും ടി20 ലോകകപ്പിലും ഇന്ത്യക്കായി ഓപ്പണ് ചെയ്യാന് സാധ്യത.
വിജയ് ഹസാരെ ട്രോഫി ഫൈനല് പുരോഗമിക്കുകയാണ്. ആദ്യം ബാറ്റ് ചെയ്ത ഉത്തര് പ്രദേശ് 313 എന്ന വമ്പന് വിജയലക്ഷ്യം മുംബൈക്ക് മുന്നില് ഉയര്ത്തിയിട്ടുണ്ട്. ഒടുവില് വിവരം ലഭിക്കുമ്പോള് മറുപടിക്കിറങ്ങിയ മുംബൈ 13.4 ഓവറില് ഒരു വിക്കറ്റ് നഷ്ടത്തില് 124 റണ്സെടുത്തിട്ടുണ്ട്. 39 പന്തില് 10 ഫോറും നാല് സിക്സുമടക്കം 73 റണ്സ് നേടിയ ക്യാപ്റ്റന് പൃത്ഥ്വി ഷായുടെ വിക്കറ്റാണ് മുംബൈക്ക് നഷ്ടമായത്.
Continue with Google