T20 World Cup: 'ഹര്‍ഷല്‍ പട്ടേല്‍ വേണ്ട', ഇന്ത്യയുടെ ബൗളിങ് നിരയെ നിര്‍ദേശിച്ച് ആകാശ് ചോപ്ര

പേസ് നിരയില്‍ ഹര്‍ഷല്‍ പട്ടേലിനെ ഒഴിവാക്കിയാണ് ആകാശ് ബൗളിങ് നിരയെ നിര്‍ദേശിച്ചിരിക്കുന്നത്. 'ഹര്‍ഷല്‍ പട്ടേലിനെ ഞാന്‍ ടീമിലേക്ക് പരിഗണിക്കുന്നില്ല. കാരണം അവന്‍ ക്ലിക്കാവുമെന്ന് ഞാന്‍ കരുതുന്നില്ല. ഞാന്‍ ഹര്‍ഷലിന് എതിരാണോയെന്ന് നിങ്ങള്‍ ചിന്തിക്കുന്നുണ്ടാവും. എന്നാല്‍ ഞാന്‍ അവന് എതിരല്ല. എന്നാല്‍ ഓസീസ് പിച്ചിന്റെ സാഹചര്യത്തിന് അവന്‍ യോജിച്ചതല്ല.

ബുംറക്കൊപ്പം ഡെത്ത് ഓവറില്‍ അവന്‍ മതിയാകുമെന്ന് കരുതുന്നില്ല. പേസ് ബൗളര്‍മാരില്‍ ബുംറ ഒഴിച്ചുകൂടാനാവാത്ത താരമാണ്. ഭുവനേശ്വര്‍ കുമാര്‍-ദീപക് ചഹാര്‍ എന്നിവരാണ് പിന്നീടുള്ളത്. ഇവരില്‍ ദീപക്കിന് ഞാന്‍ മുന്‍തൂക്കം നല്‍കും. ഭുവി നിലവിലെ സാഹചര്യത്തില്‍ നന്നായി പന്തെറിയുന്നുണ്ട്. എന്നാല്‍ ടൂര്‍ണമെന്റിന് ഇനിയും എട്ട് മാസത്തോളം ബാക്കിയുണ്ട്. അതുകൊണ്ട് തന്നെ ഇവരിലൊരാള്‍ക്ക് പുറത്തുപോകേണ്ടി വരും. പ്രസിദ്ധ് കൃഷ്ണ, മുഹമ്മദ് സിറാജ്, ആവേഷ് ഖാന്‍ തുടരേണ്ടതായുണ്ട്. കാരണം മികച്ച പേസും ബൗണ്‍സും ഓസ്‌ട്രേലിയയില്‍ ആവിശ്യമാണ്. ഇവര്‍ക്ക് അതിന് കഴിവുണ്ട്. ഈ മൂന്ന് പേരില്‍ രണ്ട് പേരെ മാത്രം പരിഗണിച്ചാലും അത്ഭുതപ്പെടില്ല'- ആകാശ് ചോപ്ര പറഞ്ഞു.

സീനിയര്‍ പേസര്‍ മുഹമ്മദ് ഷമി 2021ലെ ടി20 ലോകകപ്പില്‍ ഇന്ത്യന്‍ ടീമിലുണ്ടായിരുന്നു. എന്നാല്‍ മികച്ച പ്രകടനമല്ല കാഴ്ചവെച്ചത്. എന്നാല്‍ ഓസ്‌ട്രേലിയയിലേക്ക് വരുമ്പോള്‍ ബൗണ്‍സ് പിച്ചില്‍ ഷമിക്ക് തിളങ്ങാനായേക്കും. അതുകൊണ്ട് തന്നെ ഷമിയെ പൂര്‍ണ്ണമായും ഇന്ത്യക്ക് തള്ളിക്കളയാനാവില്ലെന്നാണ് ആകാശ് പറയുന്നത്.

'മുഹമ്മദ് ഷമി, ടി നടരാജന്‍, ഖലീല്‍ അഹമ്മദ്. ഈ മൂന്ന് പേരെയും പരിഗണിക്കാവുന്നതാണ്. ഇടം കൈയന്‍ പേസര്‍മാര്‍ ടീമിന്റെ എക്‌സ് ഫാക്ടറാണ്. എന്നാല്‍ മുഹമ്മദ് ഷമിയെ പൂര്‍ണ്ണമായും തള്ളിക്കളയാനാവില്ല. ശര്‍ദുല്‍ ഠാക്കൂറിന്റെ കാര്യമാണ് സംശയം. കാരണം ശര്‍ദുലും ദീപക്കും ഒരേ ഗുണങ്ങളുള്ള താരങ്ങളാണ്. ശര്‍ദുല്‍ മധ്യ ഓവര്‍ ബൗളറാണ്. പവര്‍പ്ലേയിലും ഡെത്ത് ഓവറിലും അധികം ആശ്രയിക്കാനാവില്ല. ദീപക് ന്യൂബോളില്‍ വിക്കറ്റ് വീഴ്ത്താന്‍ മിടുക്കനാണ്. ഇവരെക്കാള്‍ ഡെത്ത് ഓവറില്‍ കേമന്‍ ഭുവിയാണ്'- ആകാശ് പറഞ്ഞു.

സ്പിന്‍ നിരയില്‍ ഇന്ത്യക്ക് ആശങ്കകളുണ്ട്. 2021ലെ ലോകകപ്പില്‍ തഴയപ്പെട്ട യുസ് വേന്ദ്ര ചഹാല്‍ ഇത്തവണ ടീമിലുണ്ടാവുമെന്ന് ഏറെക്കുറെ ഉറപ്പാണ്. മറ്റുള്ളവര്‍ ആരൊക്കെയെന്നത് കണ്ടറിയണം. 'ചഹാലിനെ അവസാന ലോകകപ്പില്‍ ഇന്ത്യ പരിഗണിച്ചില്ല. എന്നാല്‍ ഇത്തവണ ഇന്ത്യക്ക് പരിഗണിക്കാവുന്ന രണ്ട് പേര്‍ ചഹാലും രവീന്ദ്ര ജഡേജയുമാണ്'- ആകാശ് കൂട്ടിച്ചേര്‍ത്തു. മോശം ഫോമിലുള്ള കുല്‍ദീപ് യാദവിനെ ഇന്ത്യ പരിഗണിച്ചേക്കില്ല. എന്നാല്‍ രവി ബിഷ്‌നോയ്, വാഷിങ്ടണ്‍ സുന്ദര്‍ എന്നിവരെ ഇന്ത്യക്ക് പരിഗണിക്കാവുന്നതാണ്.