ഇന്ത്യ-ന്യൂസിലാന്‍ഡ്: കോലി സൂക്ഷിച്ചോ... നോട്ടമിട്ടത് സാക്ഷാല്‍ ബോള്‍ട്ട്, പറഞ്ഞത് ഇങ്ങനെ

കോലിയുടെ വിക്കറ്റ്

ആധുനിക ക്രിക്കറ്റിലെ ഏറ്റവും മികച്ച ബാറ്റ്‌സ്മാന്‍മാരിലൊരാളും ഇന്ത്യന്‍ നായകനുമായ വിരാട് കോലിയുടെ വിക്കറ്റാണ് ടെസ്റ്റ് പരമ്പരയില്‍ താന്‍ ലക്ഷ്യമിടുന്നതെന്നു വെളിപ്പെടുത്തിയിരിക്കുകയാണ് ബോള്‍ട്ട്. കോലിക്കെതിരേ പന്തെറിയാന്‍ പോവുന്നതിന്റെ ത്രില്ലിലാണ്.
കോലിയെപ്പോലെ കേമന്‍മാരായ താരങ്ങളുടെ വിക്കറ്റെടുക്കാനാണ് താന്‍ ഇഷ്ടപ്പെടുന്നത്. വലിയ ആവേശത്തോടെയാണ് ടെസ്റ്റ് പരമ്പരയെ കാത്തിരിക്കുന്നത്. അസാധാരണ മികവുള്ള ബാറ്റ്‌സ്മാനാണ് കോലി. അദ്ദേഹം എത്ര മഹാനായ കളിക്കാരനാണെന്നു എല്ലാവര്‍ക്കുമറിയാമെന്നും ബോള്‍ട്ട് കൂട്ടിച്ചേര്‍ത്തു.

ബൗളിങ് പിച്ച്

ആദ്യ ടെസ്റ്റ് നടക്കുന്ന വെല്ലിങ്ടണിലെ പിച്ച് ബൗളര്‍മാരെ തുണയ്ക്കുന്നതായതിനാല്‍ വലിയ പ്രതീക്ഷയിലാണ് ബോള്‍ട്ട്. സാഹചര്യങ്ങളെ കുറിച്ച് നന്നായറിയാവുന്ന അദ്ദേഹം തന്റെ മികവ് പുറത്തെടുത്താല്‍ ഇന്ത്യന്‍ ബാറ്റിങ് നിരയ്ക്കു പിടിച്ചുനില്‍ക്കുക ദുഷ്‌കരമാവുമെന്നുറപ്പാണ്.
ബോള്‍ട്ടിനെ എങ്ങനെ നേരിടുന്നുവെന്നതിനെ ആശ്രയിച്ചിരിക്കും പരമ്പരയില്‍ ഇന്ത്യയുടെ വിജയസാധ്യതകളെന്ന കാര്യത്തില്‍ സംശയമില്ല.

ഇവിടെ കളിക്കാന്‍ ഇഷ്ടം

വെല്ലിങ്ടണില്‍ കളിക്കാന്‍ താന്‍ ഏറെ ഇഷ്ടപ്പെടുന്നതായി ബോള്‍ട്ട് പറയുന്നു. മികച്ച വിക്കറ്റാണ് ഇവിടുത്തേത്. ടെസ്റ്റിലാണെങ്കില്‍ അഞ്ചു ദിവസം ബൗളര്‍മാര്‍ക്ക് പിച്ചില്‍ നിന്നു ആനുകൂല്യം ലഭിക്കും. അതുകൊണ്ടു തന്നെ ആവേശകരമായ ആഴ്ചകളാണ് ഇനി വരാനിരിക്കുന്നത്. എത്രയും വേഗത്തില്‍ ടെസ്റ്റ് ആരംഭിക്കാന്‍ വേണ്ടിയാണ് കാത്തിരിപ്പെന്നും ബോള്‍ട്ട് കൂട്ടിച്ചേര്‍ത്തു.

ന്യൂസിലാന്‍ഡ് ടെസ്റ്റ് ടീം

കെയ്ന്‍ വില്ല്യംസണ്‍ (ക്യാപ്റ്റന്‍), ടോം ലാതം, ടോം ബ്രെന്‍ഡല്‍, റോസ് ടെയ്‌ലര്‍, ഹെന്റി നിക്കോള്‍സ്, ബിജെ വാട്‌ലിങ്, കോളിന്‍ ഡി ഗ്രാന്‍ഡോം, ടിം സോത്തി, നീല്‍ വാഗ്നര്‍, ട്രെന്റ് ബോള്‍ട്ട്, അജാസ് പട്ടേല്‍, കൈല്‍ ജാമിസണ്‍, ഡാരില്‍ മിച്ചെല്‍.