പ്രസാദിനും സംഘത്തിനും ഇനി അവസരമില്ല... പുതിയ പാനല്‍ വരും, സ്ഥിരീകരിച്ച് ഗാംഗുലി

ചുമതലയേറ്റത് 2015ല്‍

2015ലാണ് പ്രസാദും ഗഗന്‍ ഗോഡയും ഇന്ത്യന്‍ ടീമിന്റെ സെലക്ടര്‍മാരായി നിയോഗിക്കപ്പെട്ടത്. ഇതേ വര്‍ഷം തന്നെ ജതിന്‍ പരഞ്ജ്പെ, ശരണ്‍ദീപ് സിങ്, ദേവാങ് ഗാന്ധി എന്നിവരെയും സെലക്ഷന്‍ പാനലില്‍ ഉള്‍പ്പെടുത്തുകയായിരുന്നു. കാലാവധി തീര്‍ന്നതോടെ സെലക്ഷന്‍ പാനലിലെ അഞ്ചുപേര്‍ക്കും ഒഴിയേണ്ടി വരും.
ഭേദഗതി വരുത്തിയ ബിസിസിഐയുടെ ഭരണഘടനപ്രകാരം സെലക്ഷന്‍ കമ്മിറ്റിയുടെ കാലാവധി അഞ്ചു വര്‍ഷമാക്കാമെന്ന നിര്‍ദേശമുണ്ടായിരുന്നു. എന്നാല്‍ ഇതു വേണ്ടെന്നു ഗാംഗുലിക്കു തീരുമാനിക്കുകയായിരുന്നു.

നന്നായി നിര്‍വഹിച്ചു

സെലക്ഷന്‍ പാനലിന്റെ കാലാവധി തീര്‍ന്നു. കാലാവധി കഴിഞ്ഞാല്‍ മുന്നോട്ടു പോവാന്‍ ആര്‍ക്കും സാധിക്കില്ല. പ്രസാദിനു കീഴിലുള്ള സെലക്ഷന്‍ കമ്മിറ്റി നല്ല രീതിയിലാണ് ദൗത്യം പൂര്‍ത്തിയാക്കിയത്. പുതിയ സെലക്ഷന്‍ പാനലിനെ ഞങ്ങള്‍ ഉടന്‍ തിരഞ്ഞെടുക്കും. എല്ലാ വര്‍ഷവും സെലക്ടര്‍മാരെ നിയമിക്കുകയെന്നത് പ്രായോഗികമല്ലെന്നും മുംബൈയില്‍ നടന്ന ബിസിസിഐയുടെ 88ാമത് വാര്‍ഷിക യോഗത്തില്‍ ഗാംഗുലി വിശദമാക്കി.

വലിയ നേട്ടങ്ങള്‍

ചില തീരുമാനങ്ങളുടെ പേരില്‍ പ്രതിക്കൂട്ടിലായെങ്കിലും പ്രസാദിനു കീഴിലുള്ള സെലക്ഷന്‍ കമ്മിറ്റിക്കു മികച്ച ചില നേട്ടങ്ങള്‍ അവകാശപ്പെടാനുണ്ട്. ഓസ്‌ട്രേലിയയിലെ ടെസ്റ്റ്, ഏകദിന പരമ്പര വിജയം, ദക്ഷിണാഫ്രിക്കയിലെ ഏകദിന പരമ്പര നേട്ടം, ന്യൂസിലാന്‍ഡിനെ പരമ്പര വിജയം എന്നിവയെല്ലാം പ്രസാദിനും പാനലിനും അഭിമാനിക്കാന്‍ വക നല്‍കുന്നതാണ്. ലോക ടെസ്റ്റ് ചാംപ്യന്‍ഷിപ്പില്‍ കളിച്ച എല്ലാ മല്‍സരങ്ങളും ജയിച്ച് തലപ്പത്തുള്ള ഇന്ത്യക്കു ഇപ്പോള്‍ ബാറ്റിങിലും ബൗളിങിലും ശക്തമായ ബെഞ്ച് നിര കൂടിയുണ്ട്.
എന്നാല്‍ ലോകകപ്പില്‍ മികച്ച നാലാംസ്ഥാനക്കാരനെ കണ്ടെത്തുന്നതില്‍ പരാജയപ്പെട്ടതും യുവതാരങ്ങള്‍ക്കു തുടര്‍ച്ചയായി അവസരങ്ങള്‍ നല്‍കാതിരുന്നതും പാനലിന്റെ വീഴ്ചകളില്‍ പെടുന്നു.