ഇന്ത്യയും പാകിസ്താനും ക്രിക്കറ്റ് കളിക്കാത്തതില്‍ മിസ്ബയ്ക്ക് നിരാശ

ഇന്ത്യയുമായി ക്രിക്കറ്റ് പരമ്പര നടന്നിരുന്നെങ്കില്‍ താന്‍ ഉടനെ വിരമിക്കുമായിരുന്നു എന്ന് പാകിസ്താന്‍ ടെസ്റ്റ് ടീം ക്യാപ്റ്റന്‍ മിസ്ബ ഉള്‍ഹഖ്. എന്നാല്‍ ഈ പരമ്പര നടക്കാനുള്ള സാധ്യത വളരെ കുറവാണ്. പരമ്പരയുടെ കാര്യത്തില്‍ രണ്ട് ക്രിക്കറ്റ് ബോര്‍ഡുകള്‍ക്കും താല്‍പര്യമുണ്ടെങ്കിലും സര്‍ക്കാരുകള്‍ പച്ചക്കൊടി കാട്ടിയിട്ടില്ല. ശ്രീലങ്കയില്‍ വെച്ച് ഡിസംബര്‍ അവസാനത്തോടെ പരമ്പര നടത്താനായിരുന്നു തീരുമാനം.

ഇന്ത്യയും പാകിസ്താനും തമ്മില്‍ കൂടുതല്‍ ക്രിക്കറ്റ് കളിക്കുന്നില്ല എന്നത് നിരാശാജനകമാണ് - വാര്‍ത്താ ഏജന്‍സിയായ പി ടി ഐയോട് കറാച്ചിയില്‍ സംസാരിക്കുകയായിരുന്നു മിസ്ബ ഉള്‍ഹഖ്. ഇന്ത്യയും പാകിസ്താനും പരസ്പരം കളിക്കുമ്പോള്‍ പോലും ഒരു കെമിസ്ട്രി ഉണ്ട് എന്നാണ് എനിക്ക് തോന്നിയിട്ടുള്ളത്. കളിക്കാരെ മാത്രമല്ല, കളി നടക്കുന്നില്ല എന്നത് ആരാധകരെയും നിരാശപ്പെടുത്തുന്ന കാര്യമാണ്.

കഴിഞ്ഞ ഏതാനും വര്‍ഷങ്ങളായി ഇന്ത്യക്കെതിരെ കൂടുതല്‍ ടെസ്റ്റ് മത്സരം കളിക്കണമായിരുന്നു എന്ന ആഗ്രഹം തനിക്കുണ്ട്. ഇന്ത്യയ്ക്ക് ലോക നിലവാരമുള്ള ബാറ്റ്‌സ്മാന്‍മാരും സ്പിന്‍ ബൗളര്‍മാരും ഉണ്ട്. രണ്ട് രാജ്യങ്ങളും തമ്മില്‍ ഒരുപാട് സമാനതകള്‍ ഉണ്ട്. കളിക്കാര്‍ തമ്മിലും കേളീശൈലി തമ്മിലും ഈ സാമ്യം ഉണ്ട്. ഇന്ത്യയുമായി ഒരു സമ്പൂര്‍ണ പരമ്പര നയിച്ച ശേഷം വിരമിക്കാനായിരുന്നു തനിക്ക് ആഗ്രഹം - 2010 മുതല്‍ പാകിസ്താന്‍ ടെസ്റ്റ് ടീമിന്റെ നായകനാണ് മിസ്ബ.