സുനില്‍ നരെയ്‌ന് ഐപിഎല്ലില്‍ വിലക്ക്!

കൊല്‍ക്കത്ത: കൊല്‍ക്കത്ത നൈറ്റ് റൈഡേഴ്‌സിന്റെ വെസ്റ്റ് ഇന്ത്യന്‍ സ്പിന്നര്‍ സുനില്‍ നരെയ്‌ന് ഐ പി എല്ലില്‍ വിലക്ക്. ഓഫ് സ്പിന്‍ എറിയുമ്പോള്‍ അനുവദനീയമായതിലും കൂടുതല്‍ കൈമടക്കുന്നു എന്ന റിപ്പോര്‍ട്ടിനെ തുടര്‍ന്നാണ് വിലക്ക്. ഇനിമുതല്‍ ഐ പി എല്ലില്‍ നരെയ്‌ന് ഓഫ് സ്പിന്‍ എറിയാന്‍ പറ്റില്ല. കാരം ബോള്‍, സ്‌ട്രെയ്റ്റ് ബോള്‍ തുടങ്ങിയ പന്തുകള്‍ എറിയുന്നതില്‍ വിലക്കില്ല.

ബി സി സി ഐ സെക്രട്ടറി അനുരാഗ് താക്കൂര്‍ ഒരു പത്രക്കുറിപ്പിലാണ് ഇക്കാര്യം അറിയിച്ചത്. നരെയ്ന്‍ ഓഫ് സ്പിന്‍ എറിഞ്ഞാല്‍ 24. 2 പ്രകാരം അംപയര്‍മാര്‍ നോബോള്‍ വിളിക്കുമെന്നും താക്കൂര്‍ പറഞ്ഞു. നേരത്തെ ഐ പി എല്‍ മത്സരത്തിനിടെ ഫീല്‍ഡ് അംപയര്‍മാരായ വിനീത് കുല്‍ക്കര്‍ണി, റിച്ചര്‍ഡ് ഇല്ലിംഗ്‌വര്‍ത് എന്നിവര്‍ നരെയ്‌ന്റെ ബൗളിംഗ് ആക്ഷന്‍ റിപ്പോര്‍ട്ട് ചെയ്തിരുന്നു.

ബൗളിംഗ് ആക്ഷന്‍ സംശയകരമായതോടെ കൊല്‍ക്കത്ത നരെയ്‌നെ ബൗളിംഗ് ആക്രമണത്തില്‍ നിന്നും മാറ്റിനിര്‍ത്തുന്നതായും റിപ്പോര്‍ട്ടുകളുണ്ട്. ചെന്നൈ സൂപ്പര്‍ കിംഗ്‌സിനെതിരെ ചൊവ്വാഴ്ച നടന്ന മത്സരത്തില്‍ നരെയ്ന്‍ കളിച്ചിരുന്നില്ല. നരെയ്‌ന് പകരം ഇറങ്ങിയ ബ്രാഡ് ഹോഗ് നാല് ഓവറില്‍ 18 റണ്‍സ് മാത്രം വഴങ്ങി 1 വിക്കറ്റ് വീഴ്ത്തിയിരുന്നു. ബൗളിംഗ് ആക്ഷന്‍ മാറ്റിയ നരെയ്‌ന് പഴയ ഫോമിലെത്താന്‍ കഴിഞ്ഞിരുന്നില്ല.

ബൗളിംഗ് ആക്ഷനില്‍ പ്രശ്‌നങ്ങളുണ്ടായതിനെ തുടര്‍ന്ന് ലോകകപ്പ് മത്സരങ്ങള്‍ പോലും കളിക്കാന്‍ നരെയ്‌ന് കഴിഞ്ഞിരുന്നില്ല. ഐ പി എല്ലിന് തൊട്ടുമുമ്പാണ് ഐ സി സിയുടെ ടെസ്റ്റ് വിജയിച്ച് വീണ്ടും കളിക്കളത്തില്‍ എത്തിയത്. 2014 ലെ ചാമ്പ്യന്‍സ് ലീഗിലാണ് നരെയ്‌നെ ആദ്യമായി നോ ബോള്‍ വിളിച്ചത്. ചാമ്പ്യന്‍സ് ലീഗ് പാതിവഴിയില്‍ നില്‍ക്കേ നരെയ്‌ന് നാട്ടിലേക്ക് മടങ്ങി. തുടര്‍ന്ന് ഇന്ത്യയ്‌ക്കെതിരായ പരമ്പരയിലും നരെയ്‌ന് കളിക്കാനായില്ല.