ഇന്ത്യ-പാക് പോരിനെക്കുറിച്ച് അക്രം പറഞ്ഞത് വൈറല്‍, ഇത്തവണ ചരിത്രം തിരുത്തും!! മഴ കനിഞ്ഞാല്‍...

ഇത് യുദ്ധമല്ലെന്ന് അക്രം

ലോകം മുഴുവനുമുള്ള കോടിക്കണക്കിന് പേര്‍ ഉറ്റുനോക്കുന്ന മല്‍സരമാണ് ഇന്ത്യ-പാക് പോരാട്ടം. ശാന്തമായി മല്‍സരം ആസ്വദിക്കൂവെയാന്നാണ് അവരോടു തനിക്കു പറയാനുള്ളതെന്നു അക്രം വ്യക്തമാക്കി.
ഒരു ടീം ജയിക്കം, മറ്റൊരു ടീം തോല്‍ക്കും. അതുകൊണ്ടു തന്നെ ഇത് അത്ര ഗൗരവമായി എടുക്കേണ്ട കാര്യമല്ല. ഇതൊരു യുദ്ധമായി ആരും കണക്കാക്കരുത്. ഇതിനെ യുദ്ധത്തിനോട് ഉപമിക്കുന്നവര്‍ യഥാര്‍ഥത്തില്‍ ക്രിക്കറ്റ് പ്രേമികളല്ലെന്നും അക്രം ചൂണ്ടിക്കാട്ടി.

ഇത്തവണ പാകിസ്താന്‍ നേടും

1992 മുതല്‍ നടന്ന ലോകകപ്പുകളില്‍ ഒരിക്കല്‍പ്പോലും ഇന്ത്യയെ പരാജയപ്പെടുത്താന്‍ പാകിസ്താന് കഴിഞ്ഞിട്ടില്ല. ലോകകപ്പില്‍ ആറു തവണ ഏറ്റുമുട്ടിയപ്പോഴും ജയം ഇന്ത്യക്കായിരുന്നു. എന്നാല്‍ ഇത്തവണ പാക് ടീം ചരിത്രം തിരുത്തുമെന്ന് അക്രം അഭിപ്രായപ്പെട്ടു.
വികാരങ്ങളെ നിയന്ത്രിക്കാന്‍ കഴിഞ്ഞാല്‍ ഇന്ത്യയെ തോല്‍പ്പിക്കാന്‍ പാകിസ്താന് കഴിയുമെന്ന് 1992, 99, 2003 ലോകകപ്പുകളില്‍ ഇന്ത്യക്കെതിരേ തോറ്റ പാക് ടീമിലുണ്ടായിരുന്ന അക്രം കൂട്ടിച്ചേര്‍ത്തു.

2017ലെ ചാംപ്യന്‍സ് ട്രോഫി ഫൈനല്‍

ഇന്ത്യയുടേത് ശക്തമായ ടീമാണെന്ന് ചൂണ്ടിക്കാട്ടിയ അക്രം 2017ലെ ചാംപ്യന്‍സ് ട്രോഫി ഫൈനലില്‍ നേടിയ ഞെട്ടിക്കുന്ന ജയം പോലെ മറ്റൊരു അവിസ്മരണീയ വിജയം ഞായറാഴ്ച സ്വന്തം പേരില്‍ കുറിക്കുമെന്ന് അഭിപ്രായപ്പെട്ടു. ഇന്ത്യയുടെ ബാറ്റിങും ബൗളിങും ശക്തമാണ്. എങ്കിലും പാക് ടീമിന് അവയെ അതിജീവിക്കാനുള്ള ശേഷിയുണ്ട്. ഇന്ത്യ- പാക് പോരാട്ടങ്ങള്‍ എല്ലായ്‌പ്പോഴും സമ്മര്‍ദ്ദങ്ങളെ മറികടക്കുന്ന ടീമാണ് ജയിക്കാറുള്ളതെന്നും അക്രം വിശദമാക്കി.മഴ കാരണം മല്‍സരം തടസ്സപ്പെടില്ലെന്നുമാണ് താന്‍ ആഗ്രഹിക്കുന്നതെന്നും അദ്ദേഹം കൂട്ടിച്ചേര്‍ത്തു.