സ്മിത്തിന്റെ പൂനെയെ പേടിപ്പിക്കാന്‍ രാജാക്കന്‍മാര്‍!! അരങ്ങൊരുങ്ങുന്നത് ഓസീസ് പോരിന്

കഴിഞ്ഞ സീസണില്‍ ഇന്ത്യയുടെ മുന്‍ ക്യാപ്റ്റന്‍ എംഎസ് ധോണിയുടെ ടീമെന്നാണ് പൂനെ വിശേഷിപ്പിക്കപ്പട്ടിരുന്നത്. എന്നാല്‍ ഈ സീസണില്‍ അതല്ല സ്ഥിതി. ഓസീസ് യുവ ബാറ്റ്‌സ്മാനും നായകനുമായ സ്റ്റീവ് സ്മിത്തിന്റെ ടീമാണ് ഇപ്പോള്‍ പൂനെ.

ധോണിയല്ല, ഇനി താനാണ് ടീമിന്റെ അമരക്കാരനെന്നു ആദ്യ മല്‍സരത്തിലെ തകര്‍പ്പന്‍ പ്രകടനത്തിലൂടെ സ്മിത്ത് തെളിയിച്ചിരുന്നു. മുംബൈ ഇന്ത്യന്‍സിനെതിരേ നടന്ന കളിയില്‍ പൂനെയുടെ വിജയശില്‍പ്പിയായത് സ്മിത്തായിരുന്നു. 54 പന്തില്‍ നിന്ന് ഏഴു ബൗണ്ടറികളും മൂന്നു സിക്‌സറുമടക്കം 84 റണ്‍സാണ് സ്മിത്ത് പുറത്താവാതെ നേടിയത്.

ക്യാപ്റ്റനെന്ന നിലയില്‍ മാക്‌സ്‌വെല്ലിന്റെ അരങ്ങേറ്റ മല്‍സരം കൂടിയാണ് ഇന്നത്തേത്. ഇതുവരെ ഒരു ടീമിനെയും നയിച്ച അനുഭവസമ്പത്ത് മാക്‌സ്‌വെല്ലിന് ഇല്ല. അതുകൊണ്ടു തന്നെ താരത്തിന്റെ ക്യാപ്റ്റന്‍സി എങ്ങനെയായിരിക്കുമെന്നാണ് ക്രിക്കറ്റ് പ്രേമികള്‍ ഉറ്റുനോക്കുന്നത്.

ഇംഗ്ലീഷ് ക്യാപ്റ്റനായ ഇയോന്‍ മോര്‍ഗന്‍, വിന്‍ഡീസ് മുന്‍ നായകന്‍ ഡാരന്‍ സമ്മി എന്നിവര്‍ പഞ്ചാബ് ടീമിലുണ്ടെങ്കിലും ഇവര്‍ക്കെല്ലാം പകരമാണ് മാനേജ്‌മെന്റ് മാക്‌സ്‌വെല്ലിനു ക്യാപ്റ്റന്റെ തൊപ്പി നല്‍കിയത്.

അവസാന നിമിഷം പഞ്ചാബ് ടീമിലേക്കു നറുക്കുവീണ ഇന്ത്യന്‍ പേസര്‍ ഇഷാന്ത് ശര്‍മ പൂനെയ്‌ക്കെതിരേ കളിക്കുമെന്ന് ഉറപ്പായിട്ടുണ്ട്. ഇഷാന്തിന്റെ കരിയറിലെ അഞ്ചാമത്തെ ഐപിഎല്‍ കൂടിയാണിത്.കഴിഞ്ഞ സീസണില്‍ പൂനെയ്‌ക്കൊപ്പമായിരുന്ന താരത്തിന്റെ പ്രകടനം മോശമായിരുന്നു. നാലു കളികളില്‍ നിന്നു മൂന്നു വിക്കറ്റാണ് ഇഷാന്ത് നേടിയത്.

ഇന്ത്യന്‍ ഓപണര്‍ മുരളി വിജയ് ഈ സീസണിലെ ഐപിഎല്ലില്‍ പഞ്ചാബിനായി കളിക്കില്ല. പരിക്കിനെ തുടര്‍ന്നാണ് താരത്തിന്റെ പിന്‍മാറ്റം. വിജയ്ക്കു പകരമാണ് പഞ്ചാബ് ഇഷാന്തിനെ സ്വന്തമാക്കിയത്.