IPL 2026: ഇനിയെന്തിന് റിങ്കു? ഇതാ ഇന്ത്യ കാത്തിരുന്ന ഫിനിഷര്‍!! ആരാണ് മുകുള്‍, അറിയാം

കൊല്‍ക്കത്ത: ഇന്ത്യന്‍ ക്രിക്കറ്റിന്‍ പുത്തന്‍ പ്രതീക്ഷകളേകി മുകുള്‍ ചൗധരിയെന്ന പുതിയൊരു ഹീറോ കൂടി ഐപിഎല്ലില്‍ പിറവിയെടുത്തിരിക്കുകയാണ്. കൊല്‍ക്കത്ത നൈറ്റ് റൈഡേഴ്‌സുമായുള്ള പോരാട്ടത്തില്‍ തോല്‍വിയുടെ വക്കില്‍ നിന്നും ലഖ്‌നൗ സൂപ്പര്‍ ജയന്റ്‌സിനെ കൈപിട്ടിച്ചുയര്‍ത്തിയത് അദ്ദേഹമാണ്.

ഏഴാമനായെത്തി വെറും 27 ബോളില്‍ മുകുള്‍ പുറത്താവാതെ വാരിക്കൂട്ടിയത് 54 റണ്‍സാണ്. ഏഴു കൂറ്റന്‍ സിക്‌സറും രണ്ടു ഫോറുമടക്കമാണിത്. അവസാന ബോളില്‍ എല്‍എസ്ജി മൂന്നു വിക്കറ്റിന്റെ ജയം കൊയ്തപ്പോള്‍ പ്ലെയര്‍ ഓഫ് ദി മാച്ചും ഈ യുവതാരം തന്നെ. ആരാണ് ഒറ്റ ഇന്നിങ്‌സിലൂടെ ഐപിഎല്ലിലെ പുതിയ തരംഗമായി മാറിയ മുകുള്‍? താരത്തെ അടുത്തറിയാം.

ആരാണ് മുകുള്‍?

2004 ഓഗസ്റ്റ് ആറിന് ജനിച്ച മുകുൾ ചൗധരി ഇന്ത്യൻ ക്രിക്കറ്റിലെ പുതിയ വാഗ്ദാനമായി മാറിയിരിക്കുന്ന താരമാണ്. രാജസ്ഥാനിൽ നിന്നുള്ള ഈ വലംകൈയ്യൻ വിക്കറ്റ് കീപ്പർ-ബാറ്റർ ആഭ്യന്തര ക്രിക്കറ്റിൽ തന്റെ സംസ്ഥാനത്തെയും ഐപിഎലിൽ ലഖ്‌നൗ സൂപ്പർ ജയന്റ്‌സിനെയും പ്രതിനിധീകരിക്കുന്നു.

സിക്കാർ ജില്ലയിലെ ജുൻജുനുവിൽ നിന്നുള്ള ആദ്യ ക്രിക്കറ്റ് താരമാണ് മുകുൾ. ഐപിഎൽ 2026 മിനി ലേലത്തിൽ ലഖ്‌നൗ സൂപ്പർ ജയന്റ്‌സ് 2.60 കോടി രൂപയ്ക്കാണ് അദ്ദേഹത്തെ സ്വന്തമാക്കിയത്. 30 ലക്ഷം രൂപ അടിസ്ഥാന വിലയുണ്ടായിരുന്ന അദ്ദേഹത്തെ സ്വന്തമാക്കാൻ രാജസ്ഥാൻ റോയൽസും മറ്റ് ചില ടീമുകളും പോരടിച്ചതോടെയാണ് ഈ വലിയ തുകയിലേക്ക് എത്തിയത്.

തുടക്ക കാല കരിയർ

2023 ജനുവരി 17-ന് 2022-23 രഞ്ജി ട്രോഫിയിലൂടെ ഫസ്റ്റ് ക്ലാസ് ക്രിക്കറ്റിൽ അരങ്ങേറ്റം കുറിച്ച മുകുൾ ചൗധരി, 2025 ഡിസംബർ 24ന് വിജയ് ഹസാരെ ട്രോഫിയിലൂടെ ലിസ്റ്റ് എ ക്രിക്കറ്റിലും തന്റെ സാന്നിധ്യം അറിയിച്ചു. 162-165 സ്ട്രൈക്ക് റേറ്റിൽ ഡെത്ത് ഓവറുകളിൽ മികച്ച പ്രകടനം നടത്തുന്ന ഒരു ആക്രമണകാരിയായ മധ്യനിര ഫിനിഷറാണ് അദ്ദേഹം.

നേരത്തെ ഒരു മീഡിയം പേസ് ബൗളറായിരുന്ന മുകുൾ പിന്നീട് വിക്കറ്റ് കീപ്പിംഗിലേക്ക് മാറുകയും ആക്രമണോത്സുകമായ ബാറ്റിംഗിലൂടെയും ശക്തമായ ഷോട്ടുകളിലൂടെയും ശ്രദ്ധ നേടുകയും ചെയ്തു.

സയ്ദ് മുഷ്താഖ് അലി ട്രോഫിയിലെ അദ്ദേഹത്തിന്റെ ഉജ്ജ്വല പ്രകടനങ്ങൾ, മത്സര വിജയികളായ ഇന്നിംഗ്‌സുകൾ അടക്കം, ഐപിഎൽ ലേലത്തിൽ ഫ്രാഞ്ചൈസികൾക്കിടയിൽ കടുത്ത മത്സരത്തിന് വഴിയൊരുക്കി.

കെകെആറുമായുള്ള മത്സരശേഷം 21 കാരനായ മുകുൾ തന്റെ പഴയൊരു ഓർമ്മ പങ്കുവെച്ചു: "യു.പി.ക്കെതിരെ ഞങ്ങൾക്ക് ഒരു അണ്ടർ 19 മത്സരമുണ്ടായിരുന്നു. ആ മത്സരത്തിൽ ഞാൻ മികച്ച പ്രകടനം നടത്തിയിരുന്നു.

അന്ന് മുതൽ എന്റെ കഴിവിൽ വിശ്വാസമുണ്ടെന്ന് അദ്ദേഹം ഇപ്പോഴും എന്നോട് പറയാറുണ്ട്". ഈഡൻ ഗാർഡൻസിൽ രാത്രിയിൽ കളിക്കുന്ന തന്റെ രണ്ടാമത്തെ മത്സരമായിരുന്നു ഇതെന്നും, മത്സരം വിജയിപ്പിക്കാൻ തനിക്ക് ആത്മവിശ്വാസമുണ്ടായിരുന്നു എന്നും മുകുൾ കൂട്ടിച്ചേർത്തു.