IPL 2026: മുംബൈക്കെതിരെയും ധോണി കളിക്കില്ല? സൂചന നല്‍കി ബാറ്റിംഗ് പരിശീലകന്‍

ഈ ഐപിഎല്‍ സീസണില്‍ ചെന്നൈ സൂപ്പര്‍കിംഗ്‌സ് ആരാധകരാകെ നിരാശയിലാണ്. ടീം തുടരെ തോല്‍ക്കുന്നതിനോടൊപ്പം സൂപ്പര്‍താരം മഹേന്ദ്ര സിംഗ് ധോണിയുടെ അഭാവവും ആരാധകരെ അലട്ടുന്നു. ചെന്നൈ സൂപ്പര്‍ കിംഗ്സിന്റെ ബാറ്റിംഗ് പരിശീലകന്‍ മൈക്ക് ഹസിക്ക് പോലും എംഎസ് ധോണി മത്സര ക്രിക്കറ്റിലേക്ക് എപ്പോള്‍ മടങ്ങിവരുമെന്ന് ഒരു സൂചനയും ഇല്ല എന്നതാണ് സത്യം.

പ്രീ-സീസണ്‍ പരിശീലനത്തിനിടെ പരിക്കേറ്റതിനാല്‍ ധോണിയുടെ തിരിച്ചുവരവ് തുടര്‍ച്ചയായി നീളുകയാണ്. സീസണിന്റെ തുടക്കത്തില്‍ ധോണി 2 ആഴ്ച പുറത്തിരിക്കുമെന്നായിരുന്നു റിപ്പോര്‍ട്ട്. അതായത് സിഎസ്‌കെയുടെ 4 മത്സരങ്ങള്‍ അദ്ദേഹത്തിന് നഷ്ടമാകും എന്നായിരുന്നു അറിയിച്ചത്. എന്നാല്‍ നിലവില്‍ 6 മത്സരങ്ങള്‍ക്ക് ശേഷവും ധോണി കളിച്ചിട്ടില്ല. ഏപ്രില്‍ 18 ന് നടന്ന സണ്‍റൈസേഴ്സ് ഹൈദരാബാദിനെതിരായ മത്സരത്തിന് മുമ്പ് ധോണി ടീമിലെത്തും എന്നായിരുന്നു റിപ്പോര്‍ട്ട്.

എന്നാല്‍ അത് ഉണ്ടായില്ല. ഇപ്പോഴിതാ ഏറ്റവും പുതിയ റിപ്പോര്‍ട്ടുകള്‍ സൂചിപ്പിക്കുന്നത് ഏപ്രില്‍ 23 ന് മുംബൈ ഇന്ത്യന്‍സിനെതിരെ അ്‌ദ്ദേഹം കളിക്കാന്‍ സാധ്യതയുണ്ടെന്നാണ്. നേരത്തെ എസ്ആര്‍എച്ചിനെതിരായ മത്സരത്തിനായി അദ്ദേഹം ഹൈദരാബാദിലേക്ക് പോയിരുന്നു. ഇതിനര്‍ത്ഥം, ആ മത്സരത്തിനല്ലെങ്കില്‍, സമീപഭാവിയില്‍ ധോണി ഫിറ്റ്‌നസ് നേടുമെന്നാണ്. കാരണം അദ്ദേഹം മുമ്പ് ഒരു മത്സരത്തിനും ടീമിനൊപ്പം യാത്ര ചെയ്തിട്ടില്ലായിരുന്നു.

അതിനിടെ ഹസിയുടെ പ്രതികരണം വീണ്ടും ആരാധകര്‍ക്ക് നിരാശ സമ്മാനിച്ചിരിക്കുകയാണ്. ഐപിഎല്ലിന്റെ എല്‍ ക്ലാസിക്കോയില്‍ മുംബൈയ്‌ക്കെതിരായ മത്സരത്തില്‍ ധോണി പങ്കെടുക്കുമെന്ന് പ്രതീക്ഷിക്കുന്നില്ല. എസ്ആര്‍എച്ച് മത്സരത്തിന് ശേഷം, ധോണിക്ക് കാലിലെ പരിക്കില്‍ നിന്ന് സുഖം പ്രാപിക്കാന്‍ എത്ര സമയം ആവശ്യമാണെന്ന് തനിക്കറിയില്ലെന്ന് ഹസി വ്യക്തമായി പറഞ്ഞു.

''ശരിക്കും അങ്ങനെയല്ല, എനിക്ക് ഉറപ്പില്ല. ധോണി സുഖം പ്രാപിക്കാന്‍ എത്ര സമയമെടുക്കും എന്നറിയില്ല. ഫിസിയോ ഇവിടെ ഇരിക്കുകയാണെങ്കില്‍, ഒരുപക്ഷേ അദ്ദേഹത്തിന് അതിന് ഉത്തരം നല്‍കാന്‍ കഴിഞ്ഞേക്കും,'' ഹസി ഹൈദരാബാദില്‍ വെച്ച് മാധ്യമപ്രവര്‍ത്തകരോട് പറഞ്ഞു. കാലിനേറ്റ പരിക്കില്‍ നിന്ന് മുക്തി നേടാന്‍ ഒരു മാസത്തെ സമയം മതിയെങ്കിലും താരത്തിന്റെ പ്രായം കൂടി പരിഗണിക്കണം എന്നാണ് സോഷ്യല്‍ മീഡിയയിലെ ചര്‍ച്ച.

ഈ വരുന്ന ജൂലൈയില്‍ അദ്ദേഹത്തിന് 45 വയസ്സ് തികയും. ശാരീരികമായി മികച്ച നിലയിലേക്ക് തിരിച്ചെത്താന്‍ അദ്ദേഹത്തിന് കൂടുതല്‍ സമയം ആവശ്യമായി വരുന്നത് സ്വാഭാവികമാണ്. ഏതായാലും ധോണിയോ സിഎസ്‌കെ മാനേജ്മെന്റോ കാര്യങ്ങള്‍ തിരക്കുകൂട്ടാന്‍ ആഗ്രഹിക്കുന്നില്ല. അടുത്തകാലത്തായി അദ്ദേഹം അധികനേരം ബാറ്റ് ചെയ്യാറില്ല. 2025 ലെ ഐപിഎല്ലില്‍, അദ്ദേഹം ഒരു മത്സരത്തില്‍ 11.15 പന്തുകള്‍ മാത്രമേ ബാറ്റ് ചെയ്തിട്ടുള്ളൂ.

എന്നാല്‍ സിഎസ്‌കെയ്ക്കായി ഫിനിഷിംഗ് ഗെയിമുകള്‍ ആരംഭിക്കാന്‍ അദ്ദേഹം തന്റെ ഏറ്റവും മികച്ച പ്രകടനം കാഴ്ചവയ്‌ക്കേണ്ടതുണ്ട്. ഫോറുകളും സിക്സറുകളും അടിക്കുക മാത്രമല്ല, അദ്ദേഹം നന്നായി വിക്കറ്റിനിടയിലൂടെ ഓടുകയും വേണം. ധോണിക്ക് ഇപ്പോള്‍ അത് ചെയ്യാന്‍ കഴിയുമെന്ന് ഹസിക്ക് ഉറപ്പില്ല. ഫലത്തില്‍ അദ്ദേഹം മുംബൈക്കെതിരായ മത്സരത്തില്‍ നിന്ന് പുറത്താണ്.