സഞ്ജു ഇനി മഞ്ഞക്കുപ്പായത്തില്‍... രാജസ്ഥാന്‍ ക്യാംപിലേക്ക് ജഡേജയ്‌ക്കൊപ്പം മറ്റൊരു സൂപ്പര്‍താരം കൂടി

മുംബൈ: 2026 ലെ ഐ പി എല്‍ സീസണിന് മുന്നോടിയായുള്ള മിനിലേലത്തിന് മുന്‍പ് രാജസ്ഥാന്‍ റോയല്‍സില്‍ നിന്ന് സൂപ്പര്‍താരം സഞ്ജു സാംസണെ സ്വന്തമാക്കി ചെന്നൈ സൂപ്പര്‍ കിംഗ്‌സ്. പകരമായി, സി എസ് കെ ജഡേജയെയും സാം കരനെയും രാജസ്ഥാന് നല്‍കി. ഇതുസംബന്ധിച്ച് സി എസ് കെ ഔദ്യോഗിക പ്രസ്താവന പുറത്തിറക്കി. സഞ്ജു സാംസണ്‍ ചെന്നൈ സൂപ്പര്‍ കിംഗ്‌സിലേക്ക് പോയതായി രാജസ്ഥാന്‍ റോയല്‍സും സ്ഥിരീകരിച്ചു.

ന്യൂസിലന്‍ഡ് ജോഡികളായ കോണ്‍വേയെയും രചിന്‍ രവീന്ദ്രയെയും ചെന്നൈ റിലീസ് ചെയ്തിട്ടുണ്ട്. കഴിഞ്ഞ വര്‍ഷം കോണ്‍വേയെ 6.25 കോടി രൂപയ്ക്കും റാച്ചിന്‍ രവീന്ദ്രയെ 4 കോടി രൂപയ്ക്കും ആണ് സിഎസ്‌കെ വാങ്ങിയത്. അതുപോലെ, രാഹുല്‍ തിരുപ്പതി, വിജയ് ശങ്കര്‍, ദീപക് ഹൂഡ തുടങ്ങിയ ഇന്ത്യന്‍ കളിക്കാരെയും ടീമില്‍ നിന്ന് ഒഴിവാക്കാനുള്ള ഒരുക്കത്തിലാണ്.

അശ്വിന്‍ ഇതിനകം തന്നെ വിരമിച്ചതിനാല്‍ വരും സീസണില്‍ ചെന്നൈയില്‍ കാര്യമായ മാറ്റമുണ്ടാകും എന്നുറപ്പാണ്. വരാനിരിക്കുന്ന മിനി ലേലത്തില്‍ സിഎസ്‌കെയ്ക്ക് ആകെ 31 കോടി രൂപ കരുതല്‍ ധനമായി കൈയിലുണ്ടാകും. ജഡേജയ്ക്ക് പകരം ഒരു സ്പിന്‍ ബൗളിംഗ് ഓള്‍റൗണ്ടറെയും മധ്യനിരയില്‍ ഒരു വിദേശ കളിക്കാരനെയും സിഎസ്‌കെയ്ക്ക് വാങ്ങണം. മാക്‌സ്വെല്‍, ലിയാം ലിവിംഗ്സ്റ്റണ്‍ തുടങ്ങിയ വിദേശ കളിക്കാരെ വാങ്ങാന്‍ സിഎസ്‌കെ ടീം ശ്രമിച്ചേക്കും.

2013 ല്‍ അരങ്ങേറ്റം മുതല്‍ റോയല്‍സിന്റെ മുന്‍നിര താരമായി കളിക്കുന്ന സഞ്ജു സാംസണ്‍, ഫ്രാഞ്ചൈസി സസ്പെന്‍ഡ് ചെയ്യപ്പെട്ട രണ്ട് സീസണുകള്‍ ഒഴികെ, പ്രീ-സീസണ്‍ ചര്‍ച്ചകളില്‍ തുടരാനുള്ള ആഗ്രഹം പ്രകടിപ്പിച്ചിരുന്നു. മറ്റ് മൂന്ന് ടീമുകളുടെ താല്‍പ്പര്യം ഉണ്ടായിരുന്നിട്ടും, സാംസണും ജഡേജയും ഉള്‍പ്പെടുന്ന സിഎസ്‌കെയുടെ ഓഫര്‍ ആര്‍ആര്‍ ഒടുവില്‍ സ്വീകരിച്ചു. ഐ പി എല്‍ ഉദ്ഘാടന സീസണില്‍ റോയല്‍സിന്റെ താരമായിരുന്ന ജഡേജ, പിന്നീട് സിഎസ്‌കെയുടെ മഞ്ഞ നിറത്തിന്റെ പര്യായമായി മാറി.

അതേസമയം രാജസ്ഥാനിലേക്ക് പോകുമ്പോള്‍ ജഡേജ തന്റെ ശമ്പളം 18 കോടിയില്‍ നിന്ന് 14 കോടിയായി ശമ്പളം കുറച്ചു. മിക്കവാറും ജഡേജയായിരിക്കും റോയല്‍സിന്റെ പുതിയ ക്യാപ്റ്റന്‍. സഞ്ജു സാംസണിന് പകരമായി ജഡേജയ്ക്കൊപ്പം ഡെവാള്‍ഡ് ബ്രെവിസിനെയും രാജസ്ഥാന്‍ സ്വന്തമാക്കാന്‍ ശ്രമിച്ചിരുന്നു. പക്ഷേ ഒടുവില്‍ സാം കറന്റെ സമഗ്ര പാക്കേജില്‍ ഒത്തുതീര്‍പ്പിലെത്തി.