Click it and Unblock the Notifications
ബാറ്റിങ് ഓഡറില് മക്കല്ലം വരുത്തിയ മാറ്റമാണ് ശ്രേയസിനെ പ്രകോപിപ്പിച്ചതെന്നാണ് പുറത്തുവരുന്ന റിപ്പോര്ട്ട്. മത്സരത്തില് ശ്രേയസ് അയ്യര് പുറത്തായതിന് ശേഷം ക്രീസിലെത്തിയത് പേസര് ശിവം മാവിയാണ്. പാറ്റ് കമ്മിന്സ് ഇറങ്ങാനിരിക്കെയാണ് മാവിയെ ബാറ്റിങ്ങിനിറക്കിയത്. ഇതാണ് ശ്രേയസിനെ പ്രകോപിപ്പിച്ചത്. മാവി നേരിട്ട ആദ്യ പന്തില് പുറത്തായപ്പോള് തൊട്ടടുത്ത പന്തില് കമ്മിന്സും അക്കൗണ്ട് തുറക്കാതെ മടങ്ങി. യുസ് വേന്ദ്ര ചഹാലിന്റെ ഹാട്രിക് വിക്കറ്റായിരുന്നു ഇത്.
കമ്മിന്സ് മുംബൈ ഇന്ത്യന്സിനെതിരേ അത്ഭുത പ്രകടനം നടത്തി ടീമിനെ ജയിപ്പിച്ച താരമാണ്. എന്നാല് സ്പിന്നിനെതിരേ ബാറ്റ് ചെയ്യുമ്പോള് അല്പ്പം പ്രയാസമുണ്ട്. അതുകൊണ്ടാണ് കമ്മിന്സിന്റെ വിക്കറ്റ് കാക്കാന് ശിവം മാവിയെ മക്കല്ലം ഇറക്കിയത്. എന്നാല് നേരിട്ട ആദ്യ പന്തില്ത്തന്നെ മാവി പുറത്തായത് കണക്കുകൂട്ടല് തെറ്റിച്ചു. അതി സമ്മര്ദ്ദത്തിലേക്ക് തള്ളിവിടപ്പെട്ട കമ്മിന്സിന് ഒന്നും ചെയ്യാനാവാതെ മടങ്ങേണ്ടി വന്നതോടെ കെകെആറിന്റെ തോല്വി ഏറെക്കുറെ ഉറപ്പായി.
ബാറ്റിങ് ഓഡറില് മക്കല്ലം ബുദ്ധിപൂര്വ്വമാണ് മാറ്റങ്ങള് വരുത്തിയതെങ്കിലും ഇത് ഉദ്ദേശിച്ച ഫലമല്ല ഉണ്ടാക്കിയത്. ഇതാണ് ശ്രേയസിനെ നിരാശനാക്കിയത്. നന്നായി കളിച്ച ശ്രേയസ് ചഹാലിന് മുന്നില് പുറത്തായത് മുതല് ഡഗ്ഔട്ടില് അദ്ദേഹത്തെ നിരാശനായാണ് കാണപ്പെട്ടത്. ദേഷ്യഭാവത്തോടെ ഇരുന്ന ശ്രേയസിന് മക്കല്ലത്തിന്റെ പദ്ധതിയോട് കടുത്ത അമര്ഷമുണ്ടെന്ന് വ്യക്തം. മത്സരത്തിനിടെയിലും ശ്രേയസിന് തന്റെ നിയന്ത്രണം നഷ്ടമാവുന്ന സാഹചര്യം ഉണ്ടായി.
റണ്സിനായി പതുക്കെ ഓടിയ വെങ്കടേഷ് അയ്യരെ ശ്രേയസ് പരസ്യമായി ശകാരിക്കുകയും ചെയ്തു. ഇതിന്റെ വീഡിയോയും വൈറലാണ്. തണുത്ത ശരീര ഭാഷയില് കാണപ്പെട്ട വെങ്കടേഷ് ആറ് റണ്സ് മാത്രമാണ് നേടിയത്. ഓപ്പണിങ്ങില് പഴയ വെടിക്കെട്ട് ആവര്ത്തിക്കാന് സാധിക്കാത്ത വെങ്കടേഷിനെ മധ്യനിരയിലേക്ക് കെകെആര് പരീക്ഷിച്ചെങ്കിലും താരം വീണ്ടും നിരാശപ്പെടുത്തിയിരിക്കുകയാണ്. 2021ല് കെകെആറിനെ ഫൈനലിലേക്കെത്തിക്കുന്നതില് നിര്ണ്ണായക പങ്കുവഹിച്ച വെങ്കടേഷിന് ഇത്തവണ കാര്യമായൊന്നും ചെയ്യാന് സാധിക്കാത്തത് കെകെആറിനെ കാര്യമായി ബാധിച്ചിട്ടുണ്ട്.
സീസണിലെ അവസാനത്തെ മൂന്ന് മത്സരവും കെകെആര് പരാജയപ്പെട്ടു. ഇത് ടീമിന്റെ മുന്നോട്ടുള്ള കുതിപ്പിനെ കാര്യമായി ബാധിക്കുന്ന കാര്യമാണ്. ഒത്തൊരുമയോടെ കളിക്കാന് ടീമിന് സാധിക്കുന്നില്ല. റസലില് നിന്നും സ്ഥിരതയോടെയുള്ള പ്രകടനം ഉണ്ടാവുന്നില്ല. ഡെത്ത് ഓവറില് ബൗളര്മാരുടെ പ്രകടനവും നിരാശപ്പെടുത്തുന്നതാണ്. കെകെആറിന്റെ ശക്തമായ തിരിച്ചുവരവാണ് ആരാധകര് ആഗ്രഹിക്കുന്നതെങ്കിലും നിലവിലെ സാഹചര്യത്തില് വലിയ സമ്മര്ദ്ദത്തിലാണ് ടീമുള്ളതെന്ന് പറയാതെ വയ്യ.
Continue with Google