IPL 2022: 'അന്ന് ഞാന്‍ പന്തെറിയുന്ന വീഡിയോ സച്ചിന്‍ ചോദിച്ചു', സംഭവം വെളിപ്പെടുത്തി നരെയ്ന്‍

കെകെആറിനൊപ്പം 10 സീസണ്‍ നരെയ്ന്‍ പിന്നിട്ടിരിക്കുകയാണ്. '2013ലെ ചാമ്പ്യന്‍സ് ലീഗ് ടി20 നടക്കുന്ന സമയം. ഇന്ത്യയുടെ ഇതിഹാസം സച്ചിന്‍ ടെണ്ടുല്‍ക്കര്‍ മുംബൈ ഇന്ത്യന്‍സിനായി കളിക്കുന്നു. നേരത്തെ ഒന്ന് രണ്ട് തവണ സച്ചിനെ പുറത്താക്കാന്‍ സാധിച്ചിരുന്നു. ടൂര്‍ണമെന്റിനിടെ സച്ചിന്‍ എന്റെ ബൗളിങ്ങിന്റെ വീഡിയോ നല്‍കാമോയെന്ന് ലൈവ് നല്‍കുന്ന ചാനല്‍ അധികൃതരോട് ചോദിച്ചു. ഇതറിഞ്ഞപ്പോള്‍ വലിയ സന്തോഷമാണ് തോന്നിയത്.

എക്കാലത്തെയും മികച്ച ബാറ്റ്‌സ്മാന്‍മാര്‍ നമ്മുടെ ബൗളിങ്ങിനെ ഇത്രയും ശ്രദ്ധിക്കുന്നുണ്ടെന്നത് വലിയ അംഗീകാരമാണ്. എന്നാല്‍ മത്സരത്തില്‍ ശ്രദ്ധയോടെയും കഠിനാധ്വാനത്തോടെയും കളിച്ചാല്‍ ഇത്തരം അനുഭവങ്ങളില്‍ അത്ഭുതം തോന്നില്ല. ഏതൊരു യുവതാരം വന്നാലും മത്സരത്തെ ശ്രദ്ധയോടെ പഠിക്കുകയും കഠിനാധ്വാനം ചെയ്യുകയും വേണമെന്നാണ് പറയാനുള്ളത്' -നരെയ്ന്‍ പറഞ്ഞു.

വെസ്റ്റ് ഇന്‍ഡീസ് ക്രിക്കറ്റ് ബോര്‍ഡുമായുള്ള ഉടക്കിനെത്തുടര്‍ന്ന് സുനില്‍ നരെയ്ന്‍ ടീമില്‍ സജീവമല്ല. എന്നാല്‍ ഐപിഎല്‍ ഉള്‍പ്പെടെയുള്ള ഫ്രാഞ്ചൈസി ക്രിക്കറ്റില്‍ നരെയ്ന്‍ സജീവമാണ്. കെകെആറിന്റെ അഭിവാജ്യ ഘടകമാണ് നരെയ്‌നെന്ന് പറയാം. ടീം വളരെ പ്രാധാന്യം നല്‍കുന്ന താരമാണ് നരെയ്ന്‍. ഇത്തവണെയും മെഗാ ലേലത്തിന് മുമ്പ് തന്നെ നരെയ്‌നെ കെകെആര്‍ നിലനിര്‍ത്തിയിരുന്നു. ഡെത്ത് ഓവറിലും ന്യൂബോളിലും ഒരുപോലെ വിശ്വസിച്ച് പന്തേല്‍പ്പിക്കാന്‍ കഴിയുന്ന താരമാണ് അദ്ദേഹം.

കെകെആറിനൊപ്പം കരിയര്‍ അവസാനിപ്പിക്കാനാണ് ആഗ്രഹിക്കുന്നതെന്നും നരെയ്ന്‍ തുറന്ന് പറഞ്ഞു. 'മറ്റൊരു ഫ്രാഞ്ചൈസിക്കുവേണ്ടിയും ഐപിഎല്ലില്‍ കളിക്കില്ലെന്നാണ് പ്രതീക്ഷിക്കുന്നതെന്നത് ഞാന്‍ എപ്പോഴും കെകെആര്‍ സിഇഒ വെങ്കി മൈസൂരിനോട് പറയും. കെകെആറിനൊപ്പം തുടരുന്നതില്‍ സംതൃപ്തനാണ്. തുടങ്ങിയത് കെകെആറിനൊപ്പമാണ്. അതുകൊണ്ട് അവരോടൊപ്പം ഫിനിഷ് ചെയ്യാമെന്ന് കരുതുന്നു. അതൊരു വലിയ അംഗീകാരമായാണ് കാണുന്നത്. ഒരു ഫ്രാഞ്ചൈസിക്ക് വേണ്ടി മാത്രം അധികനാള്‍ ഐപിഎല്‍ കളിച്ച വിദേശ താരങ്ങള്‍ വളരെ കുറവാണ്. ഭാഗ്യത്തിന് ഞാന്‍ അതിലൊരാളാണ്. ഭാവിയിലും അവരോടൊപ്പം തുടരാമെന്നാണ് പ്രതീക്ഷിക്കുന്നത്'- നരെയ്ന്‍ പറഞ്ഞു.

കെകെആറിന്റെ രണ്ട് കിരീട നേട്ടത്തിന് പിന്നിലും നന്നായി അധ്വാനിച്ച നരെയ്ന്‍ ഇപ്പോഴും വിശ്വസ്തനായി തുടരുന്നു. ഇടക്ക് ബൗളിങ് ആക്ഷന്റെ പേരില്‍ അല്‍പ്പനാള്‍ മാറി നില്‍ക്കേണ്ടി വന്നെങ്കിലും ആക്ഷനില്‍ മാറ്റങ്ങള്‍ വരുത്തി ശക്തമായ തിരിച്ചുവരവാണ് നരെയ്ന്‍ നടത്തിയത്. വിരാട് കോലി, രോഹിത് ശര്‍മ, എബി ഡിവില്ലിയേഴ്‌സ് തുടങ്ങി ഐപിഎല്ലിലെ വെടിക്കെട്ട് ബാറ്റ്‌സ്മാന്‍മാരെ ആരെ പരിഗണിച്ചാലും അവര്‍ക്കെല്ലാമെതിരേ മികച്ച റെക്കോഡ് നരെയ്‌ന് അവകാശപ്പെടാനാവും.

പന്തെറിയാന്‍ പ്രയാസമുള്ള താരമായി വീരേന്ദര്‍ സെവാഗിനെയാണ് നരെയ്ന്‍ പറഞ്ഞത്. സ്പിന്നിനെ നന്നായി കളിക്കുന്ന താരമാണ് സെവാഗെന്നും ഏത് സാഹചര്യത്തിലും ഒരുപോലെ ആക്രമിക്കുന്ന താരമാണ് സെവാഗെന്നുമാണ് നരെയ്ന്‍ അഭിപ്രായപ്പെട്ടത്. വെടിക്കെട്ട് ഓപ്പണറായ സെവാഗ് ഐപിഎല്ലില്‍ ഡല്‍ഹി, പഞ്ചാബ് ടീമുകള്‍ക്കായാണ് കളിച്ചത്.