IPL 2022: രാജസ്ഥാന്റെ 'തക്കുടു മോന്‍', ഡാന്‍സ് കളിക്കാന്‍ കൊള്ളാം, പരാഗിനെതിരേ ട്രോള്‍ പൂരം

ഇപ്പോഴിതാ ആരാധകരുടെ വിമര്‍ശനം തെറ്റായിരുന്നില്ലെന്ന തരത്തില്‍ ഇത്തവണയും പരാഗ് വന്‍ പരാജയമായിരിക്കുകയാണ്. മധ്യനിരയില്‍ ബാറ്റിങ്ങിനിറങ്ങി ഒന്നും ചെയ്യാനാവാതെ മടങ്ങുന്ന പരാഗ് പന്തുകൊണ്ടും കാര്യമായൊന്നും കാട്ടുന്നില്ല. സഞ്ജു പരാഗിനെ ഇത്തവണ അധികം ബൗളിങ്ങിലേക്ക് പരിഗണിച്ചിട്ടേയില്ല. കെകെആറിനെതിരായ അവസാന മത്സരത്തില്‍ മൂന്ന് പന്തില്‍ അഞ്ച് റണ്‍സാണ് പരാഗ് നേടിയത്. ഇതോടെ പരാഗിനെതിരേ ട്വിറ്ററില്‍ ട്രോള്‍ മഴയാണ്.

കെജിഎഫ് 2ലെ ഡയലോഗ് കൂട്ടിച്ചേര്‍ത്തൊക്കെയാണ് പരാഗിനെതിരേ ട്രോളുകള്‍ ഉയരുന്നത്. 'ഞാന്‍ രാജസ്ഥാനെ ഇഷ്ടപ്പെടുന്നില്ല, എന്നാല്‍ രാജസ്ഥാന്‍ എന്നെ ഇഷ്ടപ്പെടുന്നു' എന്നൊക്കെയാണ് പരാഗിന്റെ ചിത്രത്തോടൊപ്പം ട്രോളുകള്‍ ഉണ്ടായിരിക്കുന്നത്. രാജസ്ഥാന്റെ കുഞ്ഞുവാവയാണെന്നും ഡാന്‍സ് കളിക്കാന്‍ മാത്രമാണ് അവന് അറിയാവുന്നതെന്നും എന്തിനാണ് ഇനിയും ടീമിലേക്ക് പരിഗണിക്കുന്നതെന്നാണ് ആരാധകര്‍ ചോദിക്കുന്നത്. രാജസ്ഥാന്റെ ഉടമകളിലാരെങ്കിലും പരാഗിന്റെ ബന്ധുക്കളുണ്ടോയെന്നാണ് മറ്റ് ചില ആരാധകരുടെ സംശയം.

ഇത്രയും മോശം പ്രകടനം നടത്തിയിട്ടും അവനെ മാത്രം എന്തുകൊണ്ടാണ് രാജസ്ഥാന്‍ മാറ്റാത്തതെന്നാണ് ആരാധകര്‍ ചോദിക്കുന്നത്. ആറ് മത്സരത്തില്‍ നിന്ന് നേടിയത് വെറും 48 റണ്‍സ്. ശരാശരി 9.60, സ്‌ട്രൈക്കറേറ്റ് 133.33. വരുന്നതിലും വേഗം മടങ്ങും. എന്നിട്ടും ടീമില്‍ സ്ഥിരം ഇടം. എന്തിനാണ് ഇങ്ങനെ ആരാധകരെ നിരാശരാക്കുന്നതെന്നാണ് മറ്റ് ചിലര്‍ ചോദിക്കുന്നത്. ബാറ്റുകൊണ്ടും പന്തുകൊണ്ടും താരത്തിനെക്കൊണ്ട് ഉപകാരമില്ല. സമീപകാലത്തൊന്നും തിളങ്ങിയിട്ടുമില്ല. ഈ സാഹചര്യത്തില്‍ വീണ്ടും വീണ്ടും പരാഗിനെ പ്ലേയിങ് 11ലേക്ക് പരിഗണിക്കുന്നതാണ് ആരാധകര്‍ ചോദ്യം ചെയ്യുന്നത്.

അതേ സമയം പരാഗിനെ പിന്തുണച്ച് രാജസ്ഥാന്‍ റോയല്‍സിന്റെ ബൗളിങ് പരിശീലകന്‍ ലസിത് മലിംഗ രംഗത്തെത്തി. 5 -10 പന്തുകള്‍ മാത്രമാണ് അവന് ബാറ്റ് ചെയ്യാന്‍ ലഭിക്കുന്നതെന്നും അതിവേഗം റണ്‍സുയര്‍ത്താന്‍ ശ്രമിക്കുന്നതിനിടെ വിക്കറ്റുകള്‍ നഷ്ടമാവാന്‍ സാധ്യത കൂടുതലാണെന്നുമെല്ലാമുള്ള ന്യായീകരണങ്ങളാണ് മലിംഗ ഉന്നയിക്കുന്നത്.

'പരാഗിന്റെ ഫോമിനെക്കുറിച്ച് വലിയ ചര്‍ച്ചയാക്കേണ്ട കാര്യമുണ്ടെന്ന് കരുതുന്നില്ല. ഒറ്റക്ക് മത്സരം ജയിപ്പിക്കാനുള്ള റിയാന്‍ പരാഗിന്റെ കഴിവ് എല്ലാവര്‍ക്കും അറിയാവുന്നതാണ്. വിശാല മനസുള്ള താരമാണവന്‍. വലിയ അവസരം ഇത്തവണ അവനെ തേടിയെത്തിയിട്ടില്ല. അഞ്ചോ പത്തോ മത്സരങ്ങള്‍ പന്തുകള്‍ മാത്രമാണ് എല്ലാ മത്സരത്തിലും അവന് ലഭിക്കുന്നത്. അവന്‍ ശക്തമായി തിരിച്ചുവരുമെന്നുറപ്പുണ്ട്. ടോപ് ഓഡറിലേക്ക് അവനെ എത്തിച്ചാല്‍ കൂടുതല്‍ മികച്ച പ്രകടനം നടത്താനാവും. അതിന് സമയമാവുമ്പോള്‍ കൃത്യമായി ചെയ്യും. അവന്‍ ഇപ്പോള്‍ ചെറുപ്പമാണ്. ഭാവിയിലെ സൂപ്പര്‍ താരമായിരിക്കും അവനെന്ന് എനിക്കുറപ്പുണ്ട്'- മലിംഗ പറഞ്ഞു.