IPL 2021: അടി കിട്ടുമോ എന്ന പേടി; കുട്ടി ക്രിക്കറ്റില്‍ അശ്വിന് പിഴയ്ക്കുന്നതിന്റെ കാരണം

മത്സരത്തിലുടനീളം അശ്വിന്‍ പുതിയ ഡെലിവറികള്‍ പരീക്ഷിക്കുന്നത് കണ്ടിരുന്നു. കേദാര്‍ ജാദവിന്റേതിന് സമാനമായ ഡെലിവറിയും അശ്വിന്‍ പരീക്ഷിച്ചിരുന്നു. എന്നാല്‍ ഇതൊന്നും ഫലം കണ്ടിട്ടില്ല. അലിയും സംഘവും അശ്വിനെ പൊതിരെ തല്ലുകയായിരുന്നു. നാല് സിക്‌സും നാല് ഫോറുമാണ് അശ്വിന്‍ വഴങ്ങിയത്.

അശ്വിനെ ലെഗ് സ്പിന്നറായ അമിത് മിശ്രയോയാണ് മഞ്ചരേക്കര്‍ താരതമ്യം ചെയ്തത്. മിശ്രയുടെ ബോളിംഗ് ഫോര്‍മാറ്റിന് അനുസരിച്ച് മാറുന്നില്ലെന്നാണ് മഞ്ചരേക്കര്‍ ചൂണ്ടിക്കാണിച്ചത്. അശ്വിന്‍ വേരിയേഷനുകളിലൂടെ പണിഷ്‌മെന്റില്‍ നിന്നും രക്ഷപ്പെടാന്‍ ശ്രമിക്കുകയാണ്. എന്നാല്‍ ഇതിലൂടെ സ്വന്തം കരുത്തിനെ തന്നെ കാണാതെ പോവുന്നുവെന്നും അദ്ദേഹം അഭിപ്രായപ്പെട്ടു.

''അമിത് മിശ്ര ടെസ്റ്റിലും ട്വന്റി-20യിലും ഒരുപോലെയാണ് പന്തെറിയുന്നത്. തന്റെ കരുത്തിലാണ് അയാള്‍ ഉറച്ചു നില്‍ക്കുന്നത്. പന്തിനെ ടേണ്‍ ചെയ്യാനാണ് അയാളുടെ ശ്രമം. എന്നാല്‍ അശ്വിന്‍ ഓഫ് സ്പിന്‍ എറിയുന്നില്ല. വൈറ്റ് ബോള്‍ ക്രിക്കറ്റില്‍ അശ്വിന്‍ ഓഫ് സ്പിന്‍ ചെയ്യുന്നില്ല. ടെസ്റ്റില്‍ അതാണ് അയാളുടെ പ്രധാന ആയുധം. വൈറ്റ് ബോളില്‍ വേറെ കുറേയുണ്ട്. പോസ്, റൗണ്ട് ആം ഡെലിവറിയൊക്കെ. അതൊന്നും എനിക്കത്ര ഇഷ്ടമായിട്ടില്ല'' മഞ്ചരേക്കര്‍ പറയുന്നു.

''എനിക്ക് തോന്നുന്നത് വൈറ്റ് ബോളില്‍ കളിക്കുമ്പോള്‍ അടി വാങ്ങാതിരിക്കാനാണ് അശ്വിന്‍ ശ്രമിക്കുന്നത് എന്നാണ്. അതിനാണ് ഈ വേരിയേഷനുകളൊക്കെ പരീക്ഷിക്കുന്നത്. പക്ഷെ അതുവഴി സ്വന്തം കരുത്തുകളില്‍ നിന്നും അകലുകയാണ്. അയാളൊരു നല്ല ഓഫ് സ്പിന്നറാണ്. ഇതോടെ അയാള്‍ ടേണ്‍ ചെയ്യുന്ന പന്തുകള്‍ എറിയാതെ വരികയാണ്''. അദ്ദേഹം കൂട്ടിച്ചേര്‍ത്തു.

അതേസമയം അശ്വിന്റെ മോശം പ്രകടനം ഡല്‍ഹിയെ കാര്യമായി ബാധിച്ചിരുന്നില്ല. പേസ് ബോളിംഗിന്റെ കരുത്തില്‍ ചെന്നൈയെ പിടിച്ചു കെട്ടാന്‍ ഡല്‍ഹിയ്ക്ക് സാധിച്ചിരുന്നു. പിന്നാലെ ഓപ്പണര്‍മാരായ ശിഖര്‍ ധവാനും പൃഥ്വി ഷായും ചേര്‍ന്ന് നല്‍കിയ മികച്ച തുടക്കത്തിന്റെ കരുത്തില്‍ ഡല്‍ഹി ക്യാപിറ്ല്‍സ് വിജയം നേടുകയായിരുന്നു. കിരീട സാധ്യത കല്‍പ്പിക്കുന്ന ഡല്‍ഹിയ്ക്ക് നന്നായി തന്നെ ഈ സീസണ്‍ ആരംഭിക്കാന്‍ സാധിച്ചു.