ഇന്ത്യന്‍ ടീമിലെത്താന്‍ ഇനിയെന്ത് വേണം? ദയവ് ചെയ്ത് ഈ താരത്തിന്റെ റെക്കോര്‍ഡ് നോക്കൂ- ഭാജി

ഇനിയെന്താണ് ചെയ്യേണ്ടത്?

ട്വിറ്ററിലൂടെയാണ് സൂര്യകുമാര്‍ യാദവിനെതിരായ അവഗണനയെ ഹര്‍ഭജന്‍ ചോദ്യം ചെയ്തത്. ടീം ഇന്ത്യയിലേക്കു തിരഞ്ഞെടുക്കപ്പെടാന്‍ ഇനിയെന്താണ് സൂര്യകുമാര്‍ യാദവ് ചെയ്യേണ്ടതെന്നറിയില്ല. എല്ലാ ഐപിഎല്ലുകളിലും രഞ്ജി സീസണുകളിലും അദ്ദേഹം നന്നായി പെര്‍ഫോം ചെയ്യുന്നുണ്ട്. വ്യത്യസ്ത ആളുകള്‍ക്കു വ്യത്യസ്ത നിയമങ്ങളാണെന്നാണ് താന്‍ ഊഹിക്കുന്നത്. ദയവ് ചെയ്ത് സൂര്യകുമാര്‍ യാദവിന്റെ റെക്കോര്‍ഡുകള്‍ ഒന്നു പരിശോധിക്കണമെന്ന് എല്ലാ സെലക്ടര്‍മാരോടും അഭ്യര്‍ഥിക്കുകയാണ് എന്നായിരുന്നു ഭാജിയുടെ ട്വീറ്റ്.

സാങ്കേതികത്തികവുള്ള ബാറ്റ്‌സ്മാന്‍

അന്താരാഷ്ട്ര ക്രിക്കറ്റില്‍ കളിക്കാന്‍ ശേഷിയുള്ള സാങ്കേതികത്തികവുള്ള് ബാറ്റ്‌സ്മാനാണ് സൂര്യകുമാര്‍ യാദവ്. ഐപിഎല്ലില്‍ താരത്തിന്റെ ചില തകര്‍പ്പന്‍ ഷോട്ടുകള്‍ ഇത് അടിവരയിടുന്നു. 10 ഇന്നിങ്‌സുകളില്‍ നിന്നും രണ്ടു ഫിഫ്റ്റികളടക്കം അദ്ദേഹം ഈ സീസണില്‍ മുംബൈയ്ക്കു വേണ്ടി 283 റണ്‍സെടുത്തിട്ടുണ്ട്. പുറത്താവാതെ നേടിയ 79 റണ്‍സാണ് ഉയര്‍ന്ന സ്‌കോര്‍.
ഇതാദ്യമായല്ല ഐപിഎല്ലിലും ആഭ്യന്തര ക്രിക്കറ്റിലും തിളങ്ങിയിട്ടും യാദവ് തഴയപ്പെടുന്നത്. മുന്‍ സീസണുളിലെല്ലാം ഇതു സ്ഥിരം സംഭവമാണ്.

യാദവിന്റെ പ്രകടനം

കരിയറില്‍ 77 ഫസ്റ്റ് ക്ലാസ് മല്‍സരങ്ങളും 93 ലിസ്റ്റ് എ മല്‍സരങ്ങളും യാദവ് ഇതിനകം കളിച്ചു കഴിഞ്ഞു. ഫസ്റ്റ് ക്ലാസ് ക്രിക്കറ്റില്‍ 44ന് മുകൡ ശരാശരിയില്‍ 5326 റണ്‍സ് താരം നേടിയിട്ടുണ്ട്. ലിസ്റ്റ് ക്രിക്കറ്റിലാവട്ടെ 93 മല്‍സരങ്ങളില്‍ 2447 റണ്‍സാണ് യാദവിന്റെ സമ്പാദ്യം.
160 ടി20 മല്‍സരങ്ങളിലും യാദവ് കളിച്ചിട്ടുണ്ട്. 17 ഫിഫ്റ്റികളോടെ 3295 റണ്‍സാണ് അദ്ദേഹം നേടിയത്. ഐപിഎല്ലിലേക്കു വന്നാല്‍ 91 മല്‍സരങ്ങളില്‍ നിന്നും 28 ശരാശരിയില്‍ 134ന് മുകളലില്‍ സ്‌ട്രൈക്ക്‌റേറ്റോടെ 1831 റണ്‍സ് യാദവ് നേടിയിട്ടുണ്ട്.