ധോണിയെ ഞെട്ടിച്ച് സാം ബില്ലിംഗ്‌സിന്റെ ക്യാച്ച്... കണ്ടാല്‍ നിങ്ങളും ഞെട്ടും

വെടിക്കെട്ട് ബാറ്റിംഗും ഞെരിപ്പന്‍ ബൗളിംഗും മാത്രമല്ല, തട്ടുപൊളിപ്പന്‍ ഫീല്‍ഡിങിന്റെയും കൂടി കളിയാണ് ഐ പി എല്‍. അവിശ്വസനീയമായ കുറേ ക്യാച്ചുകള്‍ ഓരോ സീസണിലും ഐ പി എല്‍ ആരാധകര്‍ക്കായി നല്‍കാറുണ്ട്. ഹര്‍ദീക് പാണ്ഡ്യ, എ ബി ഡിവില്ലിയേഴ്‌സ്, ക്രിസ് ലിന്‍ എന്നിവരാണ് ഈ സീസണിലെ ഞെട്ടിക്കുന്ന ക്യാച്ചുകളുടെ ഉടമ. എന്നാല്‍ ആരാധകര്‍ ഏറ്റവും ഓര്‍ത്തിരിക്കുന്ന മറ്റൊരു ക്യാച്ചുണ്ട്, ബാംഗ്ലൂരിന് വേണ്ടി വാട്‌സനും വീസയും ചേര്‍ന്ന് എടുത്തത്.

എന്നാല്‍ ഈ ക്യാച്ചുകളെയെല്ലാം നിഷ്പ്രഭമാക്കുന്ന മറ്റൊരു ക്യാച്ച് കൂടി ഐ പി എല്ലില്‍ പിറന്നു. ഡല്‍ഹി ഡെയര്‍ഡെവിള്‍സ് - പുനെ സൂപ്പര്‍ ജയന്റ്‌സ് മത്സരത്തിനിടെയായിരുന്നു സംഭവം. പുറത്തായത് ഇന്ത്യന്‍ ക്യാപ്റ്റന്‍ എം എസ് ധോണി. ക്യാച്ചെടുത്തത് ഓസ്‌ട്രേലിയയുടെ യുവതാരം സാം ബില്ലിംഗ്‌സ്. വിക്കറ്റ് കീപ്പറാണെങ്കിലും ബില്ലിംഗ്‌സിന് ബൗണ്ടറിയില്‍ ഫീല്‍ഡ് ചെയ്യാനാണ് അവസരം കിട്ടിയത്.

പത്തൊമ്പതാം ഓവറിന്റെ ഒന്നാം പന്തിലായിരുന്നു സിക്‌സ് എന്നുറപ്പിച്ച പന്ത് സാം ബില്ലിംഗ്‌സ് മനോഹരമായ ഒരു ഡൈവിലൂടെ കൈപ്പിടിയില്‍ ഒതുക്കിയത്. ബൗണ്ടറിയില്‍ തൊട്ടു തൊട്ടു എന്ന തരത്തില്‍ രണ്ടോ മൂന്നോ തവണയെങ്കിലും മറിഞ്ഞ ശേഷമാണ് ബില്ലിംഗ്‌സ് ഈ ക്യാച്ച് പൂര്‍ത്തിയാക്കിയത് എന്നതാണ് ഇതിലെ പ്രത്യേകത. സിക്‌സ് എന്നുറപ്പിച്ച ഷോട്ട് ബില്ലിംഗ്‌സിന്റെ കയ്യില്‍ ഒതുങ്ങുന്നത് കണ്ട് അതിശയിച്ചാണ് ധോണി ക്രീസ് വിട്ടത്.

ധോണി പുറത്തായെങ്കിലും കളി പുനെ സൂപ്പര്‍ ജയന്റ്‌സ് അനായാസം ജയിച്ചു. ജയിക്കാന്‍ 163 റണ്‍സ് വേണ്ടിയിരുന്ന പുനെ 7 വിക്കറ്റിനാണ് കളി ജയിച്ചത്. അര്‍ധസെഞ്ചുറിയോടെ പുറത്താകാതെ നിന്ന അജിന്‍ക്യ രഹാനെ മാന്‍ ഓഫ് ദ മാച്ചായി. 20 പന്തില്‍ ഒരു ഫോറും രണ്ട് സിക്‌സും സഹിതം ധോണി 27 റണ്‍സാണ് എടുത്തത്.