ബുംറയ്ക്കും സെഞ്ച്വറി? കാത്തിരിക്കുന്നത് സൂപ്പര്‍ റെക്കോര്‍ഡ്, നേടിയാല്‍ ഷമിക്കൊപ്പം

വേഗത്തില്‍ 100 വിക്കറ്റ്

ഏകദിനത്തില്‍ അതിവേഗത്തില്‍ 100 വിക്കറ്റ് തികയ്ക്കുന്ന ലോകത്തിലെ ആറാമത്തെ ബൗളറെന്ന റെക്കോര്‍ഡാണ് ബുംറയെ കാത്തിരിക്കുന്നത്. ബംഗ്ലാദേശിനെതിരേ അഞ്ചു വിക്കറ്റ് വീഴ്ത്താനായാല്‍ ബുംറയ്ക്കു റെക്കോര്‍ഡ് തീര്‍ക്കാം. താരത്തിന്റെ കരിയറിലെ 56ാം ഏകദിനമാണിത്.
ഇത്രയും മല്‍സരങ്ങളില്‍ നിന്നു തന്നെ 100 വിക്കറ്റെടുത്ത ടീമംഗം മുഹമ്മദ് ഷമിയുടെ റെക്കോര്‍ഡ് പങ്കിടാനും ബുംറയ്ക്കു കഴിയും. ഷമിയെക്കൂടാതെ ന്യൂസിലാന്‍ഡിന്റെ സ്റ്റാര്‍ പേസറായ ട്രെന്റ് ബോള്‍ട്ടും ഇത്രയും കളികളിലാണ് വിക്കറ്റ് കൊയ്ത്തില്‍ സെഞ്ച്വറി പൂര്‍ത്തിയാക്കിയത്.

10 വിക്കറ്റുകള്‍

നിലവില്‍ ഇന്ത്യക്കു വേണ്ടി ടൂര്‍ണമെന്റില്‍ കളിച്ച ആറു മല്‍സരങ്ങളില്‍ നിന്നും 10 വിക്കറ്റുകളാണ് ബുംറ വീഴ്ത്തിയത്. ഇതില്‍ ഒരു നാലു വിക്കറ്റ് നേട്ടമോ, അഞ്ച് വിക്കറ്റ് നേട്ടമോ ഇല്ല. ലോക റാങ്കിങില്‍ തലപ്പത്തുള്ള ബുംറയില്‍ നിന്നും ഇതിനേക്കാള്‍ മികച്ച പ്രകടനമാണ് ഇനന്ത്യ പ്രതീക്ഷിക്കുന്നത്.
വെറും മൂന്നു മല്‍സരങ്ങള്‍ മാത്രം കളിച്ച് 13 വിക്കറ്റുകളുമായി ടീമംഗം മുഹമ്മദ് ഷമി കസറുമ്പോഴാണ് ബുംറയ്ക്കു വിക്കറ്റ് ദാരിദ്ര്യം നേരിടുന്നത്. ഷമി ഒരു തവണ അഞ്ച് വിക്കറ്റ് നേട്ടവും രണ്ടു തവണ നാലു വിക്കറ്റ് നേട്ടവും ടൂര്‍ണമെന്റില്‍ കൈവരിച്ചു കഴിഞ്ഞു.

വേറെയും ചില നാഴികക്കല്ലുകള്‍

ഇന്ത്യയും ബംഗ്ലാദേശും തമ്മിലുള്ള മല്‍സരത്തില്‍ വേറെയും ചില നാഴികക്കല്ലുകള്‍ ഇരുടീമിലെയും താരങ്ങളെ കാത്തിരിക്കുന്നുണ്ട്. ഇവ എന്തൊക്കെയെന്നു നോക്കാം.
ഈ വര്‍ഷം 1000 റണ്‍സ് തികയ്ക്കാന്‍ രോഹിത് ശര്‍മയ്ക്ക് നാലും വിരാട് കോലിക്ക് ഏഴും റണ്‍സ് കൂടി മതി.
31 റണ്‍സെടുത്താല്‍ വിരാട് കോലിക്ക് ലോകകപ്പില്‍ 1000 റണ്‍സ് പൂര്‍ത്തിയാക്കാം.
ഒരു വിക്കറ്റ് നേടിയാല്‍ ഹര്‍ദിക് പാണ്ഡ്യ ഏകദിനത്തില്‍ 50 വിക്കറ്റുകള്‍ തികയ്ക്കും.
53 റണ്‍സ് നേടാനായാല്‍ ബംഗ്ലാദേശ് താരം മഹമ്മൂദുള്ളയ്ക്കു ഏകദിനത്തില്‍ 4000 റണ്‍സ് ക്ലബ്ബില്‍ അംഗമാവാം. നിലവില്‍ മൂന്നു ബംഗ്ലാദേശ് താരങ്ങള്‍ മാത്രമേ എലൈറ്റ് ലിസ്റ്റിലുള്ളൂ.