വിദേശത്ത് കോലി ഇനി ഇന്ത്യയുടെ 'ദാദ', സാക്ഷാല്‍ ഗാംഗുലിയെ പിന്തള്ളി... ധോണിക്കൊപ്പം

ദാദയുടെ റെക്കോര്‍ഡ് തിരുത്തി

വിദേശത്തു ഏറ്റവുമധികം ടെസ്റ്റ് വിജയങ്ങള്‍ സ്വന്തമാക്കിയ ഇന്ത്യന്‍ നായകനെന്ന സൗരവ് ഗാംഗുലിയുടെ റെക്കോര്‍ഡാണ് കോലി തിരുത്തിയത്. വിന്‍ഡീസിനെതിരായ ടെസ്റ്റിനു മുമ്പ് ദാദയോടൊപ്പം റെക്കോര്‍ഡ് പങ്കിടുകയായിരുന്നു കോലി.
വിദേശത്തു കോലിയുടെ നായത്വത്തില്‍ 12ാം വിജയമാണ് വിന്‍ഡീസിനെതിരേ ഇന്ത്യ ആഘോഷിച്ചത്. 26 ടെസ്റ്റുകളില്‍ വിദേശത്തു ഇന്ത്യയെ നയിച്ച കോലിക്കു ഇതില്‍ 12ലും ടീമിനു ജയം നേടിത്തരാന്‍ കഴിഞ്ഞു. ഒമ്പതു ടെസ്റ്റുകളില്‍ മാത്രമേ ഇന്ത്യ തോറ്റിട്ടുള്ളൂ. ഗാംഗുലിയേക്കാള്‍ കുറച്ചു ടെസ്റ്റുകളിലാണ് കോലി ഇത്രയും വലിയ നേട്ടം കൈവരിച്ചത്. ഗാംഗുലിക്കു കീഴില്‍ വിദേശത്ത് 28 ടെസ്റ്റുകൡ 11ല്‍ ഇന്ത്യ ജയിച്ചപ്പോള്‍ എംഎസ് ധോണിക്കു കീഴില്‍ 30 ടെസ്റ്റുകളില്‍ ആറെണ്ണത്തില്‍ മാത്രമേ ഇന്ത്യ ജയിച്ചിട്ടുള്ളൂ.

ധോണിയുടെ റെക്കോര്‍ഡിനൊപ്പം

ഗാംഗുലിയെ പിന്നിലാക്കുക മാത്രമല്ല മറ്റൊരു മുന്‍ ഇതിഹാസ നായകന്‍ എംഎസ് ധോണിയുടെ റെക്കോര്‍ഡിനൊപ്പമെത്താനും കോലിക്കു കഴിഞ്ഞു. ഏറ്റവുമധികം ടെസ്റ്റുകളില്‍ ഇന്ത്യക്കു ജയം സമ്മാനിച്ച നായകനെന്ന ധോണിയുടെ റെക്കോര്‍ഡിനൊപ്പമാണ് അദ്ദേഹമെത്തിയത്. ഇരുവര്‍ക്കും കീഴില്‍ 27 ടെസ്റ്റുകളിലാണ് ഇന്ത്യ വെന്നിക്കൊടി പാറിച്ചത്.
ഇന്ത്യക്കു 27 ടെസ്റ്റ് വിജയങ്ങള്‍ നേടിത്തരാന്‍ കോലിക്കു 47 ടെസ്റ്റുകള്‍ മാത്രമേ വേണ്ടിവന്നുള്ളൂവെങ്കില്‍ 60 ടെസ്റ്റുകളിലായിരുന്നു ധോണിയുടെ നേട്ടം.

കോലിയുടെ പ്രതികരണം

വിന്‍ഡീസിനെതിരായ ആദ്യ ടെസ്റ്റില്‍ ടീമിന്റെ പ്രകടനത്തില്‍ ഏറെ സന്തുഷ്‌നാണെന്നായിരുന്നു ജയത്തിനു ശേഷം കോലിയുടെ പ്രതികരണം. ഓള്‍റൗണ്ട് പ്രകടനമാണ് മല്‍സരത്തില്‍ താരങ്ങള്‍ നടത്തിയത്. മികച്ച ബൗളിങ് കോമ്പിനേഷനാണ് ടീമിന്റേത്. എല്ലാവരും തങ്ങളുടെ റോളുകള്‍ ഭംഗിയാക്കി. ടീം സെലക്ഷന്റെ കാര്യത്തില്‍ എല്ലായ്‌പ്പോഴും പുറത്തു നിന്നു അഭിപ്രായപ്രകടനങ്ങളുണ്ടാവാറുണ്ട്. ഒരു ഉത്തരവാദിത്വമാണ് താന്‍ നിറവേറ്റുന്നത്. ഒന്നിലധികം രീതിയില്‍ ടീമിനെ സേവിക്കാന്‍ തനിക്കു കഴിയുന്നത് വലിയ അനുഗ്രഹമാണ്. ടീമില്ലെങ്കില്‍ ഒന്നും നടക്കില്ല. തീരുമാനങ്ങളെടുക്കാന്‍ മാത്രമേ തനിക്കാവൂ, അത് നടപ്പാക്കേണ്ടത് ഓരോ വ്യക്തികളുമാണെന്നും കോലി വിശദമാക്കി.

ആധികാരിക വിജയം

വിന്‍ഡീസിനെതിരായ ടെസ്റ്റില്‍ ആധികാരികമായിരുന്നു ഇന്ത്യയുടെ വിജയം. 419 റണ്‍സിന്റെ വന്‍ വിജയലക്ഷ്യമാണ് വിന്‍ഡീസിന് കോലിയും സംഘവും നല്‍കിയത്. പക്ഷെ ഒരു ദിവസം ശേഷിക്കെ വെറും 100 റണ്‍സില്‍ വിന്‍ഡീസിനെ എറിഞ്ഞിടാന്‍ ഇന്ത്യക്കു കഴിഞ്ഞു. പേസര്‍മാരായ ജസ്പ്രീത് ബുംറ, ഇഷാന്ത് ശര്‍മ, മുഹമ്മദ് ഷമി എന്നിവര്‍ ചേര്‍ന്നാണ് കരീബിയക്കാരുടെ കഥ കഴിച്ചത്. ബുംറ അഞ്ചു വിക്കറ്റ് കൊയ്തപ്പോള്‍ ഇഷാന്ത് മൂന്നും ഷമി രണ്ടും വിക്കറ്റെടുത്തു.