IND vs SL: പരമ്പരയില്‍ പിങ്ക് ബോള്‍ ടെസ്റ്റും, ഐപിഎല്‍ മൂന്ന് വേദികളില്‍- വ്യക്തമാക്കി ഗാംഗുലി

വിരാട് കോലിയുടെ 100ാമത്തെ ടെസ്റ്റ് മത്സരമെന്ന നിലയില്‍ പിങ്ക് ബോള്‍ ടെസ്റ്റ് ശ്രദ്ധ പിടച്ചുപറ്റുന്നു. കഴിഞ്ഞ രണ്ടര വര്‍ഷത്തിലേറെയായി സെഞ്ച്വറി നേടാന്‍ കോലിക്ക് സാധിച്ചിരുന്നില്ല. അവസാനമായി കോലി സെഞ്ച്വറി നേടിയത് 2019ലെ പിങ്ക് ബോള്‍ ടെസ്റ്റിലാണ്. ബംഗ്ലാദേശിനെതിരേ കൊല്‍ക്കത്തയിലായിരുന്നു ഈ പ്രകടനം. ഇതിന് ശേഷം ഒരു ഫോര്‍മാറ്റിലും അദ്ദേഹത്തിന് സെഞ്ച്വറി നേടാനായിട്ടില്ല. അതുകൊണ്ട് തന്നെ മറ്റൊരു പിങ്ക് ബോള്‍ ടെസ്റ്റ് വരുമ്പോള്‍ കോലി സെഞ്ച്വറിക്കായുള്ള കാത്തിരിപ്പ് അവസാനിപ്പിക്കുമെന്ന പ്രതീക്ഷയിലാണ് ആരാധകര്‍.

ബംഗളൂരുവിലാണ് പിങ്ക് ബോള്‍ ടെസ്റ്റ് നടക്കാനുള്ളത്. ഐപിഎല്ലിലൂടെ കോലിക്ക് കളിച്ച് വലിയ അനുഭവസമ്പത്തുള്ള മൈതാനമാണ് ബംഗളൂരുവിലേത്. അതുകൊണ്ട് തന്നെ കോലി സെഞ്ച്വറിയോടെ തിരിച്ചുവരുമെന്ന് തന്നെയാണ് പ്രതീക്ഷിക്കുന്നത്. മൂന്ന് ഫോര്‍മാറ്റിലും നായകസ്ഥാനം രാജിവെച്ച കോലി നിലവില്‍ ബാറ്റിങ്ങില്‍ ശ്രദ്ധിക്കാനുള്ള തീരുമാനത്തിലാണ്. കോലിയുടെ പ്രകടനം ശരാശരി നിലവാരത്തില്‍ നിന്ന് താഴോട്ട് പോയിട്ടില്ലെങ്കിലും മൂന്നക്ക സംഖ്യയിലേക്ക് എത്താനാകുന്നില്ലെന്നതാണ് പ്രശ്‌നം. ശ്രീലങ്കയ്‌ക്കെതിരേ കോലി ഈ കാത്തിരിപ്പ് അവസാനിപ്പിക്കുമെന്ന് തന്നെ പ്രതീക്ഷിക്കാം,

ഐപിഎല്ലിനെക്കുറിച്ചുള്ള നിര്‍ണ്ണായകമായ ചില സൂചനകളും ഗാംഗുലി നല്‍കി. ഇന്ത്യയില്‍ത്തന്നെ ടൂര്‍ണമെന്റ് നടത്താനാണ് ബിസിസി ഐ ആലോചിക്കുന്നതെന്നാണ് ഗാംഗുലി വ്യക്തമാക്കിയത്. കോവിഡ് വ്യാപനം രൂക്ഷമായില്ലെങ്കില്‍ ഇന്ത്യയില്‍ത്തന്നെ ടൂര്‍ണമെന്റ് നടത്താനാണ് സാധ്യത. 2020ല്‍ പൂര്‍ണ്ണമായും യുഎഇയില്‍ ടൂര്‍ണമെന്റ് നടത്തിയപ്പോള്‍ 2021ന്റെ ആദ്യ പാദം ഇന്ത്യയിലും രണ്ടാം പാദം യുഎഇയിലുമായാണ് പൂര്‍ത്തിയാക്കിയത്. ഇത്തവണയും കോവിഡ് സാഹചര്യം പ്രതികൂലമാണെങ്കിലും ഇന്ത്യയില്‍ത്തന്നെ ടൂര്‍ണമെന്റ് നടത്താമെന്ന പ്രതീക്ഷയിലാണ് ബിസിസി ഐ.

'ഈ വര്‍ഷം കോവിഡ് പ്രതികൂലമായില്ലെങ്കില്‍ ഇന്ത്യയില്‍ത്തന്നെ ഐപിഎല്‍ നടക്കും. വേദികളെക്കുറിച്ച് പറഞ്ഞാല്‍ മുംബൈ, പൂനെ, മഹാരാഷ്ട്ര എന്നിവടങ്ങളില്‍ നടത്താമെന്നാണ് കരുതുന്നത്. നോക്കൗട്ട് മത്സരങ്ങളുടെ വേദി ഇനിയും തീരുമാനിക്കേണ്ടിയിരിക്കുന്നു' -ഗാംഗുലി കൂട്ടിച്ചേര്‍ത്തു. നിലവിലെ കോവിഡ് സാഹചര്യത്തില്‍ ഇന്ത്യയില്‍ അടച്ചിട്ട വേദിയില്‍ ടൂര്‍ണമെന്റ് നടത്തുന്നത് പോലും വലിയ സാഹസികതയാണെന്ന് തന്നെ പറയാം.

15ാം സീസണിന് മുന്നോടിയായുള്ള മെഗാ താരലേലം 12,13 തീയ്യതികളിലായി ബംഗളൂരുവില്‍ നടക്കാന്‍ പോവുകയാണ്. 1200ലധികം താരങ്ങള്‍ രജിസ്റ്റര്‍ ചെയ്തതില്‍ നിന്ന് 590 താരങ്ങള്‍ അടങ്ങുന്ന ചുരുക്കപ്പട്ടിക കഴിഞ്ഞ ദിവസം പുറത്തുവിട്ടിരുന്നു. പുതിയതായി രണ്ട് ടീമുകള്‍ക്കൂടി എത്തുന്നതോടെ 10 ടീമുകള്‍ ഐപിഎല്ലിന്റെ 15ാം സീസണിലുണ്ടാവും. വാശിയേറിയ ലേലം ഇത്തവണ പ്രതീക്ഷിക്കപ്പെടുന്നുണ്ട്. ലേലത്തിന്റെ പ്രതിഫല റെക്കോഡ് തകര്‍ക്കാന്‍ കെല്‍പ്പുള്ള നിരവധി താരങ്ങള്‍ ഇത്തവണ മെഗാ ലേലത്തിലുണ്ടെന്നത് ആരാധകരുടെയും ആവേശം ഉയര്‍ത്തുന്നു.