IND vs SA: ദക്ഷിണാഫ്രിക്കന്‍ ടീം ശക്തം, ഇന്ത്യ യുവതാരങ്ങളുമായി വന്നാല്‍ നാണം കെടും-ആകാശ്

'ദക്ഷിണാഫ്രിക്കന്‍ പരമ്പരയില്‍ രണ്ടാം നിര ടീമിനെ ഇറക്കാമെന്നാണ് കരുതുന്നതെങ്കില്‍ അത് പുനര്‍ ആലോചന നടത്തേണ്ടതാണ്. ഇന്ത്യയില്‍ പരമ്പര നേടുകയെന്ന ഉറച്ച ലക്ഷ്യത്തോടെയാവും ദക്ഷിണാഫ്രിക്ക എത്തുക. അതുകൊണ്ട് തന്നെ സെലക്ടര്‍മാരോടായി അഭ്യര്‍ത്ഥിക്കുകയാണ്. ദക്ഷിണാഫ്രിക്കന്‍ താരങ്ങള്‍ക്ക് വിശ്രമം ആവിശ്യമില്ലെങ്കില്‍ ഇന്ത്യയും പ്രമുഖ താരങ്ങള്‍ക്ക് വിശ്രമം നല്‍കരുത്. നിസാരമായാണ് പരമ്പരയെ കാണുന്നതെങ്കില്‍ നാട്ടില്‍ ഇന്ത്യക്ക് തോല്‍ക്കേണ്ടതായി വരും'- ആകാശ് ചോപ്ര പറഞ്ഞു.

ഇന്ത്യ ദക്ഷിണാഫ്രിക്ക, ഇംഗ്ലണ്ട് പരമ്പരകള്‍ക്കായി രണ്ട് ടീമുകളെ പ്രഖ്യാപിക്കാനുള്ള തയ്യാറെടുപ്പിലാണ്. ദക്ഷിണാഫ്രിക്കന്‍ പരമ്പരയില്‍ വിവിഎസ് ലക്ഷ്മണ്‍ ഇന്ത്യയെ പരിശീലിപ്പിക്കുമ്പോള്‍ രാഹുല്‍ ദ്രാവിഡിന്റെ പരിശീലനത്തിന് കീഴില്‍ ഇന്ത്യ ഇംഗ്ലണ്ട് പര്യടനത്തിന് പോവും. ഒരു ടെസ്റ്റും അഞ്ച് മത്സര ടി20 പരമ്പരയുമാണ് ഇന്ത്യയും ഇംഗ്ലണ്ടും തമ്മില്‍ കളിക്കുന്നത്. പരമ്പരക്കായി ജൂണ്‍ 15നാണ് ഇന്ത്യ ഇംഗ്ലണ്ടിലേക്ക് പോവുക. ഒരു സന്നാന മത്സരം 23ന് ഇന്ത്യ ഇംഗ്ലണ്ടില്‍ കളിക്കുന്നുണ്ട്. അതുകൊണ്ട് തന്നെ രണ്ട് ടീമിനെ പ്രഖ്യാപിക്കാതെ ഇന്ത്യക്ക് പരമ്പര കളിക്കാനാവില്ല.

നായകന്‍ രോഹിത് ശര്‍മ, വിരാട് കോലി, കെ എല്‍ രാഹുല്‍, റിഷഭ് പന്ത്, ജസ്പ്രീത് ബുംറ, ഭുവനേശ്വര്‍ കുമാര്‍ എന്നിവര്‍ക്കെല്ലാം ഇന്ത്യ വിശ്രമം നല്‍കിയേക്കും. പരിക്കേറ്റ രവീന്ദ്ര ജഡേജ, സൂര്യകുമാര്‍ യാദവ് എന്നിവരും ദക്ഷിണാഫ്രിക്കന്‍ പരമ്പരക്കുണ്ടാകില്ല. എന്നാല്‍ ഇവരെല്ലാം ഇംഗ്ലണ്ട് പര്യടനത്തിലുണ്ടാവും. ഇവരില്‍ മിക്കവരും രണ്ട് മാസത്തോളമായി ഐപിഎല്‍ കളിക്കുന്നവരാണ്. അതുകൊണ്ട് തന്നെ വിശ്രമം അനിവാര്യമാണ്. മെയ് 29നാണ് ഐപിഎല്‍ ഫൈനല്‍. ഇതിന് ശേഷം ഒരാഴ്ചപോലും വിശ്രമം ലഭിക്കുന്നതിന് മുന്നെ ദക്ഷിണാഫ്രിക്കന്‍ പരമ്പര കളിക്കേണ്ടി വരും. അതുകൊണ്ടാണ് സീനിയര്‍ താരങ്ങള്‍ക്ക് ഇന്ത്യ വിശ്രമം നല്‍കാന്‍ തീരുമാനിച്ചത്.

ദക്ഷിണാഫ്രിക്കന്‍ പരമ്പരയില്‍ ശിഖര്‍ ധവാന്‍ ഇന്ത്യയെ നയിക്കാനാണ് സാധ്യത. വൈസ് ക്യാപ്റ്റനായി ഹര്‍ദിക് പാണ്ഡ്യ എത്തിയേക്കും. ഉമ്രാന്‍ മാലിക്, തിലക് വര്‍മ, ആവേഷ് ഖാന്‍, അര്‍ഷദീപ് സിങ് തുടങ്ങിയ യുവതാരങ്ങളെയെല്ലാം ഇന്ത്യ പരിഗണിച്ചേക്കും. റുതുരാജ് ഗെയ്ക് വാദ്, ഇഷാന്‍ കിഷന്‍, സഞ്ജു സാംസണ്‍, ക്രുണാല്‍ പാണ്ഡ്യ, ശര്‍ദുല്‍ ഠാക്കൂര്‍ എന്നിവരും ടീമിലുണ്ടാവാനാണ് സാധ്യത. യുവതാരങ്ങളെ വിശ്വസിച്ചിറങ്ങുന്ന ഇന്ത്യന്‍ ടീമിന് എന്ത് അത്ഭുതമാണ് കാട്ടാനാവുകയെന്നത് കാത്തിരുന്ന് കാണണം. ടി20 ലോകകപ്പ് വരാനിരിക്കെ ഇന്ത്യയെ സംബന്ധിച്ച് ഓരോ പരമ്പരയും വളരെ പ്രധാനപ്പെട്ടതാണ്.