Click it and Unblock the Notifications
കാപ്റ്റന് രോഹിത് ശര്മയെയും വിരാട് കോലിയെയും ആദ്യ ഏകദിനത്തില് ഒരേ ഓവറിലായിരുന്നു ഇന്ത്യക്കു നഷ്ടമായത്. 14ാം ഓവറിലായിരുന്നു അല്സാറി ജോസഫിലൂടെ വിന്ഡീന്റെ ഇരട്ടപ്രഹരം. ആദ്യ ബോളില് രോഹിത്തിനെ അദ്ദേഹം വിക്കറ്റിനു മുന്നില് കുരുക്കുകയാിരുന്നു. രോഹിത് റിവ്യു എടുത്തെങ്കിലും തേര്ഡ് അംപയറുടെ തീരുമാനം ഔട്ട് എന്നു തന്നെയായിരുന്നു.
തുടര്ന്നെത്തിയ കോലി നേരിട്ട ആദ്യ ബോളില് ബൗണ്ടറിയടിച്ചാണ് തുടങ്ങിയത്. തൊട്ടടുത്ത ബോളില് അപ്പര് കട്ടിലൂടെ അദ്ദേഹം വീണ്ടുമൊരു ബൗണ്ടറി നേടി. മൂന്നാമത്തേത് വൈഡായിരുന്നു. നാലാമത്തെ ബോള് കോലി ഒഴിവാക്കി. അഞ്ചാമത്തേത് ഷോര്ട്ട് ബോളായിരുന്നു. പുള് ഷോട്ട് കളിച്ച അദ്ദേഹത്തിനു ടൈമിങ് പിഴച്ചപ്പോള് ഡീപ്പില് കെമര് റോച്ച് അനായാസം പിടികൂടുകയും ചെയ്തു.
ഇത്തരം ബോളുകളെ പരമ്പരയിലെ ഇനിയുള്ള മല്സരങ്ങളിലും വിരാട് കോലി സൂക്ഷിക്കണമെന്നു മുന്നറിയിപ്പ് നല്കിയിരിക്കുകയാണ് സുനില് ഗവാസ്കര്. സ്റ്റാര് സ്പോര്ട്സിന്റെ ഷോയില് സംസാരിക്കുകയായിരുന്നു അദ്ദേഹം. ഷോര്ട്ട് ബോളുകള് ഒഴിവാക്കാന് കോലി ആഗ്രഹിക്കുന്നില്ലെന്നും ഹുക്ക് ഷോട്ട് കളിക്കാന് എല്ലായ്പ്പോഴും ശ്രമിച്ചു കൊണ്ടിരിക്കുന്നതായും ഗവാസ്കര് ചൂണ്ടിക്കാട്ടി. ഈ സമീപനം ഒഴിവാക്കിയില്ലെങ്കില് ഇനിയും ഈ തരത്തില് പുറത്താവേണ്ടി വരുമെന്നു അദ്ദേഹം മുന്നറിയിപ്പ് നല്കുകയും ചെയ്തു.
കഴിഞ്ഞ സൗത്താഫ്രിക്കന് പര്യടനത്തിലെ ഏകദിന പരമ്പരയിലും വിരാട് കോലിക്കെതിരേ അവരുടെ ബൗളര്മാര് ഇതേ തന്ത്രം തന്നെയാണ് പയറ്റിയത്. ബൗണ്സറുകളെറിഞ്ഞ് കോലിയെക്കൊണ്ട് പുള് ഷോട്ടുകള് കളിക്കാന് അവര് പ്രേരിപ്പിച്ചുകൊണ്ടിരുന്നു. കാരണം കോലി ഇത്തരം ബോളുകള് ഒഴിവാക്കുന്നയാളല്ല. ഷോര്ട്ട് ബോളുകളില് ഹുക്ക് ഷോട്ടുകള് കളിക്കാന് അദ്ദേഹം ഇഷ്ടപ്പെടുന്നു. എന്നാല് ഒരു ബാറ്ററെ സംബന്ധിച്ചിടത്തോളം അവരുടെ നിയന്ത്രണത്തിലല്ലാത്ത ഷോട്ടാണിത്. ഇത്തരം ഷോട്ടുകളുടെ ഫലം എന്താവുമെന്നു പറയാന് കഴിയില്ലെന്നും ഗവാസ്കര് നിരീക്ഷിച്ചു.
വെസ്റ്റ് ഇന്ഡീസുമായുള്ള ആദ്യ ഏകദിനത്തില് വിരാട് കോലി പ്രതീക്ഷിച്ചതു പോലെ ഹുക്ക് ഷോട്ട് കളിക്കാനായില്ല. പന്ത് ഒരല്പ്പം കൂടുതല് ബൗണ്സ് ചെയ്തിരുന്നു. അതുകൊണ്ട് തന്നെ ബാറ്റിന്റെ മധ്യത്തില് പതിച്ചതുമില്ല. ബാറ്റില് എഡ്ജായ ശേഷമാണ് അതു ക്യാച്ചില് കലാശിച്ചത്. അതുകൊണ്ടു തന്നെ ഇനിയുള്ള മല്സരങ്ങളിലും ഇതുപോലെയുള്ള ബോളുകള് നേരിടാന് കോലി തയ്യാറായിരിക്കണം. അല്ലെങ്കില് ആദ്യ കളിയിലേതു പോലെ വിക്കറ്റ് നഷ്ടപ്പെടുത്തേണ്ടി വരുമെന്നും ഗവാസ്കര് വിലയിരുത്തി. ബുധനാഴ്ചയാണ് പരമ്പരയിലെ അടുത്ത മല്സരം.
അതേസമയം, ബാറ്റിങില് ക്ലിക്കായില്ലെങ്കിലും വമ്പനൊരു നാഴികക്കല്ല് ആദ്യ മല്സരത്തില് പിന്നിടാന് കോലിക്കായിരുന്നു. സ്വന്തം നാട്ടില് ഏകദിനത്തില് അതിവേഗം 5000 റണ്സ് പൂര്ത്തിയാക്കിയ താരമായാണ് അദ്ദേഹം മാറിയത്. 96 ഇന്നിങ്സുകളിലാണ് കോലി ഈ റെക്കോര്ഡിട്ടത്. 60.3 എന്ന മികച്ച ശരാശരിയിലാണിത്. നേരത്തേ ഇന്ത്യയുടെ തന്നെ ബാറ്റിങ് ഇതിഹാസം സച്ചിന് ടെണ്ടുല്ക്കറുടെ പേരിലായിരുന്നു ഈ റെക്കോര്ഡ്. 121 ഇന്നിങ്സുകളായിരുന്നു സച്ചിനു വേണ്ടി വന്നത്. ഇതു കോലി പഴങ്കഥയാക്കുകയായിരുന്നു.
Continue with Google