Click it and Unblock the Notifications
മോശം ഫോമിലായിരുന്ന ഇഷാന് കിഷനെ ഇന്ത്യ ടീമിലേക്ക് പരിഗണിക്കും. മുംബൈ ഇന്ത്യന്സ് ഓപ്പണര് പ്രതീക്ഷക്കൊത്ത് ഉയര്ന്നില്ലെങ്കിലും റിഷഭിന്റെ അഭാവത്തില് വിക്കറ്റ് കീപ്പറായി മുഖ്യ പരിഗണന ഇഷാനാണ്. സഞ്ജു സാംസണെയും ഇന്ത്യ ടീമിലേക്ക് പരിഗണിച്ചേക്കും. വിക്കറ്റ് കീപ്പര് ബാറ്റ്സ്മാനായ സഞ്ജു രാജസ്ഥാന് റോയല്സിന്റെ നായകനെന്ന നിലയില് ഇത്തവണ ഭേദപ്പെട്ട പ്രകടനമാണ് കാഴ്ചവെച്ചത്. അതുകൊണ്ട് തന്നെ സഞ്ജുവിനെ ഇന്ത്യ ടീമിലേക്ക് പരിഗണിച്ചേക്കും.
നായകനായി ശിഖര് ധവാന് എത്താനാണ് സാധ്യത കൂടുതല്. ഐപിഎല്ലില് മികച്ച പ്രകടനമാണ് ശിഖര് ധവാന് നടത്തുന്നതെങ്കിലും നിലവില് ഇന്ത്യയുടെ ടി20 ടീമില് ധവാന് സ്ഥാനമില്ല. സീനിയേഴ്സിന്റെ അഭാവത്തില് ധവാനെ ഇന്ത്യ നായകനായി പരിഗണിക്കുമ്പോള് സ്റ്റാര് ഓള്റൗണ്ടര് ഹര്ദിക് പാണ്ഡ്യ വൈസ് ക്യാപ്റ്റനായേക്കും. പരിക്കിനെത്തുടര്ന്ന് ഏറെ നാളുകളായി പുറത്തായിരുന്ന ഹര്ദിക് ഇടവേളക്ക് ശേഷം ശക്തമായ തിരിച്ചുവരവിന് തയ്യാറെടുക്കുകയാണ്.
ഇത്തവണ ഗുജറാത്ത് ടൈറ്റന്സ് നായകനായ ഹര്ദിക് ബാറ്റുകൊണ്ടും പന്തുകൊണ്ടും മികച്ച പ്രകടനം നടത്തുന്നു. ക്രിക് ബസ്സിന്റെ റിപ്പോര്ട്ട് പ്രകാരം സീനിയര് താരം ദിനേഷ് കാര്ത്തികിനെയും ഇന്ത്യ പരിഗണിച്ചേക്കും. ടി20 ലോകകപ്പില് ഇന്ത്യയുടെ പരിഗണനയിലുള്ള താരമാണ് കാര്ത്തിക്. ആര്സിബിക്കൊപ്പം ഫിനിഷര് റോളില് തിളങ്ങുന്ന കാര്ത്തികിന് ദക്ഷിണാഫ്രിക്കന് പരമ്പരയില് തിളങ്ങിയാല് ലോകകപ്പ് ടിക്കറ്റ് ലഭിക്കാന് സാധ്യതകളേറെ.
ഓപ്പണര് റോളി പൃഥ്വി ഷായെ ഇന്ത്യ പരിഗണിച്ചേക്കും. ഡല്ഹി ക്യാപിറ്റല്സിനൊപ്പം വെടിക്കെട്ട് നടത്തുന്ന പൃഥ്വിയെ ഭാവി താരമെന്ന നിലയില് ഇന്ത്യ വളര്ത്തിക്കൊണ്ടുവന്നേക്കും. റുതുരാജ് ഗെയ്ക്വാദിനെയും ഇന്ത്യ ടീമിലേക്ക് പരിഗണിച്ചേക്കും. യുവതാരങ്ങളിലേക്ക് വരുമ്പോള് ഉമ്രാന് മാലിക്കിനെ ഇന്ത്യ പരിഗണിക്കുമെന്നാണ് വിവരം. ബിസിസി ഐ പ്രസിഡന്റ് സൗരവ് ഗാംഗുലിയും ഉമ്രാന്റെ പ്രകടനത്തെ പ്രശംസിച്ചിരുന്നു.
മുംബൈ ഇന്ത്യന്സിനൊപ്പം സ്ഥിരതയോടെ കളിച്ച തിലക് വര്മക്കും ഇന്ത്യന് ടീമില് അവസരം ലഭിക്കുമെന്നാണ് ക്രിക് ബസിന്റെ റിപ്പോര്ട്ടുള്ളത്. പഞ്ചാബ് കിങ്സിനൊപ്പം ഡെത്ത് ഓവറിലടക്കം തിളങ്ങുന്ന അര്ഷദീപ് സിങ്ങിനെ ഇന്ത്യ പരിഗണിക്കുമ്പോള് ആവേഷ് ഖാന്, പ്രസിദ്ധ് കൃഷ്ണ, രവി ബിഷ്നോയ് എന്നിവരും ടീമിലേക്കെത്തിയേക്കും. അതേ സമയം കുല്ദീപ് യാദവിനെ അവസരം ലഭിക്കാന് സാധ്യതയില്ലെന്നാണ് സൂചന.
ഇന്ത്യയുടെ സാധ്യതാ ടീം: ശിഖര് ധവാന്, പൃഥ്വി ഷാ, ഇഷാന് കിഷന്, സഞ്ജു സാംസണ്, ഹര്ദിക് പാണ്ഡ്യ, ദിനേഷ് കാര്ത്തിക്, തിലക് വര്മ, ക്രുണാല് പാണ്ഡ്യ, ശര്ദുല് ഠാക്കൂര്, രവി ബിഷ്നോയ്, യുസ്വേന്ദ്ര ചഹാല്, പ്രസിദ്ധ് കൃഷ്ണ, ആവേഷ് ഖാന്, ഉമ്രാന് മാലിക്, അര്ഷദീപ് സിങ്.
Continue with Google