'2004ല്‍ സച്ചിന്‍ എന്താണ് ചെയ്തത്? കോലി ഇനിയും വൈകരുത്! ഫോണ്‍ ചെയ്തു ചോദിക്കൂ'

വിരാട് കോലിയുടെ ബാറ്റിങ് ശ്രദ്ധിക്കുകയാണെങ്കില്‍ അതില്‍ ഒരു കുഴപ്പവുമില്ലെന്നു കാണാന്‍ സാധിക്കും. ഒരേ തെറ്റ് തന്നെ വീണ്ടും വീണ്ടും ആവര്‍ത്തിക്കുന്നുവെന്നതാണ് അദ്ദേഹത്തിന്റെ ഏക കുഴപ്പം. കളിയില്‍ ആദ്യത്തെ പിഴവിലാണ് കോലി വിക്കറ്റ് നഷ്ടപ്പെടുത്തുന്നത്. ഭാഗ്യവും അദ്ദേഹത്തിനൊപ്പം നില്‍ക്കുന്നില്ല.
ചില ബോളുകളില്‍ ഷോട്ട് കളിക്കാതെ വിരാടിന് ഒഴിവാക്കാമായിരുന്നുവെന്ന് നിങ്ങള്‍ക്കു വാദിക്കം. ഓരോ ബാറ്ററും തെറ്റുകള്‍ ചെയ്യുന്നുണ്ട്, മാത്രമല്ല പലര്‍ക്കും ഭാഗ്യം കാരണം ജീവന്‍ തിരിച്ചുകിട്ടുകയും ചെയ്യുന്നുണ്ട്. ചിലപ്പോള്‍ ഒരു വൈഡായ ബോളില്‍ ഷോട്ട് കളിച്ച് അവര്‍ ക്യാച്ചായി പുറത്താവും, അല്ലെങ്കില്‍ എതിര്‍ ടീം ക്യാച്ച് കൈവിടുകയും ചെയ്യും. അത് അയാളുടെ ഭാഗ്യം മാത്രമാണ്. ഭാഗ്യം വിരാടിന്റെ വഴിക്കു പോയിത്തുടങ്ങിയാല്‍ കാര്യമുണ്ടാവും, 2022ല്‍ അതുണ്ടാവട്ടെയെന്ന് പ്രതീക്ഷിക്കുകയാണെന്നും ഗവാസ്‌കര്‍ സ്റ്റാര്‍ സ്‌പോര്‍ട്‌സിന്റെ ഷോയില്‍ പറഞ്ഞു.

ഓഫ് സൈഡിനു പുറത്തേക്കു പോവുന്ന ബോളുകളില്‍ പുറത്താവുന്ന പതിവ് അവസാനിപ്പിക്കുന്നത് എങ്ങനെയെന്ന് സച്ചിനെ വിളിച്ച് കോലി ഉപദേശം തേടണമെന്നും ഗവാസ്‌കര്‍ ആവശ്യപ്പെട്ടു. നേരത്തേ ഇതേ രീതിയില്‍ പ്രതിസന്ധി നേരിട്ട സച്ചിന്‍ 2003-04ല്‍ ഓസ്‌ട്രേലിയക്കെതിരേ പുറത്താവാതെ 241 റണ്‍സ് അടിച്ചെടുത്ത് തിരിച്ചുവന്നിരുന്നതും ഓര്‍മിപ്പിച്ച ഗവാസ്‌കര്‍ കോലിയും ഇത് ആവര്‍ത്തിക്കാന്‍ ശ്രമിക്കണമെന്നും ഉപദേശിച്ചു.
സച്ചിന്‍ ടെണ്ടുല്‍ക്കറെ വിരാട് ഫോണില്‍ വിളിക്കുകയാണെങ്കില്‍ അത് മനോഹരമായ കാര്യമായിരിക്കും. സച്ചിനു പുതുവല്‍സരാശംസകള്‍ നേരുന്നതിനൊപ്പം ബാറ്റിങില്‍ താന്‍ നേരിടുന്ന വെല്ലുവിളിയെക്കുറിച്ചും കോലിക്കു സംസാരിക്കാം.

2003-04ല്‍ ഓസ്‌ട്രേലിയക്കെതിരേ സച്ചിന്‍ എങ്ങനെയായിരുന്നു ഓഫ്‌സൈഡ് വീക്ക്‌നെസ് അതിജീവിച്ചതെന്നും ചോദിച്ചു മനസ്സിലാക്കണം. ആ സമയത്ത് സച്ചിന്‍ കവേഴ്‌സിലോ വിക്കറ്റിനു പിന്നിലോ ഇതേ ബോളുകള്‍ കളിച്ച് തുടര്‍ച്ചയായി പുറത്തായിരുന്നു. പക്ഷെ ഓസ്‌ട്രേലിയക്കെതിരായ നാലാം ടെസ്റ്റില്‍ കവേഴ്‌സിലേക്ക് ഷോട്ട് കളിക്കില്ലെന്നു സച്ചിന്‍ തീരുമാനിക്കുന്നു. മിഡ് ഓണിലൂടെയോ, സ്‌ട്രെയ്‌റ്റോ, ഓണ്‍ സൈഡിലൂടെയോ മാത്രമേ ഷോട്ട് കളിക്കൂയെന്ന ദൃഢനിശ്ചയത്തോടെ സച്ചിന്‍ അന്നു കളിച്ചു. ഇതു വിജയിക്കുകയും ആദ്യ ഇന്നിങ്‌സില്‍ പുറത്താവാതെ 241 റണ്‍സ് അടിച്ചെടുക്കുകയും ചെയ്തു. രണ്ടാമിന്നിങ്‌സില്‍ പുറത്താവാതെ 60 റണ്‍സോ മറ്റോ നേടിയെന്നാണ് ഓര്‍മയെന്നും ഗവാസ്‌കര്‍ വിശദമാക്കി.