IND vs SA: റെക്കോര്‍ഡുകളുടെ പെരുമഴ തീര്‍ത്ത് റിഷഭ്- ഏഷ്യയിലെ ആദ്യത്തെയാള്‍, സച്ചിന് തൊട്ടരികെ!

ആദ്യത്തെ ഏഷ്യന്‍ വിക്കറ്റ് കീപ്പര്‍

കേപ്ടൗണ്‍ ടെസ്റ്റിലെ മിന്നും സെഞ്ച്വറിയോടെ ഏഷ്യയിലെ മറ്റൊരു വിക്കറ്റ് കീപ്പര്‍ക്കും അവകാശപ്പെടാനില്ലാത്ത റെക്കോര്‍ഡാണ് റിഷഭ് പന്തിനെ തേടിയെത്തിയത്. സൗത്താഫ്രിക്ക, ഇംഗ്ലണ്ട്, ഓസ്‌ട്രേലിയ എന്നീ രാജ്യങ്ങളില്‍ ടെസ്റ്റ് സെഞ്ച്വറി നേടിയ ആദ്യത്തെ ഏഷ്യന്‍ വിക്കറ്റ് കീപ്പറായി അദ്ദേഹം മാറി. സൗത്താഫ്രിക്കയില്‍ ഏഷ്യയില്‍ നിന്നുള്ള ഒരു വിക്കറ്റ് കീപ്പര്‍ ടെസ്റ്റ് സെഞ്ച്വറിയടിച്ചതും ചരിത്രത്തില്‍ ആദ്യമായിട്ടാണ്.

സച്ചിന് തൊട്ടരികെ

ഇന്ത്യയുടെ മുന്‍ ബാറ്റിങ് ഇതിഹാസം സച്ചിന്‍ ടെണ്ടുല്‍ക്കറുടെ വമ്പന്‍ ബാറ്റിങ് റെക്കോര്‍ഡിന് തൊട്ടരികെയെത്തിയിരിക്കുകയാണ് റിഷഭ് പന്ത്. 24ാം വയസ്സില്‍ കൂടുതല്‍ രാജ്യങ്ങളില്‍ സെഞ്ച്വറിയടിച്ച രണ്ടാമത്തെ ഇന്ത്യന്‍ താരമായി അദ്ദേഹം മാറി. നാലു രാജ്യങ്ങളിലാണ് റിഷഭ് ഇതിനകം മൂന്നക്കം തികച്ചത്. ഇന്ത്യയെക്കൂടാതെ ഇംഗ്ലണ്ട്, ഓസ്‌ട്രേലിയ, സൗത്താഫ്രിക്ക എന്നീ രാജ്യങ്ങളിലാണ് റിഷഭിന്റെ മറ്റു ടെസ്റ്റ് സെഞ്ച്വറികള്‍. കെഎല്‍ രാഹുലിന്റെ റെക്കോര്‍ഡിനൊപ്പം അദ്ദേഹമെത്തുകയും ചയ്തു. രാഹുലും നാലു രാജ്യങ്ങളില്‍ സെഞ്ച്വറികളടിച്ചിട്ടുണ്ട്. ഇന്ത്യയെക്കൂടാതെ ഓസ്‌ട്രേലിയ, ശ്രീലങ്ക, വെസ്റ്റ് ഇന്‍ഡീസ് എന്നീവിടങ്ങൡലാണിത്.
സച്ചിനാണ് തലപ്പത്ത്. 24ാം വയസ്സില്‍ അദ്ദേഹം അഞ്ചു രാജ്യങ്ങളില്‍ സെഞ്ച്വറി കുറിച്ചിരുന്നു. ഇന്ത്യക്കൊപ്പം ഇംഗ്ലണ്ട്, ഓസ്‌ട്രേലിയ, സൗത്താഫ്രിക്ക, ശ്രീലങ്ക എന്നീവിടങ്ങളിലായിരുന്നു മാസ്റ്റര്‍ ബ്ലാസ്റ്ററുടെ സെഞ്ച്വറികള്‍.

റിഷഭ് ബഹുദൂരം മുന്നില്‍

25 വയസ്സിനുള്ളില്‍ സെന രാജ്യങ്ങളില്‍ (സൗത്താഫ്രിക്ക, ഇംഗ്ലണ്ട്, ന്യൂസിലാന്‍ഡ്, ഓസ്‌ട്രേലിയ) കൂടുതല്‍ ഫിഫ്റ്റി പ്ലസ് സ്‌കോറുകളുള്ള ഏഷ്യന്‍ വിക്കറ്റ് കീപ്പര്‍ കൂടിയാണ് റിഷഭ് പന്ത്. ആറു തവണയാണ് അദ്ദേഹം ഫിഫ്റ്റി പ്ലസ് ഈ നാലു രാജ്യങ്ങളിലായി നേടിയിട്ടുള്ളത്. റിഷഭിന് അരികില്‍പ്പോലും ആരുമില്ലെന്നത് ശ്രദ്ധേയമാണ്.
ശ്രീലങ്കയുടെ ദിനേഷ് ചാണ്ഡിമലാണ് ഈ ലിസ്റ്റിലെ രണ്ടാമന്‍. പക്ഷെ അദ്ദേഹത്തിനു മൂന്നു തവണ മാത്രമേ ഈ നേട്ടം കൈവരിക്കാനായിട്ടുള്ളൂ. പാകിസ്താന്റെ മുന്‍ വിക്കറ്റ് കീപ്പര്‍ വസീം ബാരിയാണ് എലൈറ്റ് ലിസ്റ്റിലെ മൂന്നാമന്‍. അദ്ദേഹം രണ്ടു തവണയാണ് ഫിഫ്റ്റി പ്ലസ് നേടിയിട്ടുള്ളത്.

റിഷഭ് വളരെ സ്‌പെഷ്യല്‍

ടെസറ്റ് ക്രിക്കറ്റില്‍ ഇന്ത്യയുടെ മറ്റൊരു വിക്കറ്റ് കീപ്പര്‍ക്കുമില്ലാത്ത വമ്പന്‍ ബാറ്റിങ് റെക്കോര്‍ഡിന്റെ അവകാശി കൂടിയാണ് റിഷഭ് പന്ത്. ഏഷ്യക്കു പുറത്ത് ഏറ്റവുമധികം സെഞ്ച്വറികളുള്ള ഇന്ത്യന്‍ വിക്കറ്റ് കീപ്പറാണ് അദ്ദേഹം. ഈ റെക്കോര്‍ഡ് നേരത്തേ തന്നെ റിഷഭിന് സ്വന്തമാണ്. കേപ്ടൗണ്‍ ടെസ്റ്റിലെ സെഞ്ച്വറിയോടെ അദ്ദേഹം ഈ റെക്കോര്‍ഡ് മെച്ചപ്പെടുത്തിയിരിക്കുകയാണ്. ഏഷ്യക്കു പുറത്ത് റിഷഭിന്റെ മൂന്നാമത്തെ സെഞ്ച്വറിയായിരുന്നു ഇത്. നേരത്തേ ഇംഗ്ലണ്ട്, ഓസ്‌ട്രേലിയ എന്നീവിടങ്ങളിലായിരുന്നു അദ്ദേഹത്തിന്റെ മറ്റു സെഞ്ച്വറികള്‍.
ഏഷ്യക്കു പുറത്ത് ടെസ്റ്റ് സെഞ്ച്വറികളുള്ള മറ്റു വിക്കറ്റ് കീപ്പര്‍മാര്‍ വിജയ് രത്ര, വൃധിമാന്‍ സാഹ എന്നിവരാണ്. ഇവരെല്ലാം വെസ്റ്റ് ഇന്‍ഡീസിനെതിരേ ഓരോ സെഞ്ച്വറികള്‍ വീതം നേടിയിട്ടുണ്ട്.