സിറാജ് എവിടെ...? അയാളെ ടെസ്റ്റ് കളിക്കാരനാക്കി ഒതുക്കിയോ? അഗാര്‍ക്കര്‍ക്കെതിരെ വീണ്ടും വിമര്‍ശനം

മുഹമ്മദ് സിറാജിനെ ഒരു ഫോര്‍മാറ്റ് കളിക്കാരനായി മാത്രം ചുരുക്കിയതില്‍ വിമര്‍ശനവുമായി മുന്‍ ഇന്ത്യന്‍ ക്രിക്കറ്റ് താരം ആകാശ് ചോപ്ര. ഒരുകാലത്ത് എല്ലാ ഫോര്‍മാറ്റുകളിലും ഇന്ത്യയുടെ ബൗളിംഗ് ആക്രമണത്തിന്റെ അവിഭാജ്യ ഘടകമായിരുന്ന ഹൈദരാബാദ് പേസര്‍ ഇപ്പോള്‍ ടെസ്റ്റുകളില്‍ മാത്രം സ്ഥിര സാന്നിധ്യമാണ്. ഏകദിനങ്ങളില്‍ നിന്നും ടി20യില്‍ നിന്നും അദ്ദേഹത്തെ മാറ്റിനിര്‍ത്തി.

ദക്ഷിണാഫ്രിക്കയ്ക്കെതിരായ പരമ്പരയില്‍ ഇന്ത്യയുടെ മോശം ബൗളിംഗ് പ്രകടനത്തിനും അനുഭവപരിചയമില്ലാത്ത ഇന്ത്യന്‍ പേസര്‍മാരുടെ നിരാശാജനകമായ കളിയോടുള്ള സമീപനത്തിനും വിമര്‍ശനം ഉയരുന്നതിനിടെയാണ് സിറാജിനെക്കുറിച്ചുള്ള ചോപ്രയുടെ പരാമര്‍ശം. സിറാജിനെ ഒരു ഫോര്‍മാറ്റ് കളിക്കാരനായി ചുരുക്കിയതെന്ന് തനിക്ക് മനസ്സിലാകുന്നില്ലെന്ന് ചോപ്ര തന്റെ യൂട്യൂബ് ചാനലിലെ ഒരു വീഡിയോയില്‍ അഭിപ്രായപ്പെട്ടു.

ടെസ്റ്റുകളിലെ വിക്കറ്റ് എടുക്കാനുള്ള കഴിവിന് സിറാജ് വളരെയധികം വിലമതിക്കപ്പെടുന്നു. എന്നാല്‍ ആ കാരണം കൊണ്ട് ഏകദിനങ്ങളില്‍ നിന്ന് പേസര്‍ വിട്ടുനില്‍ക്കുന്നത് അംഗീകരിക്കാന്‍ കഴിയില്ലെന്ന് അദ്ദേഹം പറഞ്ഞു. ജസ്പ്രീത് ബുംറയുടെയും സിറാജിന്റെയും അഭാവത്തില്‍ ദക്ഷിണാഫ്രിക്കയ്‌ക്കെതിരായ ഏകദിനങ്ങളില്‍ ഇന്ത്യയുടെ പേസ് ആക്രമണം നിലവില്‍ ദുര്‍ബലവും അനുഭവപരിചയമില്ലാത്തതുമാണ്.

'പക്ഷേ അദ്ദേഹം ഏകദിന ക്രിക്കറ്റില്‍ നിന്ന് എങ്ങനെ അപ്രത്യക്ഷനായി? അദ്ദേഹം ഇപ്പോള്‍ ആഭ്യന്തര ക്രിക്കറ്റില്‍ കളിക്കുകയാണ്. ചാമ്പ്യന്‍സ് ട്രോഫിയിലേക്ക് അദ്ദേഹത്തെ തിരഞ്ഞെടുക്കാത്തപ്പോള്‍, ഞങ്ങള്‍ അല്‍പ്പം നിരാശരായി, കാരണം അതിന് രണ്ട് വര്‍ഷം മുമ്പ്, ആ ഫോര്‍മാറ്റില്‍ ഇന്ത്യയ്ക്കായി ഏറ്റവും കൂടുതല്‍ വിക്കറ്റ് നേടിയത് അദ്ദേഹമായിരുന്നു,' ചോപ്ര ചൂണ്ടിക്കാട്ടി.

2023 വരെ ഏകദിനങ്ങളില്‍ സിറാജ് സ്ഥിരം സാന്നിധ്യമായിരുന്നു, അതിനുശേഷം 50 ഓവര്‍ ഫോര്‍മാറ്റില്‍ അദ്ദേഹം സ്ഥിരമായി അവഗണിക്കപ്പെട്ടു. 2024 ല്‍ വെറും 3 ഏകദിനങ്ങള്‍ മാത്രമാണ് അദ്ദേഹം കളിച്ചത്. 2025 ലും അത്രയും തന്നെ. ഏകദിന ഫോര്‍മാറ്റില്‍ 47 മത്സരങ്ങളില്‍ നിന്ന് 73 വിക്കറ്റുകള്‍ നേടിയ അദ്ദേഹത്തിന്റെ ശരാശരി 24.67 ആണ്.

''പെട്ടെന്ന്, അദ്ദേഹത്തിന്റെ പേര് കാണുന്നില്ല. അത് ഇപ്പോഴും കാണുന്നില്ല. മറ്റുള്ളവര്‍ കളിക്കുന്നുണ്ട്, ഹര്‍ഷിത് റാണയും പ്രസിദ്ധ് കൃഷ്ണയും, പക്ഷേ മുഹമ്മദ് സിറാജിനെ എവിടെയും കാണാനില്ല. അദ്ദേഹം ഏകദിനങ്ങളില്‍ ഇല്ല, ടി20 കളില്‍ നിന്ന് വിട്ടുനില്‍ക്കുന്നു. എന്തുകൊണ്ടാണ് ഇത് സംഭവിച്ചത്? വ്യക്തിപരമായി, എനിക്കറിയില്ല. എപ്പോഴാണ് അദ്ദേഹം ഒരു സിംഗിള്‍ ഫോര്‍മാറ്റ് കളിക്കാരനായത്?'' ചോപ്ര ചോദിച്ചു.

ടീം സെലക്ഷനിലും പ്ലാനിംഗിലും മുഖ്യ സെലക്ടര്‍ അജിത് അഗാര്‍ക്കറും പരിശീലകന്‍ ഗൗതം ഗംഭീറും പ്രതിരോധത്തിലായിരിക്കെയാണ് ചോപ്രയുടെ പ്രതികരണം എന്നതും ശ്രദ്ധേയമാണ്. നേരത്തെ രോഹിത് ശര്‍മ്മയേയും വിരാട് കോലിയേയും നീക്കാനുള്ള ഇരുവരുടേയും ശ്രമങ്ങള്‍ക്ക് തിരിച്ചടി നേരിട്ടിരുന്നു. ദക്ഷിണാഫ്രിക്കയ്‌ക്കെതിരായ രണ്ട് ഏകദിനങ്ങളിലും സെഞ്ച്വറി നേടിയാണ് കോലി ഇതിന് മറുപടി നല്‍കിയത്. രോഹിത് ആദ്യ കളിയില്‍ അര്‍ധ സെഞ്ച്വറി കുറിച്ചിരുന്നു.