IND vs SA: ഏകദിനമല്ല.. ഇത് ടെസ്റ്റാണ്, ഫീല്‍ഡര്‍മാരൊക്കെ എവിടെ? പന്തിനോട് കുംബ്ലെ

ഗുവാഹത്തിയിലെ ബര്‍സപാര ക്രിക്കറ്റ് സ്റ്റേഡിയത്തില്‍ ഇന്ത്യ- ദക്ഷിണാഫ്രിക്ക രണ്ടാം ടെസ്റ്റ് പുരോഗമിക്കുകയാണ്. നായകന്‍ ശുഭ്മാന്‍ ഗില്ലിന് പരിക്കേറ്റ് ടീമില്‍ നിന്ന് പുറത്ത് പോയതിനാല്‍ ഉപനായകന്‍ റിഷഭ് പന്താണ് ടീമിനെ നയിക്കുന്നത്. കഴുത്തിനേറ്റ പരിക്കിനെത്തുടര്‍ന്നാണ് ശുഭ്മാന്‍ ഗില്‍ പുറത്തായത്. ടെസ്റ്റ് ടീമിലെ സ്ഥിരം സാന്നിധ്യമാണെങ്കിലും റിഷഭ് പന്ത് ആദ്യമായാണ് ഇന്ത്യന്‍ ക്യാപ്റ്റനാകുന്നത്.

അതിനാല്‍ തന്നെ ഏറെ ആവേശത്തോടെയാണ് രണ്ടാം ടെസ്റ്റ് വീക്ഷിക്കുന്നത്. എന്നാല്‍ മുന്‍ ഇന്ത്യന്‍ ക്യാപ്റ്റനും അനില്‍ കുംബ്ലെ റിഷഭ് പന്തിന്റെ ഇന്നത്തെ ക്യാപ്റ്റന്‍സിയില്‍ അത്ര തൃപ്തനല്ല. എന്തുകൊണ്ടാണ് ആദ്യം ദിനം പ്രതിരോധത്തിലൂന്നി ടീം കളിക്കുന്നത് എന്നാണ് അനില്‍ കുംബ്ലെ ചോദിക്കുന്നത്. ടോസ് നേടി ദക്ഷിണാഫ്രിക്ക ആദ്യം ബാറ്റ് ചെയ്യാന്‍ തീരുമാനിച്ചതോടെ റിഷഭ് പന്തിന് തന്റെ ടീമിനെ സജ്ജമാക്കുക എന്ന വലിയ ദൗത്യം നേരിടേണ്ടി വന്നു.

പുതിയ പന്തില്‍ പേസര്‍മാരുടെ ശക്തമായ പ്രകടനത്തോടെയാണ് മത്സരം ആരംഭിച്ചത്. എന്നാല്‍ ഓപ്പണര്‍മാരായ ഐഡന്‍ മാര്‍ക്രാമും റയാന്‍ റിക്കെല്‍ട്ടണും ഉറച്ചുനിന്നു. എങ്കിലും ജസ്പ്രീത് ബുംറയും കുല്‍ദീപ് യാദവും ചേര്‍ന്ന് ഓപ്പണര്‍മാരെ തൊട്ടടുത്ത ഓവറുകളില്‍ വീഴ്ത്തി. ഓപ്പണിംഗ് വിക്കറ്റ് വീണ ശേഷം നിതീഷ് കുമാര്‍ റെഡ്ഡിയുടെ ഒരു ചെറിയ സ്‌പെല്ലിന് ശേഷം, റിഷഭ് പന്ത് വാഷിംഗ്ടണ്‍ സുന്ദറിലൂടെ സ്പിന്നര്‍മാരെ കളത്തിലിറക്കി.

എന്നാല്‍ പുതിയ ചുവന്ന മണ്ണിലെ വിക്കറ്റില്‍ സ്പിന്നര്‍മാര്‍ക്ക് മികച്ച ടേണ്‍ നേടാത്തതിനാല്‍, ക്യാപ്റ്റന്‍ ഉടന്‍ തന്നെ ക്ലോസ്-ഇന്‍ ഫീല്‍ഡര്‍മാരെ പുറത്താക്കി. നിരവധി കളിക്കാരെ ബൗണ്ടറി ലൈന്‍ വരെ നിലയുറപ്പിച്ചു. ഒരു ഘട്ടത്തില്‍, വാഷിംഗ്ടണ്‍ സുന്ദര്‍ ഒരു ക്ലോസ്-ഇന്‍ ഫീല്‍ഡറായി ഒരു സ്ലിപ്പില്‍ മാത്രം പന്തെറിയുകയായിരുന്നു. അതേസമയം ബാക്കിയുള്ള ഫീല്‍ഡര്‍മാര്‍ ബൗണ്ടറി ലൈനിന് അരികിലായിരുന്നു.

റിഷഭ് പന്തിന്റെ ഈ തീരുമാനത്തില്‍ ആണ് കമന്റേറ്റര്‍മാരായ ആകാശ് ചോപ്രയും അനില്‍ കുംബ്ലെയും അമ്പരന്നത്. മത്സരത്തിന്റെ പ്രാരംഭ ഘട്ടത്തില്‍ സ്പിന്നര്‍മാര്‍ പന്തെറിയുമ്പോള്‍ ബാറ്റര്‍മാര്‍ക്ക് സമീപം ഫീല്‍ഡര്‍മാരുടെ അഭാവത്തെ ഇരുവരും ചോദ്യം ചെയ്തു.

'മിഡ്-വിക്കറ്റില്‍ ഒരു ഫീല്‍ഡര്‍ ഉണ്ട്, ഒരു ലോങ്-ഓണും ഉണ്ട്, ഷോര്‍ട്ട് ലെഗ് ഇല്ല, ഇവിടെ എന്താണ് പദ്ധതി? ഇവിടെ ഊഹങ്ങള്‍ പോലും പരാജയപ്പെടും. കാരണം റയാന്‍ റിക്കിള്‍ട്ടണ്‍ ക്രീസില്‍ മികച്ച ഫൂട്ട്‌സ്റ്റെപ്പോടെ സ്പിന്നിനൊപ്പം മുകളിലൂടെ കളിക്കുന്നത് നമ്മള്‍ എപ്പോഴെങ്കിലും കണ്ടിട്ടുണ്ടോ? ഈ ഫീല്‍ഡ് ഒരു ഷോര്‍ട്ട് ബോള്‍ ബര്‍സ്റ്റിനായി പ്ലാന്‍ ചെയ്തിട്ടുണ്ടോ, അതിനായി നിങ്ങള്‍ ഇത് സജ്ജമാക്കിയിട്ടുണ്ടോ?്,' ചോപ്ര പറഞ്ഞു.

ലെഗ് സൈഡില്‍ ഒരു ഏകദിന ഫീല്‍ഡിംഗ് ആണ് സജ്ജീകരിച്ചിരിക്കുന്നത് എന്നായിരുന്നു കുംബ്ലെയുടെ നിരീക്ഷണം. ഒന്നാം ദിവസത്തിലെ ആദ്യ സെഷനാണിത്, എന്നിട്ടും ഡീപ് സ്‌ക്വയര്‍ ലെഗ്, ലോംഗ് ഓണ്‍, ഡീപ് മിഡ് വിക്കറ്റ് എന്നിവിടങ്ങളില്‍ ഫീല്‍ഡര്‍മാരില്ല, അനില്‍ കുംബ്ലെ പറഞ്ഞു.