രോഹിത്തുണ്ടെങ്കില്‍ നടക്കില്ല? റെക്കോര്‍ഡിട്ട് രാഹുലും ജയ്‌സ്വാളും!! ഇത്ര പ്രതീക്ഷിച്ചില്ല

ലീഡ്‌സ്: ഇംഗ്ലണ്ടുമായുള്ള ഒന്നാം ക്രിക്കറ്റ് ടെസ്റ്റിന്റെ ആദ്യദിനം തകര്‍പ്പന്‍ തുടക്കമാണ് ഇന്ത്യക്കു ലഭിച്ചിരിക്കുന്നത്. ടോസിനു ശേഷം ബാറ്റിങിനു അയക്കപ്പെട്ട ഇന്ത്യക്കു ആഗ്രഹിച്ചതു പോലെയൊരു തുടക്കം നല്‍കാന്‍ കെഎല്‍രാഹുല്‍- യശസ്വി ജയ്‌സ്വാള്‍ ജോടിക്കു സാധിച്ചുവെന്നതാണ് ശ്രദ്ധേയമായ കാര്യം. ഇംഗ്ലണ്ടിന്റെ ന്യൂബോള്‍ ആക്രമണത്തെ മികച്ച രീതിയില്‍ നേരിട്ട ഈ സഖ്യം വമ്പന്‍ റെക്കോര്‍ഡും ഈ മല്‍സരത്തില്‍ കുറിച്ചിരിക്കുകയാണ്.

ശുഭ്മന്‍ ഗില്ലിനു കീഴില്‍ ഇന്ത്യന്‍ ടീം കളിച്ച ടെസ്റ്റ് മല്‍സരം കൂടിയാണിത്. ഈ കളിയിലൂടെ യുവ ഇടംകൈയന്‍ ബാറ്റര്‍ സായ് സുദര്‍ശന്‍ ടെസ്റ്റ് ക്രിക്കറ്റില്‍ ഇന്ത്യക്കായി അരങ്ങേറ്റവും കുറിച്ചു. മറുനാടന്‍ മലയാളി താരം പ്ലെയിങ് ഇലവനില്‍ ഇടം നേടിയിട്ടുണ്ട്. എട്ടു വര്‍ഷങ്ങള്‍ക്കു ശേഷം അദ്ദേഹം കളിക്കുന്ന ആദ്യ ടെസ്റ്റ് കൂടിയാണിത്.

തകര്‍പ്പന്‍ തുടക്കം

കെഎല്‍ രാഹുല്‍- യശസ്വി ജയ്‌സ്വാള്‍ ജോടി തകര്‍പ്പന്‍ തുടക്കമാണ് ഇന്ത്യക്കു ഒന്നാമിന്നിങസില്‍ നല്‍കിയത്. ഓപ്പണിങ് വിക്കറ്റില്‍ 90 റണ്‍സ് അടിച്ചെടുക്കാന്‍ ഈ ജോടിക്കു കഴിഞ്ഞു. ഈ സഖ്യം 100ലേക്കു കുതിക്കവെ ലഞ്ച് ബ്രേക്കിനു തൊട്ടുമുമ്പ് രാഹുലിനെ (42) മടക്കി ബ്രൈഡന്‍ കാര്‍സാണ് ഇംഗ്ലണ്ടിനു കാത്തിരുന്ന ബ്രേക്ക്ത്രൂ നേടിക്കൊടുത്തത്.

എങ്കിലും ഇതിനിടെ വലിയൊരു റെക്കോര്‍ഡിടാന്‍ രാഹുല്‍- ജയ്‌സ്വാള്‍ സഖ്യത്തിനായിരുന്നു. ലീഡ് ഇ്ന്ത്യയെ സംബന്ധിച്ച് ടെസ്റ്റില്‍ അത്ര മികച്ചൊരു വേദിയല്ല. പ്രത്യേകിച്ചും ഇന്ത്യന്‍ ഓപ്പണിങ് ജോടികള്‍ ഇവിടെ വേണ്ടത്ര ക്ലിക്കാവാറുമില്ല. എന്നാല്‍ ഈ ചീത്തപ്പേര് ഇത്തവണ തീര്‍ത്തിരിക്കുകയാണ് രാഹുല്‍- ജയ്‌സ്വാള്‍ ജോടി.

39 വര്‍ങ്ങള്‍ക്കു ശേഷമാണ് ഇന്ത്യയുടെ ഏതെങ്കിലുമൊരു ഓപ്പണിങ് ജോടി ഈ വേദിയില്‍ 50 പ്ലസ് റണ്‍സുണ്ടാക്കിയത്. ഇതു തീര്‍ച്ചയായും ആശ്ചര്യപ്പെടുത്തുന്ന കണക്ക് തന്നെയാണ്. അതു മാത്രമല്ല, മറ്റൊരു എലൈറ്റ് ലിസ്റ്റിലും രാഹുല്‍- ജയ്‌സ്വാള്‍ ജോടി ഇടം നേടിയിരിക്കുകയാണ്.

വിദേശത്തു ഒരു ടെസ്റ്റ് പരമ്പരയിലെ ആദ്യ ടെസ്റ്റിലെ ഒന്നാമിന്നിങ്‌സില്‍ ഒരു ഇന്ത്യന്‍ ഓപ്പണിങ് ജോടിയുടെ നാലാമത്തെ മികച്ച തുടക്കം കൂടിയാണ് ഈ കളിയിലെ 91 റണ്‍സ്.

മുരളി വിജയ്- ശിഖര്‍ ധവാന്‍ (283 റണ്‍സ്, എതിരാളി ബംഗ്ലാദേശ്, 2015), വീരേന്ദര്‍ സെവാഗ്- ആകാശ് ചോപ്ര (160, പാകിസ്താന്‍, 2004), കെഎല്‍ രാഹുല്‍- മായങ്ക് അഗര്‍വാള്‍ (117, സൗത്താഫ്രിക്ക, 2021) എന്നിവരാണ് ലിസ്റ്റില്‍ ആദ്യത്തെ മൂന്നു സ്ഥാനങ്ങളില്‍

തുടരെ രണ്ടാമത്തെ ടെസ്റ്റ് പരമ്പരയിലാണ് രാഹുലും ജയ്‌സ്വാളും ടീമിനായി ഓപ്പണിങില്‍ ഇറങ്ങിയത്. ഈ വര്‍ഷമാദ്യം ഓസ്‌ട്രേലിയയില്‍ നടന്ന ബോര്‍ഡര്‍- ഗവാസ്‌ക ട്രോഫിയിലും ഓപ്പണിങ് ജോടികള്‍ ഇവരായിരുന്നു. അന്നു ചില മികച്ച തുടക്കങ്ങള്‍ നല്‍കുന്നതില്‍ ഇരുവരും നിര്‍ണായക പങ്കുവഹിക്കുകയും ചെയ്തു.

രോഹിത്തിനു ട്രോള്‍

കെഎല്‍ രാഹുല്‍- യശസ്വി ജയ്‌സ്വാള്‍ ജോടി 90 പ്ലസ് റണ്‍സിന്റെ കിടിലന്‍ കൂട്ടുകെട്ടുണ്ടാക്കിയതിനു പിന്നാലെ ട്രോളിനു ഇരയായിരിക്കുന്നത് മുന്‍ ക്യാപ്റ്റനും ഇതിഹാസ ഓപ്പണറുമായ രോഹിത് ശര്‍മയാണ്. അദ്ദേഹം വിരമിക്കാതെ ഈ പരമ്പരയില്‍ കളിച്ചിരുന്നെങ്കില്‍ ഇത്തരമൊരു ഗംഭീര തുടക്കം ടീമിനു ലഭിക്കില്ലായിരുന്നുവെന്നാണ് ആരാധകരുടെ പരിഹാസം.

രോഹിത് ശര്‍മയില്ലാതിരുന്നത് നന്നായി. അദ്ദേഹം വീണ്ടും ഓപ്പണറായി കളിച്ചിരുന്നെങ്കില്‍ ഓപ്പണിങ് വിക്കറ്റില്‍ ഇന്ത്യ രണ്ടക്കം പോലും കടക്കുമോയെന്നത് സംശയമാണെന്നായിരുന്നു സോഷ്യല്‍ മീഡിയയില്‍ ആരാധകര്‍ ട്രോളിയത്.