ഐപിഎല്‍ ഏപ്രിലിലും ഇല്ല! നടത്തുക അസാധ്യം... സൂചന നല്‍കി മുന്‍ ചെയര്‍മാന്‍

ഏപ്രില്‍ 15ന് എന്തായാലും ടൂര്‍ണമെന്റ് ആരംഭിക്കില്ലെന്ന് ശുക്ല വ്യക്തമാക്കി. ഈ മാസം ടൂര്‍ണമെന്റ് നടക്കുക അസാധ്യമാണ്. ഐപിഎല്ലിന്റെ ഒരു തയ്യാറെടുപ്പുകളും താന്‍ കാണുന്നില്ല. കൊറോണ വൈററസിനെതിരായ പോരാട്ടവും ജനങ്ങളുടെ ജീവന്‍ രക്ഷിക്കലുമാണ് ഇപ്പോള്‍ നമുക്ക് പ്രധാനം. സര്‍ക്കാരിന്റെ തീരുമാനം ആശ്രയിച്ചായിരിക്കും ഐപിഎഎല്ലിന്റെ ഭാവിയെന്നും ശുക്ല പറഞ്ഞു. ലോക്ക്ഡൗണ്‍ ഇനിയും നീട്ടുമെന്നാണ് കേള്‍ക്കുന്നത്. അതുകൊണ്ടു തന്നെ ഏപ്രില്‍ 15ന് ടൂര്‍ണമെന്റ് ആരംഭിക്കുക അസാധ്യമാണെന്നും അദ്ദേഹം ചൂണ്ടിക്കാട്ടി.

ലോക്ക്ഡൗണ്‍ പിന്‍വലിച്ചാലും ഐപിഎല്ലില്‍ വിദേശ താരങ്ങളുടെ പങ്കാളിത്തം ചോദ്യചിഹ്നമാണ്. മാര്‍ച്ച് 11ന് വിദേശികളുടെ വിസകളുടെ കാര്യത്തില്‍ സര്‍ക്കാര്‍ നിയന്ത്രണങ്ങള്‍ കൊണ്ടുവന്നിരുന്നു. അന്താരാഷ്ട്ര ഫ്‌ളൈറ്റുകളും ഇപ്പോള്‍ സസ്‌പെന്‍ഡ് ചെയ്തിരിക്കുകയാണ്. അതുകൊണ്ടു ഐപിഎല്‍ സംഘടിപ്പിക്കാന്‍ ബിസിസിഐ തീരുമാനിച്ചാല്‍ വിദേശ താരങ്ങള്‍ക്കു പങ്കെടുക്കാനാവുമോയെന്ന കാര്യം സംശയത്തിലാണ്.

അടച്ചിട്ട സ്റ്റേഡിയത്തില്‍ ഐപിഎല്‍ നടത്താമെന്ന് പലരും നേരത്തേ ചൂണ്ടിക്കാട്ടിയിരുന്നു. എന്നാല്‍ ഇതിനോടു ശുക്ല യോജിക്കുന്നില്ല. നിലവിലെ അവസ്ഥയില്‍ ക്രിക്കറ്റിനെക്കുറിച്ച് നമുക്ക് ചിന്തിക്കാന്‍ പോലും കഴിയില്ല. എല്ലാം സാധാരണ ഗതിയിലേക്കു എപ്പോള്‍ മടങ്ങിവരുമെന്ന കാര്യത്തില്‍ ഇപ്പോള്‍ ഒന്നും പറയാന്‍ സാധിക്കില്ല. ജനജീവിതം സാധാരണ അവസ്ഥയിലേക്കു തിരിച്ചുവന്ന ശേഷം മാത്രമേ ഐപിഎല്ലിനെക്കുറിച്ച് ചിന്തിക്കാന്‍ കഴിയുകയുള്ളൂവെന്നും ശുക്ല വ്യക്തമാക്കി.