IND vs SA: ഏകദിന ടീമിലേക്കു ധവാന് എങ്ങനെ മടങ്ങിയെത്താം? മുന്‍ കോച്ച് പറയുന്നത് ഇങ്ങനെ

ഒരൊറ്റ മികച്ച ഇന്നിങ്‌സ് മതി

നിലവില്‍ വിജയ് ഹസാരെ ട്രോഫി ഏകദിന ടൂര്‍ണമെന്റില്‍ ഡല്‍ഹിക്കു വേണ്ടി കളിച്ചുകൊണ്ടിരിക്കുകയാണ് ശിഖര്‍ ധവാന്‍. സെലക്ടര്‍മാരുടെ ശ്രദ്ധ പിടിച്ചുപറ്റാന്‍ ഈ ടൂര്‍ണമെന്റില്‍ ചില മികച്ച ഇന്നിങ്‌സുകള്‍ അദ്ദേഹത്തിനു കളിക്കേണ്ടതുണ്ട്.
സെലക്ടര്‍മാര്‍ എങ്ങനെയാണ് ഇതിനെ നോക്കിക്കാണുത് എന്നതിനെ ആശ്രയിച്ചിരിക്കും ധവാന്റെ ടീമിലേക്കുള്ള മടങ്ങിവരവെന്നു ഗെയ്ക്വാദ് അഭിപ്രായപ്പെട്ടു. ഒരു ക്രിക്കറ്ററെ സംബന്ധിച്ച് ഫോം മാറിക്കൊണ്ടിരിക്കാം, പക്ഷെ അയാളുടെ നിലവാരം അതു പോലെ തന്നെ തുടരും. ശിഖറിനെപ്പോലെയുള്ള ഒരു ബാറ്റര്‍ക്കു ഫോം വീണ്ടെടുക്കാന്‍ ഒരൊറ്റ മകച്ച ഇന്നിങ്‌സ് മാത്രം മതി. ചില സമയങ്ങളില്‍ നിങ്ങള്‍ക്കു മോശം സമയത്തിലൂടെ കടന്നു പോവേണ്ടതായി വരും, മികച്ച കളിക്കാര്‍ക്കു പോലും സംഭവിക്കുന്ന കാര്യമാണിത്. സുനില്‍ ഗവാസ്‌കര്‍, മൊഹീന്ദര്‍ അമര്‍നാഥ് എന്നിവര്‍ക്കെല്ലാം ഇതുപോലെയുളള അവസ്ഥയിലൂടെ കടന്നുപോവേണ്ടി വന്നിട്ടുണ്ട്. ഈയൊരു ഘട്ടത്തില്‍ നിങ്ങള്‍ എന്തു തന്നെ ശ്രമിച്ചാലും അതിനു പ്രതീക്ഷിച്ച ഫലം ലഭിക്കില്ലെന്നും ഗെയ്ക്വാദ് നിരീക്ഷിച്ചു.

പിഴയ്ക്കുന്നത് എവിടെ?

ഇത്തരം സാഹചര്യങ്ങളിലൂടെ കടന്നു പോവുമ്പോള്‍ എവിടെയാണ് പിഴയ്ക്കുന്നതെന്നു പോലും ഒരു ക്രിക്കറ്റര്‍ക്കു തിരിച്ചറിയാന്‍ സാധിക്കില്ല. ഇത്തരം സമയങ്ങളില്‍ ആത്മാന്വേഷണം നടത്തേണ്ടത് വളരെ പ്രധാനമാണ്. എന്തുകൊണ്ടാണ് നന്നായി പെര്‍ഫോം ചെയ്യാന്‍ സാധിക്കാത്തതെന്നു നിങ്ങള്‍ക്കു കണ്ടെത്താനാവില്ല. അതു മാനസികമാണോ, അല്ലെങ്കില്‍ സാങ്കേതികപരമായ എന്തെങ്കിലുമാണോ പ്രകടനത്തെ ബാധിക്കുന്നതെന്നും തിരിച്ചറിയുക ബുദ്ധിമുട്ടാണ്. പക്ഷെ നിങ്ങള്‍ തളരരുത്, മികച്ചൊരു ഇന്നിങ്‌സ് ഉടന്‍ വരുമെന്ന് മനസ്സില്‍ ഉറപ്പിക്കണം. ആവശ്യമെങ്കില്‍ ഇത്തരം ഘട്ടങ്ങളില്‍ ചെറിയൊരു ബ്രേക്കെടുത്ത ശേഷം ഫ്രഷായി തിരിച്ചുവരവിനു ശ്രമിക്കാവുന്നതാണെന്നും ഗെയ്ക്വാദ് വിശദമാക്കി.

ടി20 ലോകകപ്പില്‍ നിന്നും തഴയപ്പെട്ടു

യുഎഇയില്‍ നടന്ന ഐപിഎല്ലില്‍ ഡല്‍ഹി ക്യാപ്പിറ്റല്‍സിനു വേണ്ടി തകര്‍പ്പന്‍ ബാറ്റിങ് കാഴ്ചവച്ചിട്ടും തൊട്ടു പിന്നാലെ നടന്ന ഐസിസിയുടെ ടി20 ലോകകപ്പില്‍ നിന്നും ശിഖര്‍ ധവാന്‍ തഴയപ്പെട്ടിരുന്നു. രോഹിത് ശര്‍മ- കെഎല്‍ രാഹുല്‍ സഖ്യത്തെയായിരുന്നു ലോകകപ്പില്‍ ഇന്ത്യ ഓപ്പണിങ് ജോടികളായി തിരഞ്ഞെടുത്തത്.
ഇപ്പോള്‍ നടക്കുന്ന വിജയ് ഹസാരെ ട്രോഫിയില്‍ ഇതുവരെ കളിച്ച മൂന്നു മല്‍സരങ്ങളിലും ധവാനു തിളങ്ങാന്‍ കഴിഞ്ഞിട്ടില്ല. ഇവയില്‍ നിന്നും 26 റണ്‍സ് മാത്രമേ അദ്ദേഹം നേടിയിട്ടുള്ളൂ. ഒരു കളിയില്‍ ഡെക്കാവുകയും ചെയ്തു. ജാര്‍ഖണ്ഡിനെതിരായ മല്‍സരത്തിലായിരുന്നു ഇത്. ശനിയാഴ്ച ചണ്ഡീഗഡില്‍ നടന്ന അവസാനത്തെ കളിയില്‍ 22 ബോളില്‍ 14 റണ്‍സെടുത്ത് ധവാന്‍ പുറത്തായിരുന്നു. അതേസമയം, യുഎഇയില്‍ നടന്ന ഐപിഎല്ലിന്റെ രണ്ടാംപാദത്തില്‍ എട്ടു മല്‍സരങ്ങളില്‍ നിന്നും അദ്ദേഹം 207 റണ്‍സ് നേടിയിരുന്നു.