സച്ചിന്‍ vs മഗ്രാത്ത്, സച്ചിന്‍ vs അക്തര്‍... ക്ലാസിക് കൊമ്പുകോര്‍ക്കല്‍, വ്യത്യാസം ഹോഗ് പറയുന്നു

സച്ചിന്‍ vs മഗ്രാത്ത്, സച്ചിന്‍ vs അക്തര്‍ പോരാട്ടങ്ങളില്‍ മികച്ചത് സച്ചിനും അക്തറും തമ്മിലുള്ള കൊമ്പുകോര്‍ക്കലാണ്. ക്ഷമ പരീക്ഷിക്കലാണ് സച്ചിന്‍-മഗ്രാത്ത് പോര്. മികച്ച ബാറ്റിങിലൂടെ സച്ചിനും മികച്ച ബൗളിങിലൂടെ മഗ്രാത്തും പരസ്പരം ക്ഷമ പരീക്ഷിച്ചു കൊണ്ടിരിക്കും. ഒടുവില്‍ ആര്‍ക്കാണോ ആദ്യം ക്ഷമ നശിക്കുന്നത് അയാള്‍ക്കായിരിക്കും ജയമെന്ന് ഹോഗ് ചൂണ്ടിക്കാട്ടി.
എന്നാല്‍ അക്തറും സച്ചിനും തമ്മിലുള്ള പോരാട്ടമാണ് കൂടുതല്‍ ആവേശകരമെന്ന് ഹോഗ് പറഞ്ഞു.

വേഗവും ക്ലാസും തമ്മിലുള്ള പോരാട്ടമെന്നാണ് അക്തര്‍- സച്ചിന്‍ ഏറ്റുമുട്ടലിനെ ഹോഗ് വിശേഷിപ്പിച്ചത്. തന്റെ തീപാറിക്കുന്ന വേഗം കൊണ്ടു സച്ചിനെ വീഴ്ത്താനാണ് അക്തര്‍ ശ്രമിക്കാറുള്ളത്. മാത്രമല്ല ഇത് ഇന്ത്യയും പാകിസ്താനും തമ്മിലുള്ള പോരാട്ടം കൂടിയാണ്. ആ രീതിയില്‍ സച്ചിനും അക്തറും തമ്മിലുള്ള ഏറ്റുമുട്ടലിന്റെ ഗ്ലാമറും വര്‍ധിക്കുന്നതായി ഹോഗ് വിലയിരുത്തി.

അടുത്തിടെ സച്ചിനുമായുള്ള തന്റെ പോരാട്ടത്തെക്കുറിച്ച് അക്തറും തുറന്നു പറഞ്ഞിരുന്നു. സച്ചിന് സമാനമായാണ് നിലവിലെ ഇന്ത്യന്‍ ഓപ്പണര്‍ രോഹിത് ശര്‍മ ബാറ്റ് ചെയ്യുന്നതെന്നും അദ്ദേഹം ചൂണ്ടിക്കാട്ടിയിരുന്നു.
രോഹിത് ഫോമിലാണെങ്കില്‍ മറ്റൊന്നും ശ്രദ്ധിക്കാറില്ല. പന്ത് നല്ലതായാലും മോശമായാലും ഫലം ഒന്ന് തന്നെയായിരിക്കും. വളരെ ആധികാരികതോടെയാണ് അദ്ദേഹം ഓരോ ഷോട്ടും കളിക്കാറുള്ളതെന്നും അക്തര്‍ തന്റെ യൂട്യൂബ് ചാനലിലൂടെ പറഞ്ഞിരുന്നു.